4.10.2009

hisgot sa kalinaw
















gihisgotan sulod sa bugnaw nga mga hotel
aron kuno mahusay tanang panagbingkil.

"kinahanglan gayod kita managhiusa."
pulong sa ekspertong mingisi sa kamera.

apan sa dihang gituki kon asa maghiusa,
migawas gyod ang tinuod nga kolor niya.

ang panaghiusa diay nga iyang gidamgo
taman ra man diay sa istoryang pinulitiko.

kay adunay pondo kining mga panagtigom,
ug aduna diay siya kanunay nga maugom.

"kinahanglan gayod nga kita managhiusa!"
tubag usab sa opisyal nga nagpiyong ang mata.

kay alang kaniya, maghiusa sa pagpakabuta
sa kahimtang sa tanan nga naglurat ang mata.

"kalipay, kalinaw ug paglambo alang sa tanan!"
matod pas bontit nga gikan tabok sa kadagatan.

"ayohon ko ang mga dalan, motaod kog eskuylahan."
apan ang tuyo diay mao kadtong mga minahan.

ug kon mobabag gani ang uyamot nga mga lumad,
gamitan dayon sa kuyaw ug ngilngig nga abilidad.

ang lider nga lumad modayon na lamang og kirig,
bisan tingali mambabarang sa abilidad di kalupig.

"nalumos tos sabaw o kaha nakalimot og ginhawa."
maoy labing daling hinungdan ipaguwa sa midya.

dayong balik sa eksena ang grupong mga armado.
pinusilayg balabala ang sibilyan haskang igoas ulo.

kalinaw, kalinaw, ang mga utok namo gikutawkutaw.
human ilogig yuta gipasaligan dayon sa way mga ulaw,

"kamo nay mahibalo kon unsay ihatag ninyo kanamo."
ginagmay apan kanunay hangtod ang bayad modako.

unya kon masuko ug magwaras ang mga hingtungdan,
ingnon dayong hinayhinay kay igsoon tang tanan.

agion lang kuno sa istorya aron walay dakong gubot,
ug kon kami mangatarongan ingnong way mga buot.

giuban na lang ang bungot sa akong silingan,
wa pa mahuman ang istoryang way padulngan.

kay unsaon man og kahuman ang hisgotanan,
nga di man nila ilhon ang tinuod nga gisugdan?

basin tingali kay kadaghanan nilang apil sa hisgot,
aduna may kalambigitan sa among pagkaalaot.


-- ANIJUN MUDAN-UDAN
Malaybalay, Bukidnon, Philippines

2 comments:

Balitaw said...
This comment has been removed by the author.
Balitaw said...

ah!hisgot-hisgot lang gud,saad-saad. ngano man mag-inot laway ra may puhunan sa mga banggiitan ug kusgan unya lagi sikat, mora ug nanghubag ang mga utok sa kapuno sa ulo-ulo sa mga sipsip sab nga way bukog nga mga alalay. unya ang media, pasundayag ug sibya sad dayon, makasulaw nga kaalam sa mga butirik ug tiyan.
pakpak sa entablado!busog bulsa , busog ego,belib ang katawhan.


Daghang salamat sa mga maniniyot nga gapaambit sa ilang mga hulagway sa Google ug Flickr.