3.22.2010

ang kabalyero
















Ang mga uwak misakdap-sakdap na usab
sa namulak nga mga kabalyero.

Ang ilang mga kawkaw mipalapad sa kaawaaw,
mitugaw sa pagpanuktok sa mga maya
sa lagyo ug hawan nga humayan.

Si kinsang nahigugma na usab ang nahikalimot
ug nalumay sa nagdilaab niining mga dahon
misugnib sa mga ugat sa kahoy sa iyang dugo?

Ang kasanag sa kabalyero mibiaybiay sa kadag-om
sa mga panganod,

mitamay sa luspad nga mga kamansiles nga gihulga
sa mga dalugdog.


Sa iyang paghangad mipayong kaniya
ang naglut-od nga mga sanga.

Sa dihang gihipos niya ang iyang buhok
ug gisapid ang pisi sa sanga sa kahoy,

kinsa'y molalis sa katim-os
sa kapula nga mihangop, migakos ug
mibitad kaniya ngadto sa kinahiladman sa bulok.

Diin hari ang kangitngit
diin ang mga tipaka sa kabalyero nangahunlak
natu-asik ang bulok ug nagsugod na pagkalata diha sa kabatoan.


-- ESTER TAPIA
Kathmandu, Nepal

1 comment:

M said...

ester,

ang nalata diha sa kabatoan
moukiok lagbas sa kangitngit
mabanhaw
sama sa dagat nga mohunas
molantong ug motaob
sakay ang mga gapnod
sa paghandom

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.