tilimad-on

"So long as they have the instinct of self-assertion, they will exercise it at the expense of other’s happiness. In short, so long as man is man he must be prepared to face all the woes that he can bear." --W. Somerset Maugham

Kon magbaktas ko sa kainit sa Colon
May mamalikhaw pa kahang abog sa atong
Paghandom?
Timan-i: way amorsiko ug daman sa
Aseras nga andam maghinubay sa akong kahigwaos.
Ang kanal sa ting-ulan puno na sa akong kahiubos.

Di na ko ganahang maghuwat nimo sa
Plaza Independencia. Maypa mang kahaponon
Kay may gitgit pang tilimad-on sa iyang pag-abot.
Ikaw, walay anino sa imong pagtalikod.

Ang mga guryon himoon man gani nato niadtong
Sakyanan sa daghang lawig nga mga pangandoy
Ug sa imong aping magbangaw ang ihalas kong halok
Apan ang tanan mora lag baha sa tingbagyo
Dihang nadanas ka sa hilis nga ligid sa panahon.
Buwakaw kang nawala sa akong panan-aw.
Hunahunaon ko na lang:
Anino ka man lang tingali sa akong damgo
Igo lang kang maghatag kahasol sa bugan
Sa mga gabiing uliponon ko sa daman
Apan ang tinuod usa ka man lang sa libo
Ka libong elemento sa akong pus-on
Kon nasayod ka pa lang nga
Bisan ang likod sa bus ug bungbong sa CR
Sa SM ug Ayala nagpaninggit sa akong gugma
Nganha nimo. Isawilik ko kining kainit, kamingaw, kalagot
Samtang manglili sa mga burikat sa Junquera.
Pero didto, didto sa kinalay-ang kalasangan
Sa akong hunahuna, imo gyong nawong akong gisalida
Kay di lagi unta ko gustong magluib nimo.

Sa akong pagkatulog, kadtong panyo mong
Gipahid nato sa singot: kasubo man kun kalipay
Akong unlanan, hagkan—
Hangtod kab-oton nako ang gilay-on sa kabituonan
Gakson ko ikaw sa ilusyon.

Ang tinuod, labaw ka pa
Sa mansa sa bakikawng mga letra
Sa menteryo sa Carreta. Pero wa koy
Mahimo kon dili ilubong sab nako dinhi
Ang bisan unsang salin sa imong tunob.
Aron wa na koy handomon
Bisan gamayng tilimad-on.


-- OMAR KHALID
Medellin, Cebu, Philippines