10.18.2008

mga mubo’ng balak
















Carousel

Dili mohunong pagtuyok
ang batan-on tang kaikag
pagsakay sa carousel.
Mga kabayo’ng way mga tiil,
mga balod nga way dagat
modala kanato sa ilang mga bukobuko
ngadto sa hinay’ng lilo
sa mga damgo.

Mga Timaan

Puti’ng walingwaling sa habog nga pangpang,
Bituon sa Kagabhion nga nagkislap
sa langit sa gisalumsomang kasadpan.
Mga timaan
nga di ko na makutlo
ang bulak ning nagkalawos kong adlaw.


Hangyo

Ginoo, kay taas man kaayo
Ang bili nga gisitar Mo
Sa akong kinabuhi,
Kon mahimo unta
Pahangyoa ako
Og bisa’g dyutay na lang
Nga pakapin.


-- URIAS A. ALMAGRO, M.D.
New Berlin, Wisconsin, USA

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.