Tinuod, Inday, nga wa gyod ko kasabot.
Kasingkasing kong bugaong, ay! nataga,
Milahos ang sima ug di na maibot.
Mga pulong mo sa bukog ko midulot
Bisag tig-a sama sa tadyaw o banga.
Tinuod, Inday, nga wa gyod ko kasabot.
Tinan-awan mo pilit pa sa kapulot,
Tukmo milugnot samtang ako naghapa.
Milahos ang sima ug di na maibot.
Akong hunahuna gubot pa sa lukot
Sa pagtimbang kon gasa ka ba o sala.
Tinuod, Inday, nga wa gyod ko kasabot.
Magtumba kog baka kon ikaw mosugot
Ug itugyan mo mga ngabil mong basa.
Milahos ang sima ug di na maibot.
Ituaw kos langit ang imong kahumot
Kay akong gibati kapungngan pay baha.
Tinuod, Inday, nga wa gyod ko kasabot.
Milahos ang sima ug di na maibot.
-- VICENTE VIVENCIO BANDILLO
Dubai, United Arab Emirates
No comments:
Post a Comment