pagpangahas: usa ka bahin sa alegoriya ni bill viola

(human natan-aw ang iyang Hatsu-Yume o First Dream)
















Tinukmod sa tinguha ang iyang unang damgo sa lawod.
Unahan sa kahaponon, didto nagpaabot ang kangitngit
ngilit sa dag-om. Ug ang singgit sa sidlak gisignit, daklit
lamang. Samtang wa’y kukaluoy, ang kahilom gihapak
sa mga bawod nga padayong nanghasi sa pikas tampi
sa kilom-kilom. Ug mora la’g wa’y nahitabo, kay wa ma’y
makaluwas sa ugma nga uban sab gianod sa panganod.
Ang ugmang susama’s gabon sa kabukiran o kakahoyan,
takulahaw mahanaw; sama ra sa hangin sa kahumayan
o kawayanan, mamatikdan kon mohuros. Kon lakturon,
wa’y mosaksi bisan nala’g salisi. Pananglit, mosumbong
gyod ang hangin ngadto sa sidlakan, dili siya katuhoan
tungod ra sab sa iyang apan. Ang bugtong makatugkad
sa sangpotanan sa umaabot lagmit mao ra pud ang ga-
tukmod sa damgo, langoy sugat sa su’g sa pangandoy.


-- NOEL D. RAMA
Clinton, Maryland, USA