12.01.2008

mga aninipot
















Ang mga aninipot
Mas labing makiblat
Sa dulom nga mga gabii
Sama sa mga dagom sa kahayag
Ilang gituplok ang kangitngit
Kada usa way ngalan ug hinanali –
Usa ka badlis
Daklit apan malungtaron
Ang matag usa daw tipik
Dili niadtong mga nangabuak
Kondili tipik
Nga nangita sa tanang mga lain
Aron mahimong tibuok
Kada kiblat
Usa ka lakang
Sa panaw sa kagabhion
Nga sama ning atoa
Kada kiblat
Usa ka mensahe
Sa usa ka way-lagda’ng pinulongan
Sa kahayag
Sama sa mga gagmay’ng hunahuna
Sa mga gagmay’ng ideya
Nga gipasagdan ta sa ilang paglupad
Ug wa lang gani nato sulayi
Pagdakop.



-- URIAS A. ALMAGRO

New Berlin, Wisconsin, USA
_______________________________________________
Kining balaka hinubad sa orihinal nga Iningles ning tagsulat nga nahipatik sa magasin nga The Pharos (Lighthouse, Parola) nga maoy opisyal nga mantalaan sa Alpha Omega Alpha Honor Medical Society (AOA) sa America. Ang mga membro sa maong society pinili pinaagi sa pagbuto sa mga estudyante sa medicina. Ang tagsulat usa ka membro kay bisan og wa siya moeskuyla sa medicina sa America, gihatagan siya ning dakong dungog kay gibutohan man siya sa mga estudyante sa Medical College of Wisconsin (MCW) sa Milwaukee silbing faculty sa AOA Wisconsin Beta Chapter. Ang tagsulat kanhi full professor sa Pathology sa MCW.

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.