3.03.2010

limbay ni Bae Intubang
















Mikiay-kiay bisan ang kogon sa saut ni Sumalugpun.
Mikiay ang tanan-- lalaki, babayi, tigulang ug bata.
Mikiay ang kabungtoran, mikiay ang kasubaan.
Ug nahadlok ang mga langyaw nga nangilog og yuta.
Nalisang sila kay nagkiaykiay ang tanan,
Sa saut ni Sumalugpun, saut nga gamhanan,
Ang saut nga mipunggot sa ulo ni Bolton,
Ang saut nga miputol sa liog nilang mipugos natog tanom
Mipugos natog tanom og saging nga ilang pagadad-on
Sa ilang banuwa nga dili puy-an og sulom.

Sayo sa buntag nagkiaykiay ang Bagobo,
Ug nangaligid sa bakilid mga ulo sa Hapon.
Sa udto nagkiaykiay ang Higaonon,
Ug nangabali ang mga bukog sa Amerkano.
Sa kahaponon nagkiaykiay ang Manobo,
Ug ang mga Dumagat nangahulog sa bangag.
Mao nga mga anak ko padayon sa pagsaut
Mangiay kitang tanan hangtod sa pagdaug
Ikiay tag ayo ang tanan tang kaligutgot
Sayawon tag ayo ang saut sa dalugdog.

Hala sayaw sayaw sa saut ni Sumalugpun
Sayaw gikan sa Sumlug ngadto sa Umayam
Saut sa Pulangi hangtod sa Odiongan
Ayawg hunong hangtod moabot ta sa Maasam
Ug magsaut kita labi na sa Tagoloan!
Hala kiay kiay tanang kaliwatan,
Mga kaliwatan ni Buuy Pigsugdan,
Mga kaanakan ni Inayrin Pigpuunan,
Nga buot uliponon sa mga langyaw nga dangan
Nga buot uliponon sa mga langyaw nga dangan!


-- ANIJUN MUDAN-UDAN
Malaybalay, Bukidnon, Philippines

4 comments:

M said...

anijun,

ang SAUT manobo o bagobo ba
nga pulong?
unsay binisaya o iningles niini?

-mananambalak

M said...

maayo untag
adunay footnote

ginamantua-panes said...

nyor mel,

tugoti nga muhatag kog gamayng panghunahuna.

Makamao man sad kong mag inilonggo ug winaray. My husband is an Ilonggo. Kung sa Sinibuanong bisaya pa, "sayaw" ang buot ipasabot sa pulung nga "saot" sa ilonggong pinulungan. now, if my guess is right, i think saot is still dance in the waray waray dialect.

gina

M said...

gina,

salamat sa enlightenment.

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.