12.07.2008

ang subo nga sugilanon sa irong way tag-iya
















dili na maihap
kapila ko na kaha susiha sa kasilinganan
dili na kaduhaduhaan
way tag-iya ning iroa
daot ug baye pa ra ba
unya mokaon pa gyod og lapok
nahisum-ok siya sa akong tugkaran
sa miaging tuig pa
sa akong paminaw
kon way gustong moangkon niya
siya di sab gustong angkonon
gusto siyang magpabiling gawasnon
gusto niyang way manghilabot sa iyang pagka-iro
mipuyo siya sa balay kay tingali
nahitabo lang nga nakaangay siya
sa akong gipakaon niya
apan karon morag makaingon ko
nga kini tungod lang
kay nabag-ohan siya sa potahe
kay sa miaging pila ka adlaw
di na siya mokaon
bisag unsa pay akong idalit
igo man lang niyang simhoton
dayong palayo
unya nagsugod na sab siyag kaon og lapok
lapok nga maoy ampay niyang lubgan
lapok nga diay
maoy iyang langit ug yuta
busa wala na koy mahimo
dawaton ko na lang ang kamatuoran
kabahin nining irong way tag-iya
nga abi nakog akoa
sulod sa mubong panahon
dawaton ko
na lang ang kamatuoran
ug pasagdan ko siyang mabilanggo pag-usab
sa iyang kagawasan


-- VICENTE VIVENCIO BANDILLO
Dubai, United Arab Emirates

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.