8.19.2008

panan-awon nga namalibad sa kamatayon
















Miabli ang usa ka pultahan,
luspad sama gihay
sa bulak, o layag
sa sakayang nag-inusara sa lawod,
o mga tudlo sa babayeng nagbangotan.
Sa kapulihay,
midayon ang kahayag.

Lahi ra kaayo ang talan-awon
gikan sa gawas.
Inigbukas sa pultahan
wa kay laing makita sa sulod gawas
sa kahilom,
way mosantop sa imong hunahuna,
dili mga mata, o pagbangotan.
Apan inanayng mapuno ang lawak
sa mga tagak
nga dahon nga luwan sa mga bawod
sa kahayag, unya makaamgo ka
nga kini mao diay
ang imong kinabuhi, nga nasangit
sa buhok sa huyuhoy nga nagkahanap
diha sa gihay
sa bulak, sa luspad nga mga tudlo
sa kangitngit.



-- VICENTE VIVENCIO BANDILLO
Dubai, United Arab Emirates

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.