mga bituon

nagkayamukat ang mga bituon
sa panganod nga masulob-on

didto sa usa ka ngiob nga daplin
mora silag mga mumhong salin

sa mga tawo nga nagkinamot
ug mga bata nga walay buot

palibot sa nangluod nga buwan
mora silag tinagsip sa uwan

katagakon sa akong atubangan
walay laing luna nga kapaingnan

sa tungod sa dagat nga hilom
morag mga tipasi nga gikumkom

laming kab-oton ug han-ayon pagtarong
susama sa imong ambongan nga nawong


-- MARIA VICTORIA BELTRAN
Cebu City, Philippines