4.03.2009

pahilayo nga pagdapit
















Pikatan unta ka sa buta. Ikaw nga galikay aron di matunolan
sa iyang sungkod, dawata kining akong pahasubo. Dili nimo
mahimamat ang latagaw nga mao ra’y bugtong makatultol
sa utlanan sa imong kamingaw. Ako nga dagha’g uwat
hapin sa akong tuhod, unsa’y lain nakong ikabilin isip
panamilit? Diha sa pahiran ubos sa pultahan sa imong
lawak nga trinangkahan, nagnganga ang duha ka dunot
nakong sapatos. Igo na kanang liston kon luiban mo ako
pinaagi sa paghigot sa imong liog. Ayaw ko tawga. Matugaw
unya ang mga langgam, nanugdon sa akong abaga. Hangad,
ug subaya ang akong mga tunob. Gatabanog ko’g mga mapa.


-- MICHAEL U. OBENIETA
Topeka, Kansas, USA

2 comments:

rsb said...

hingpit nga balak ni
pareng myke.

misamot pag-aghat kanako
sa pagpadayon sa pagmugna.

salamat kaayo sa imong mga
bulawanong pulong.

MICHAEL U. OBENIETA said...

Nyor Ric,

Salamat pod
nga wa'y sukod

Padayon ta
pagkapakapa

ning mangtas
natong tahas.


Daghang salamat sa mga maniniyot nga gapaambit sa ilang mga hulagway sa Google ug Flickr.