2.27.2010

akong kuan nakakuan sa imong kuan
















hesussantamariyosep!
wa ko damhang
mapalgan ko ang langit
dinhi sa yuta

bag-ohay pang
mitulibangbang ang kampana
ah orasyon na

ang akong agtang nakadaitol
sa imong kamot

padre


-- MELQUIADITO M. ALLEGO
Palm Harbor, Florida, USA

sa mga uhay sa bulak
















Sa mga sagbot, kanding-kanding, ug kipi-kipi
Luyo nianang tugkaran
Mamauli kita.
Didto
Diin gawasnon kitang magtiniil,
Pistahan nato pag-usab
Ang mga amorsiko.
Lukpon ta niini
Ang mga sidsid
Sa atong mga kagahapon
Unya paambiton ta ang kasamtangan
Ug ang umaabot
Sa makabungog tang hudyaka.

Higdaan nato ang kalunhaw
Sa mga kipi-kipi
Nga maoy ampay nato sa kasagbotan
Hangtod mangapungil ang mga tunok niini.
Kay unya sa imong paggikan pag-usab
Didto sa dapit sa mga niyebe
Pamuniton ko
Sa atong karaang tanaman
Luyo nianang tugkaran
Ang mga biniyaang
Uhay sa mga bulak
Sa kanding-kanding.


-- GINA MANTUA-PANES
Cebu City, Philippines

2.23.2010

mga sulagma
















Sa akong mga pagsuroysuroy
Gisubay ko lang
Ang mga daang dalandalan.
Ang kilid sa mga sapa.
Ang lapyahan
Sa bakante’ng mga baybayon.
Gipadayon ko lang pagbuka
Ang akong mga mata
Ug way kalainan
Ang akong pagtan-aw.
Kay dugay ko nang ningbaw-an
Nga kadto’ng akong gipangita
Dili mao ang akong hikaplagan.


--URIAS A. ALMAGRO
New Berlin, Wisconsin, USA

hoy, kasingkasing!
















Hoy, kasingkasing!
Palayo ug pasagdi ko
Nga mag-inusara.
Ayaw ko’g tugawa.

Ikaw ang hinungdan
Sa akong pag-antos uban
Sa maluibon kong kapikas.

Bisan sa iyang kamangtas
Wala ko makaatras
Pabiling gamantinir
Sa akong pagkamartir.

Kanako wa ka manginlabot:
Padayon sa imong pinitik
Nga ikaw ra’y nakasabot!


-- RAUL M. FIGUES
Oslob, Cebu, Philippines

2.22.2010

mao kini ang disyerto
















dinhi ikaw ang adlaw
ako ang balas nga halhag
palidpaliron sa hangin

wa'y utlanan nga gahangad
bisan hangtod ikaw
sa pagsalop mahanaw

balas lang gihapon ako
nagpabiling nangandoy
sa dagat nako kaniadto


-- RIC S. BASTASA
Katipunan, Zamboanga del Norte, Philippines

pungpong
















Mga tunok sa rosas ang gisabwag mo kanako.
Mga tunok sa rosas ang gisuyak mo kanako.

Mibuhagay ang ginalon nga luha.
Midagayday ang baha, gibanwas
Ang mga lamog-lamog sa panumdoman.

Nahulma ang dakong hawanan, gitubo-an
Og daghang sagbot, naberde ang kalibotan.

Pagkatam-is, pagkaputli sa hangin.
Gihayagan sa adlaw ang mga sagbot,
Gituboan ang mga liso sa hangin og gamot.

Nabanhaw ang usa ka rosas, ug kalit
Migapos sa akong kasingkasing daw posas.

Mibaliktos sa akong galamhan ang puno-an.
Miduot sa akong kasing-kasing ang mga tunok,
Apan sa imong pag-abot gilabni mo ang puno-an.

Ang mga nagbaliktos nga tunok nangatangtang,
Uban sa akong napulpog nga kaunoran.


-- BERNARD PAGUSARA
New Orleans, Louisiana, USA

2.17.2010

akong uyab paraygon kaayog lubot
















Akong uyab paraygon kaayog lubot
Apan tinabonan ang iyang katawa.
Akong uyab paraygon kaayog lubot
Nga andam mosanta sa akong kayugot.
Tinan-awan ni Dodong dili maibot—
Kasudlan og kumo ang iyang banganga.
Akong uyab paraygon kaayog lubot
Apan tinabonan ang iyang katawa!


-- VICENTE VIVENCIO BANDILLO
Koror, Palau

hayloon ta ang bakunawa
















(kang pumpkin)

Paita
Kon ang atong tinutokay
Lamyon sa bakunawa
Sama pananglit sa kamangtas
Sa nagkataas nga pletehan
O sa kakatol sa tinabal
Nga gidaginot ni Mingming
Kagabii sa atong kusina.
Nangyamiid gani to
Kay ang tinabal mikaging na.

Lisora
Sa pakigbugno—
Bisan gani siguro kanang
Atong silingan nga si Crips,
Mas igmat pa ni Darna,
Dili gyod makapiog.
Pustahan pa!

Ah, aber,
Itsahan na lang kaha nato
Kanang bakunawa
Sa tagsingko tang ginunitay
O sa atong tagmamiso
Nga parayganay sa pamasin
Intawon nga hinay-hinay
Makalimot ang bakunawa,
Mahaylo.


-- GINA MANTUA-PANES
Cebu City, Philippines

2.16.2010

gumikan sa gilay-on
















Suwaw ang kaputi
sa kabugnaw.

Wala’y nadagit ang mga sanga
nga nangapkap sa hangin:

Asa kutob ang aso
sa mga dahon?

Lapaw ang kainit
sa akong tabon-tabon.


-- MICHAEL U. OBENIETA

Topeka, Kansas, USA

tam-is nga kadaogan
















sud-onga ang sanglitanan
nianang usa ka bangaw
aron imong mahibaw-an
ang katahom di molutaw
kon wala ang uwan
makigduyog sa adlaw


-- ROMEO NICOLAS BONSOCAN
Carcar, Cebu, Philippines

2.15.2010

sa kataposan nakong gutlo, buot kong makighilawas. . .
















sa kahilom,

mosulod ko sa iyang langob
pasagdan ko nga kaming duha magbukot

sa kainit, kangitngit ra ang bugtong saksi
niining tanan, ang paggawas-sulod

sa akong gininhawa
mao ray tingog nga akong mabati

ug sa higayon nga mobinhod
ang mga paa sa akong kahimatngon

mamumpong og kahayag
ang unlan, ang habol, ang katri.


-- GLENN T. MUÑEZ
Dumanjug, Cebu, Philippines

gagawen
















Ang kahumot sa imong gininhawa maoy akong kinabuhi.
Ug ang katam-is sa imong pahiyom maoy akong bahandi.


-- ANIJUN MUDAN-UDAN
Malaybalay, Bukidnon, Philippines

2.13.2010

nagkulismaot nagkayamukat nagkamuritsing
















Ang kunohay buotan sulundon modelong bana
aduna diay daghang kerida.
Ang saykayatris namusil og mga sundalo.
Naunsa na man uroy king kalibotan?


Nagtuwad nabaligtad nabalintong naglinog!


-- MELQUIADITO M. ALLEGO
Palm Harbor, Florida, USA

sa atong abotanan
















Dinhi
Sa atong abotanan
Nibalik ko
Sa atong tugas
Nga lingkoranan
Nga gitagiptipan
Sa imong mga buladas
Kanhi.
Pasagdi
Nga hulaton ko
Ang mga laylay
Sa imong balak
Dinhi ning landong.
Buot ko untang
Magpaanod pag-usab,
Magpailad
Sa mga gitik-gitik
Sa imong mga tinagsip.
Dinhi ko
Suwayan pagtultol
Ang hinuyop
Sa imong mga garay—
Dakpon, hangpon
Ug huptan ugma
Kon magdag-om na
Ang panumdoman.


-- GINA MANTUA-PANES
Cebu City, Philippines

2.12.2010

sa tuo’ng pikas sa akong utok
















Duha ang akong mga mata apan usa ra
Ang larawan nga akong hikit-an.
Usa ra ang akong utok apan
Dunay duha ka pikas nga lahi
Ang kagawian. Ang wala’ng pikas
Matukion sa tanang mga butang,
Maninguha pagsulbad hangtod
Sa kinagagmayang mga bahin.
Ang tuo’ng pikas masabtanon,
Molantaw nga tinibuok, maninguha
Sa pag-uswag. Gikan sa una
Kong paghikita kanimo,
Ang imong larawan tua ko hiposa
Sa tuo’ng pikas sa akong utok.


--URIAS A. ALMAGRO
New Berlin, Wisconsin, USA

pagsalimuang
















ang adlaw ug ang gabii
makita mo ra sa iyang nawong
nga nag-usab-usab

paglingi niya kanimo
atua mikuyog
ang kagabhion

ang kaadlawon
nagpabilin gihapon diha
sa kaiihion nga pus-on

ang udtong tutok
anaa sa iyang mga mata
diha sa pagpiyong

igo na kining makasamad
sa pipila ka hangin
nga milabay

ulan sa alas dose
kilat sa ala una


-- RIC S. BASTASA
Katipunan, Zamboanga del Norte, Philippines

2.06.2010

kutob sa imong mahimo
















Bisan tuod dili nimo mahan-ay ang imong kinabuhi sigon sa imong gusto,
sa labing menos, panlimbasog kutob sa imong mahimo
nga dili maangin ang kabililhon niini
sa naghingaping pakiglambigit sa kalibotan,
sa nanghingaping buluhaton ug kukabildo.

Ayaw kini pasipad-i pinaagi sa pagguyod-guyod niini,
pag-isa-isa niini sa tanang mga adtoanan ug pagpasundayag niini
sa inadlawng kinuwanggol
sa mga tigom ug kasaulogan sa katilingban
hangtod nga mora na lang hinuon kinig usa ka bwisit nga kuyog-baboy.

(gikan sa Iningles ni Edmund Keeley ug Philip Sherrard
sa orihinal nga Griyego ni C. P. Cavafy)


-- VICENTE VIVENCIO BANDILLO
Koror, Palau

monobloc
















Nakapanampiling ang takna, naghinuktok
Samtang naglingkod siya sa puting monobloc.
Gisuhid niya iyang hunahuna. Kon unsa
ang iyang gipangita, siya ra’y makasuta.
Pagkataudtaod, giduol siya sa iyang apo.
Gibira ang iyang bukton. Naguyod pod
ang iyang kahimatngon. Pagbarog, iyang gikuha
ang sungkod. Hugot kini niyang gikuptan
aron mapugngan niya ang hinanaling pagdailos
sa bawog sa iyang lawas. Samtang siya
gikantahan sa iyang apo, kahilom ra niya
ang nakigduyog. Nunot sa kanta, nikiay
ang talidhay sa iyang apo lagbas sa kilomkilom
sa iyang kasingkasing. Milingkod siya og balik.
Gitul-id niya ang iyang bukobuko, apan
Nabati niya nga nisamot siya pagkabawog.
Mingislo siya. Kabug-at sa nagkakuyos
Nga panahon. Misabak niya ang iyang apo.
Gibug-atan siya. Misandig siya sa sandiganan
sa monobloc nga mao ra’y andam mosapnay
ug modawat sa iyang gibati nga kabug-at.


-- KEVIN A. LAGUNDA
Mandaue City, Cebu, Philippines

2.05.2010

mecum omnes plangeti
















dili gyod ko motuo ini
lisod tunlon kining salin
sa pista sa patay nga dila

dili gani mo
lingi ini bisan
ang mga ilagang pawot


ang ilang talinis nga ikog

sumpay sa tanang puya

nga mga pulong nga gahuot

diha sa mga basurahan

natingban sa mga laylay

labyog sa pisi nga luag
sa
kahilom sa mga inahan
gadiwalwal sa
kagutom


-- MICHAEL U. OBENIETA
Topeka, Kansas, USA

sa imong pagtabok sa pikas lapyahan
















di ko buot
tapisan sa luha
ang akong panan-aw
inig ubog nimo
sa gabukal nga dagat
sugat sa subangan


-- RAUL M. FIGUES
Oslob, Cebu, Philippines

2.04.2010

pagkatapos sa operasyon sa katarata
















A.
Klaro nang irokon mga kuto
sa buhok ning kinabuhi

B.
Sa kalit mga bulok sa kinaiyahan
lunsayng giladlad sa kanbas
sa kalimutaw sa kahimatngon

C.
Sa kinailadman sa dagaming
uhotlukot saksaksinagol
nahawaning dagom
dali rang palgon

D.
Kanunayng kadulog katanday
namatikdan namatud-an
labing maanyag malulot
humot presko seksi
kini mas lami importante


-- MELQUIADITO M. ALLEGO
Palm Harbor, Florida, USA

sa imong barutong papel
















Pasakya ko, anak
Sa imong barutong papel.
Mukuyog ko
Sa pagsugat
nianang bul-og
sa unahan.
Kupti ko
Sa akong pagbarag
Inig sukarap na unya
Sa hangin.
Sa imong pagtugot
Sa layag,
Pasagdi kong mogunit
Sa katig.

Tudloi ko, anak
Sa pagpiyong
Kauban nimo.
Ug didto
Pakit-a ko
Sa mga bulok
Sa kahiladman
Nga way puas
Nimong gisawom.

Padungga ko
Sa uraray sa mga sugilanon
Sa matag suba,
Lapyahan
Ug katubigan.
Ihunghong nako
Kon asa
Ang kinatumyan
Nianang bangaw,
Nga matod mo,
Duna’y mga bulok
Nga hinulaman
Sa imong kinahiladman?

Hain, anak, hain,
Ang kinapusoran
Sa imong dagat?


-- GINA MANTUA-PANES
Cebu City, Philippines

2.02.2010

tungod kay
















(hubad sa balak ni Yannis Ritsos)

Tungod kay ang mga sakyanan mihunong sa atubangan sa mga siklat
tungod kay ang mga monyika sa gisugaang mga bentana sa tindahan
nanaglihoklihok
tungod kay ang bata’ng babaye nga nagbisikllta naglangaylangay
sa atubangan sa botika
tungod kay ang panday nakabuak sa bildong pultahan sa inomanan
tungod kay ang bata nag-inusara sa elevator uban sa kinawat nga lapis
tungod kay ang mga iro mibiya sa mga pinuy-anan sa daplin sa dagat
tungod kay ang mga gitay-ang tabon sa imbornal gitabonan og mga lingatong
tungod kay ang langit abuhon nga dunay pula nga isda
tungod kay ang kabayo sa bukid mas nag-inusara pa kay sa usa ka bituon
tungod kay kini ug kadto pulos mga giayam
tungod niini, ug tungod ra gyod niini, gisultihan ko ikaw og mga bakak.


Gihubad ni:
-- URIAS A. ALMAGRO
New Berlin, Wisconsin, USA

lumba
















ang lumba sa dagan
didto sa disyerto
sa matag adlaw
wala'y imnanay og tubig
sige la'g dagan
wala'y ambatay kon naunsa na
ang imong tupad
nakita mo ang gidangatan
sa mga nauna og naulahi
wala ka malisang
kahibawo ka na sa imong dangatan
wala ka gihapon malisang
wala ang kahadlok
kay ato kining tinuyuan

walay tubig walay pan
walay ambatay
walay paambitay
mao kini ang atong gituyuan
walay basolay

diha ang pagpahulay


-- RIC S. BASTASA
Katipunan, Zamboanga del Norte, Philippines

2.01.2010

portera: usa ka laylay
















Sama sa suba midagayday ka paingon sa kawalaan sa panahon
Palayo niining handuraw nga inumol gikan sa tubig ug hagawhaw
Apan unsaon mo man pagbiya sa panganod nga imong gipuy-an
Matag saghid ko sa imong anino ianod ako sa dagatnong huyuhoy
Luwan sa awaaw nga dahon sum-ok sa sam-ang nga umaabot
Damgo nga dili matagamtam bisan sa halawom nga katulogon


-- VICENTE VIVENCIO BANDILLO
Koror, Palau

eskwater
















Eskapohan nato ang nanghupaw
nga adlaw. Ayaw pamuhi sa akong kamot,
magdagan ta padung sa dapit

nga wa dinhi sa kalibotan. Didto, maghimo ta
og barung-barong sa nagkayo nga kangitngit.
Ipadanlog nato atong dila diha sa nagsiyagit

nga kahilom tidlom sa atong gapitik
nga tinipigan. Unya magtagbaw ta’g pangita
sa mga bituon sa atong mga mata.


-- KEVIN A. LAGUNDA
Mandaue City, Cebu, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.