pagmatuod sa chaos theory pinaagi sa kamatayon ni yoyoy villame

Napandol, nalukapa ang nanaghoy
nga terorista. Duyog sa aligato
sa pamalikas, nalagpot
ang iyang pustiso.

Padulong sa kasilyas sa palasyo,
ang nagkalibangang’ presidente
nadakin-as sa banaw
sa iyang singot.

Nabungol ug nabuta
ang mga mitngaw daplin sa suba
sa Loboc kay mikilat ug midugdog
ang kamera sa mga turista.

Nagpagimaw sa iyang atngal atubangan
sa computer, ang babaye gasupsop
sa kauhaw sa biyudo kansang kapikas
gi-breast cancer.

Pahiuyon sa alimyon sa kalamay
sa basurahan, ang ilong
sa ilagang pawot gikuninitan
sa mga hulmigas.

Napaakan sa mananabtan
ang iyang dila. Natuk-an
ang haranista, nakatulon
sa natagak nga bitoon.


-- MICHAEL U. OBENIETA
Topeka, Kansas, USA