4.30.2010

dakbayanika sa buntag
















garahe mitikandal
pagsibog sa gimanehong
panginabuhi
liboy sa daro
gibulibod sa sungay
tampi sa uma


-- MELQUIADITO M. ALLEGO

Palm Harbor, Florida, USA

ang mga babayeng sipat
















Pwerting dayak. Naglukso-lukso.
Nanighawak. Hilabihag ngisi.
Dagkog mga sunglasses
Morag mga wa naayo sa piskat.

Pwerting pagposing-posing nagsalig
Nga digital ang camera, way kas sa film.
Bisan way angay, hala pahulagway
Ihiyak ang tiyan aron ingnon way bilbil.

Ang mga babayeng sipat
Wa magtagad sa nag-ugdo nga hugason
Sa sawog nga nag-akal sa abog.
Sa nagtipun-og nga labhonon.

Ang mga babayeng sipat
Pwerting kiat. Pwerting kundat.
Sa mga babayeng sipat.


-- TEODOSIA "Dindin" P. VILLARINO
Toronto, Ontario, Canada

4.28.2010

paghipos sa patayng lawas
















dinhi sa batoong baybayon
ubos sa takdol nga buwan
nga daw baba sa atabay
asa ta man tagoi
kining sako nga puno
sa tinagod-tagod nga unod
sa gipanghimaraot tang kaaway
dinhi sa hunasan
diin ang huyuhoy
gisuyop sa gahong
nga puno na sa biya nga mga butang
plastic tetrapak dunot nga purol
panit sa saging puan sa bugsay
mahimong lugson
natog pansak kining atong gipas-an
apan malagmit moaslay lang
ang lang-og nga tubig
dinhi niining masanag
nga kagabhion sa kalag
ang atong pamaol nagdagan-dagan
daw mga agukoy
sa lapokon tang kaunoran
sa atong kakapoy
ang atong mahimo karon
mao na lamang ang paghulat
kon unsay unang moabot
ang taob ba
o ang banagbanag


-- VICENTE VIVENCIO BANDILLO
Koror, Palau

ikalima nga kutaw sa kape
















Sama kini sa miaging nag-alindasay nga kagabhion.
Madungog ang pagpanaguto
sa katre sa matag wandog sa imong paghigda.
Pipila nalang ka gutlo
ug magbahas na ang kabuntagon ug hangtod karon
giduslitan paang imong mata sa pagtukaw uban
sa nagkipat-kipat nga lamparilya.

Sa gawas, misiaw kanimo ang timos nga alingising
nga nagpasipala
sa kawanangan kon nganong niining himatyon
nga kagabhion nagtuaw pa
sa pagmaya ang mga iring sa tugkaran.
Sa imong pagkawas sa katre, namasin ka
mawili sa imong pag-inusara. Sa bintana,
dihay mga hulmigas nagsadya, nagparada
sa ilang nabitbit nga grasya. Walay hangin
nga mosuway pagtuhop sa imong galamhan.
Ug walay kriik sa nagnganga nga pultahan.
Sa mabdos nga buwan walay
nag-ibid-ibid kaniya ni bisan
usa ka bituon sa kalangitan.

Ug sa ikaupat nga timpla, kaupat na usab
mibiay-biay sa imong huna-huna
ang saag nga mensahe sa usa ka babaye
nagbalandra sa selpon sa imong bana: "Ramon,
I miss you, I love you." Gibati mo ang kahuot
sa dughan ug sa gihapon padayon ka pagkutaw
sa ikalima nga tasa sa kape bisan sayod ka
nga hagbay ra nahurot ang asukar.


-- GENALYN G. OMAPAS
Cebu City, Philippines

4.27.2010

kaugalingon
















ang tingog sa Ginoo
nasangit
sa gapiti-piti nga gimok
sa hunahuna,
sama sa mga dahong laya—
nadugmok


(hubad sa balak ni Afaa Michael Weaver)

-- MICHAEL U. OBENIETA
Topeka, Kansas, USA

pampagana
















adlip sa mangga nga hilaw
gitusno sa ginamos nga mawos

saging nga sab-a nga init pa
gisawsaw sa giahosan nga dayok

daghang pula kaayo nga bisaya nga sili
diha sa aslom kaayo nga suka sa tuba

ingon ana unta ang akong gusto
sa atong panagdulog karong gabhiona


-- RIC S. BASTASA
Katipunan, Zamboanga del Norte, Philippines

4.26.2010

sa tiilan sa asul nga bukid ni w. kandinsky
















Gipunting ta ang atong mga mata sa asul nga bukid
bisan pa man sa atong kahigwaos,
gilantaw ta ang kaasul sa bukid
nga mao untay makatubos kanato
nga naghatag ug bulok sa atong mga mata
ug kalawom sa atong mga kalimutaw
mga saksi
sa pagsaka sa kurtina sa tubig
sa habog nanga-uphak nga yuta.

Ang kaasul nga bulok sa kalayo
kanunayng wala diha, kanunayng nagpangamay,
maoy atong gitumngan,
nakigsulti kanato
bisan pa man sa atong pagpaka-walay-timik
bisan pa man sa atong pagpaka-amang
kining asul nga mihangop kanato
ug mihatod kanato sa labing kalumo,
bisan pa man sa atong kawala’y kapalaran.

Dili kadtong nagliyo-liyo nga alimpulos sa bulok
nga mobira kanato lahos niining mapa
ngadto sa pikas nga bukid
diin lahi ang mga panan-awon,
ang mga hulagway dili ato
dili kita,
kondili niadtong mga nagpurong
kadtong gipanagnang mga magpapanaw
nga walay mga mensahe o mga pulong alang kanato
gawas sa kagahob sa ilang mga kabayo.


-- ESTER TAPIA
Kathmandu, Nepal

gikan sa o.f.w. ngadto sa iyang asawa
















Ang mga babaye diri gwapa ug sexy,
Blond og buhok, puti pa gyod og legs.
Free ang hugs, ingon sab ang kiss
Basta mohatag lang ka og mga beads.

Ug inig panahon sa Mardi Gras
Diri sa siyudad sa Louisiana,
Daghan maghukas nga dalaga,
Magpaso-paso sa kadalanan,
Magpanawag sa mga kalakin-an,
Mora’g namaligya’g balot sa kadaplinan.

Apan wa ko sila panumbalinga
Iyawat na lang mahimuot ka.

Tugnaw kaayo diri, mora’g dagom
Ang hangin manglusot hangtod
Apil ang kabukogan manglagom.

Apan bisa’g lami iyarok, ayaw kabalaka.
Di ko pasagad og habwa sa akong bulsa.

Maluoy ang ginoo, makapalit unya ta
Og lote ug makatukod dayon og puluy-anan
Nga konkreto mora'g tag-iya'g hacienda
Diin dili langyaw ang lunhaw nga balilihan.


-- BERNARD PAGUSARA
New Orleans, Louisiana, USA

4.25.2010

tinagutlo
















Kabilin

Si Issa, sa iyang pagkamatay, nagbilin*
og usa ka haiku sa ilalom sa iyang unlan.
Kataposang mga pinitik sa iyang kasingkasing.

Kandila

Tibuok gabii, ang iyang kasiga nakighagwa
sa lumalabay’ng hangin.
Ug inanay’ng nagkaupos ang kandila.

Mas

Mas matahom ang langit kon dunay mga panganod.
Mas matinud-anon ang dagat kon dunay mga balod.
Mas buhi ang kadahonan kon dunay hanging molabay.

___________________________________________
* Issa: (Kobayashi Issa) usa sa tulo ka labing bantogang
magsusulat sa Haponanong balak nga haiku

-- URIAS A. ALMAGRO
New Berlin, Wisconsin, USA

piang
















Mitadlas na usab
Ang imong panan-aw
Sa karaang hulagway.

Miharong ka sa makausa pa
Sa mibadhas nga kahugot
Sa linambigitay
Nga taodtaod nang gianay.

Ug sa kalit lang
Milagaak ang piang
Sa imong dughan.


-- GINA MANTUA-PANES
Cebu City, Philippines

4.24.2010

sa baybayon sa sento otso
















Manginhas ko sa mga ulahing tunob sa mananagat
Sa walay kalaay nilang pakigbisog pagbugtaw
Sa kinabuhi, ako makat-on pagpamunit sa
Sa nabiyaang mga tawag sa kilumkilom
Wala ko moanhi aron pagpangita sa
Tun-as nga kabuntagon diin gibun-og
Ang mga sakayan sa pangutana sa katawhan
Kon hain na ang nawala nilang kalalakin-an
Kay kining tanan, tanan, tanan—
Ginadawat man sa mga pinong balod
Aron iuli sa sabakan sa lawod isip halad nga buhi
Tadlas sa kaparat sa ilang mga singot
Wala baya ko moanhi aron mangitag hustisya
Sa punoan sa mga bakhaw batok sa dagkong
Panagatan nga naghimong awaaw sa hunasan
Tungod kay nia ko aron mohubad sa tigmo
Nga nahimo lamang kahilom sa kisaw
Sa naglantong nga taobon.


-- OMAR KHALID
Medellin, Cebu, Philippines

alang sa estudyanteng buros
















Nakahinumdom ka pa ba
sa dugokan nga imong gibahakhakan
dihang nagleksyon kamo mahitungod
sa reproductive system? Mao kadto
ang higayon nga walay gaduka
sa inyong kiat nga saring.
Makapanghupaw lang ko
nganong wa ka makat-on sa gitudlo
sa inyong maestra. Tingali
nakahinumdom ka ining leksyona
samtang gitayhopan niya
ang imong tiyan. Ug misulod usab
ang gisulti sa lain nimong magtutudlo:
Practice makes perfect.
Sayop seguro ka dihang nag-exam mo
aning maong topic. Ug mag-exam na sab mo.
Nahadlok kang mahagbong.


--ROMEO NICOLAS BONSOCAN
Carcar, Cebu, Philippines

4.20.2010

ballpen milapos sa bagolbagol ni yen-yen
















Adunay pulongbay gumonhap bungotong pasahero
Kahibulongang kasakay sa biyahe nga baligho

Adunay balaanong rason ang matag pangatagak
Sa mga balhibo sa pako sa anghel nga miagak

Aduna nay ulohan umaabot obra-maestra
Lalang sa ballpen dulog sa utok mong wala unsaa

Yen-yen!


-- MELQUIADITO M. ALLEGO
Palm Harbor, Florida, USA

sa imong pagbiya
















Nabati mo ba kaha ang pagdanguyngoy sa akong dughan
samtang miduyog ang sonata nga "After All"
sa taxi nga atong gisakyan. May kamingaw bang mihinay
paghabol sa atong nagtanday nga kamot sa dihang
inanay kita nga gitulod paduol sa pantalan.

Ayaw lang katingala kon sa matag pahid
niining panyong puti di ko kaako kanimo sa paglingi.
Gilangay nato ang nahabiling gutlo sa panaad
atubangan sa barko nga gasenyas na og pauli.

Napagaw nga nanitsit ang kapanganoran,
pwera bisita, pwera bisita, pwera bisita.
Nanghasi ang dagat nga nagtumod
kanimo palayo sa akong gitindogan.


-- GENALYN G. OMAPAS
Cebu City, Philippines

4.19.2010

kilumkilom sa banika
















Hilom nga nagsud-ong ang tigmo sa iyang bayhon. Gihablon niini ang kagabhion

Taliwala sa walay kisaw nga hut-ong sa bagakay.
Adunay kahuyang nga walay nakamatikod
Didto, sa banig sa kasagbotan.

And mga baka daw estatuwa, walay pupamilok ang berde nilang mga mata.
Sa gabiing malinawon hinay-hinay silang magpatighulog ngadto
sa tubig.

Ug ang linaw nagsapwang og higanteng kutsara
Nga gidaitol sa ilang mga simod.


(Hubad sa Iningles ni Robert Bly sa orihinal
nga Swedish ni Harry Edmund Martinson)

-- VICENTE VIVENCIO BANDILLO
Koror, Palau

tungaw
















nanghambog ang tungaw
nga bisan sa iyang kagamay
kun kawalay-hinungdan
mahimo niyang pahubagon
ang itlog sa dakong aliwas
sa galawod nga lasang


-- RIC S. BASTASA
Katipunan, Zamboanga del Norte, Philippines

4.18.2010

tingpamulak
















Unsa’y tumong, Abril, sa imong pagbalik na pod?
Dili paigo ang katahom.
Dili na ikaw makapahilom nako sa kapula
Sa gagmayng dahon nga tagokon sa pagbuka.
Kahibalo ko sa akong nasayran.
Init ang adlaw sa akong liog samtang gamatyag ko
Sa mga tunok sa crocus.
Humot kaayong simhoton ang yuta.
Dayag nga wala’y kamatayon
Apan unsa’y kahulogan ana?
Dili lang kay ilawom sa yuta ang utok sa mga tawo
Gikaon sa mga ulod.
Ang kinabuhi sa iyang kaugalingon
Wa’y yamo.
Wa’y sulod nga tasa, hagdanan nga wa’y alpombra.
Dili paigo nga matag tuig, lugsong niining bungtod,
Ang Abril
Moabot sama sa buringog, gayawit ug gasabwag og mga buwak.


(Hubad sa balak ni Edna St. Vincent Millay)


-- MICHAEL U. OBENIETA
Topeka, Kansas, USA

magtiniil ko kon manginhas















(tubag sa balak "Sa Imong Paghilak" ni Raul M. Figues)


Inig hunas unya
Manginhas ra gihapon ko
Nga magtiniil. Pasagdi lang
Kon motyabaw inig
Katunok sa nagtikangkang
Nga mga tipaka
Sa mga kinhason
Nga hagbay rang gibiyaan
Sa mga umang, o kaha
Masamad sa mga sisi,
Nagpangamay, nagsiwil.

Unsaon, ampay man
Ang init-init ug halang halang
Nga sinabawang kinhason
Pakapinan og lawom,
Dili matugkad nga pahiyom
Sa akong tupad.


-- GINA MANTUA-PANES
Cebu City, Philippines

4.16.2010

ambayan
















Pagpamalak—
apan unsa man gyud nga matanga sa butang kining pagpamalak?
Mas daghan kay sa usa ka tay-ugong mga tubag
ang nasukamod gikan pa sa unang higayon nga kini gipangutana.
Apan wa ko kini hisayri ug wa ko hisayri apan mokapyot ako niini
nga ingon sa usa ka lumoluwas nga ambayan.
-- hinubad gikan sa balak ni Wislawa Szymborska

Sa akong pagsaka-kanaog
sa hagdan
sa akong mga adlaw,
ako usab nga gikinahanglan
ang samang ambayan.

Ambayan—
nga akong kagunitan
sa samang kahugot,
bisag hawan ug way makasabod,
bisag basa o danglog,
o puno sa mga abog
ang mga ang-ang.

Ambayan—
nga bisag way amihanan o habagatan
way silangan o kasadpan,
mosilbing usa ka aguhon*
nga motabang pagtultol
sa tumong nga akong gipadulngan.

Ambayan—

nga sa higayon nga ako mahulog
ug ipadpad sama sa usa ka gamay’ng dahon,
Dali kong kakuptan
Sa akong pagbangon.

________________________________
* aguhon: compass

-- URIAS A. ALMAGRO
New Berlin, Wisconsin, USA

tugpa
















sa imong paglupad
mahimong mapadpad ka
bisan asa

apan timan-i ang bayhon
sa kapunawpunawan
nagbabag


-- RAUL M. FIGUES
Oslob, Cebu, Philippines

4.15.2010

tugon
















Kon pananglit
Mauna ko nimo
Ayaw ikahinugon ni ikasubo
Ayaw pagbangotan
Inayanaya lang hinanali kong pagtalikod
Pagpakaaron-ingnong ako nagbakasyon nagsabatikal lang
Sa hilang dapit way adres ug ngalan

Sa damag kapulihay moapas ka ra kanako
Ayha ipatugtog ko theme song ta
Motuhop manganaykanay
Sa tagboanan sa langit ug purgatoryo
Sa pagsugat ko kanimo mahal
Unya hapnigon andamon ko atong naandang higdaanan
Sa pikas lawak sa laing kalibotan


-- MELQUIADITO M. ALLEGO
Palm Harbor, Florida, USA

alimyon sa kalipay
















Talisalop kadto, usa ka Sabado,
didto sa Cagayan de Oro, diin
nangluspad ang ngabil sa adlaw.
Gikawras sa mga bituon
ang aping sa langit.
Giliyok-liyok ang buwan
sa panit sa kangitngit.

Ug sa dihang nilayag nako sa barko,
Nakalimot ko nga wa naman diay laba
kining akong sinina sukad gikamit ko ni
didto sa Timoga.

Ug kalit lang, nakighagwa ang mga lakrang
katawa nga namilit niining panaptona,
diri nahisayran ko nga ang kalipay
adunay alimyon, ug kini nisuksok
sa kinasuokan ning dughan.

Apan kalit lang pod gikusokuso sa kabugnaw
sa hangin ang akong paghandom.
Dayon kini gihumol sa akong paglantaw
sa nagbuwang dagat hangtod kini
giwaswasan sa uwan.

Sige lang, daghan pa man diri sa bag
akong mga sinina nga wala pa gilabhan.


-- CINDY VELASQUEZ
Cebu City, Philippines

4.11.2010

ewing galloway
















salamat sa imong kakugi
Ginong Galloway
gitandog ang linghod kong kabuot
sa imong mga hulagway sa nagkalainlaing
talan-awon sa kalibotan

mga siyudad monyumento
bangis nga mananap busay sapa dagat
magpapatigayon mangugubat
prinsesang gitaptapan
og nga mga dayandayan

maninoy ug magtutudlo
tungod kanimo nakabaton akog pagtahod
sa katingalahan
ug nagdako nga walay kahadlok
sa dili katuhoan


-- VICENTE VIVENCIO BANDILLO
Koror, Palau

panihapon


















Unya sa inyong kataposan
Nga panihapon,
Buot ko untang moduol,
Magpahipi duol ni Nyor Juan
O kaha ni Dodong Hudas
Nga way puas sa paghinol-hinol
Sa iyang puntil.

Magkamang ko
Ilawom sa talad kan-anan,
Maghangad, maghulat
Iyawat mabisbisan.

Intawon pasayloa
Kining kahangol nga mapiskan
Bisan sa laway
Salin sa bino
Nga gipabagting sa tagay
Atol sa tinghuwaw
Sa akong kasingkasing.


-- GINA MANTUA-PANES
Cebu City, Philippines

4.10.2010

tultol balik sa ting-ulan
















Wa’y gibudhian ang wa’y kalibotan.
Dili siya angay bitayon sa kampanaryo
kon wala siya’y pagtahod, dili kahibalo
moluhod. Ayaw siya ihagbong
sa atabay nga gitabonan hagbay ra,
ug gilapasan sa mga amorseko
luyo sa simbahan. Wala siya’y labot

sa kauhaw ug sa atong giambitan
nga kainit pagtunlob sa atong mga tudlo
sa bendita, dayon og panguros. Kita ra
ang wa natagbaw sa tagiptip
sa atong tutonlan taman sa panghupaw.

Wa’y makaluwas nato kon
kutob ra ta sa pagpasilong, galikay
sa gahubo nga libod-suroy. Tan-awa.
Wa’y panginlabot nga dakdakan
sa dag-om ug kilat, gakisikisi siya
sa kahinam lapaw sa nahagsa
nga katugnaw. Wa’y laing nailhan
nga labing mahinatagon—gaawas-
awas ug sarang na nga santoson—gawas
sa iyang gihangdan nga sandayong.


-- MICHAEL U. OBENIETA
Topeka, Kansas, USA

realidad
















i

nahimo siyang baki
sa dihang gihagkan siya
sa iyang asawa

ii

mahibalik lang
ang iyang pagkaharianon
kon siya higugmaon
sa iyang kabit

iii

naglagot siya
kay nipis na kaayo
ang iyang pitaka


-- RIC S. BASTASA
Katipunan, Zamboanga del Norte, Philippines

4.09.2010

ang tunog sa kampana

(gikan sa balak ni
Yannis Ritsos
)













Banagbanag-- ug ang atong mga lampara nanagsiga pa.

Almagre nga gisagolan og dyutay’ng kabughaw.
Igsusunog, kape, ang baho sa pagkabahaw,
ang panuigon. Mga baraha nga nagkatag sa tanang dapit,
nanagsugwak nga mga ashtray. Mga babaye, mga lalaki,
mga hardin, mga libro-- nia karon sa usa ka minuto,
unya mahanaw. Mahanaw. Ug kadtong lagingling
nga imong nadungog sa wa pa ang kaadlawon dili koreyo,
usa lang ka masulob-ong gamay’ng karnero nga giguyod
padulong sa ihawan.


Gihubad ni:
-- URIAS A. ALMAGRO
New Berlin, Wisconsin, USA

sa imong paghilak
















Ubos sa imong ilong
dunay kanal. Sa di madugay
molugsong diha ang dagat
ug ang mga balod mabanlas
sa imo unyang isugilon.

(Inig hunas, palihog lang,
ayaw na intawon
pataka’g panginhas.)


-- RAUL M. FIGUES
Oslob, Cebu, Philippines

4.04.2010

si anna inig edad niya’g kuwarenta
















Dili na kuno siya gukoron sa mga gutlo
Inigsawop sa Adlaw. Kada kinsenas
Dili na siya magpakaarong-ingnong
Labing matahom luyo sa baga nga meyk-ap
Ganahan siyang mobiya sa Avenida
Aron kabutangag espiritu sa tawo ang
Haw-ang niyang anino. Naluya na kuno siyag
Pasalipod sa mini niyang hitsura— mga eskina
Nga gikudlisan sa nagngadto-nganhi matag dulhog
Sa kagabhion. Nangandoy baya kuno siyag simpleng
Bahakhak, kanang dili kuno sinaktan
Og mga pagduhaduha unsa ang kapalaran
Sa sunod ugma kon pananglit sugdan
Na sad og bugalbugal sa katuigan ang iyang
Agtang. Dugay-dugay na gyod kuno siya
Nga wa kasuway og hilak. Ang iya kunong
Mga kasakit iya man lang ikatawa
Nangandoy sad kuno siya nga matag abot
Sa nanagdukang mga banagbanag
Wa nay kahadlokang polis ug hubog nga parokyano
Monipis-nipis na sab unya kuno ang kubal sa iyang
Sabakan nga, sulod sa baynte singko ka tuig,
Gihimong tighinlo sa kasal-anan sa kalibotan.


-- OMAR KHALID
Medellin, Cebu, Philippines

papas: litanya sa maestrang mangtas
















Na hala,
Karong buntaga
Lamyon ko ang tanan:

Ang inyong "May I go out,"
Ang mga nagpahipi
Ninyong balikas
Nga karon
Kalayaton padu'ng
Sa akong dagway,
Ang mga katuwaron
ninyong panghuy-ab,
Ang galupad-lupad
ninyong mga huna-huna
sa tunga-tunga
Sa nagkalandrakas
ninyong zero,
Kay nasabyagan
Sa nagkadugong
"I don't know, Ma'am."

Sige, ihurot ang tanan.
Iapil ang mga nangapan-os
Nga kasaba ni mamang ug tatang
Sinambogan og tunglo.

Kay unya,
Sa pagpamauli ninyong tanan
Manghilam-os ko atubangan
Sa blackboard,
Papason ang tanan
Sa parat-parat nakong
Sip-on.


-- GINA MANTUA-PANES
Cebu City, Philippines

4.03.2010

giunsa namo pagpakabuhi
















Matag hapak sa huyohoy mosamot kabug-at
ang among mga tabon-tabon. Ang adlaw
motugdon sa mga dahon sa pagatpat sa likod
sa balay. Inighagtik sa unang patak sa ulan,
mahipugwat kami ug magtinan-away, dayon
maglumba paingon sa bintana kay mag-ilog
kinsay unang makakita sa daklit nga bangaw.


-- VICENTE VIVENCIO BANDILLO
Koror, Palau

agnostik
















Di modawat adunay labawng makagagahom
Kay way naluwas
Sa nahagsang ayroplano

Kon adunay makalingkawas
Human sa linog urakan bagyo
Lunop tsunami baha tornado

Sunog hulaw pandemik
Nagkalidades katalagman
Mopasumbingay kayha adunay magbubuot

Unsang klaseha pagkalinalang?
Unsang matanga pagkamananap?
Way landong ni aninong nahitaligam-an.


-- MELQUIADITO M. ALLEGO
Palm Harbor, Florida, USA

4.02.2010

lunes sa usa ka ulipon, ug ang laylay duyog sa gakagot nga ngipon
















Natagpilaw ko hangtod didto
sa usa ka gingharian diin ang labing malapason
mao’y giludhan. Nahisulat ang iyang mga balaod
diha sa mga tabanog.

Gabon sa mga balili ang singot sa manag-uyab
nga wala mag-ibot. Unsaon pag-ihap sa kidhat
sa mga aligato? Nagpahipi ang mangangayam,
namuwaw. Matag lusok sa iyang laway ug singot
gisawo sa kamot sa orasan.

Buta ang mga langgam. Nangatagak tagsa-
tagsa sa akong tabontabon ang kabugnaw
sa ilang mga balhibo--mao’y hinungdan

sa hinanali kong kahigmata.



-- MICHAEL U. OBENIETA
Topeka, Kansas, USA

mga tipak: mga mubo’ng balak
















1. Mga Tipak

Ang tanang butang
ning atong kalibotan mangabuak.
Kining atong kinabuhi
way lain kon dili
ang pagpamunit ra sa mga tipak.

2. Pultahan

Sama’ng pultahan ang agian mo

sa imong pag-abot.
Sama’ng pultahan ang agian mo
unya sa imong pagbiya.

3. Hinulaman

Ang sin-ag sa ibabaw sa waytimik nga linaw.
Ang bulawanong silaw sa bulan.
Ang mga gutlo ning atong panag-uban.
Ang atong kinabuhi.

4. Kahilom

Ang imong kahilom usa ka antulang.
Hugot nga nagsira. Buot kong ukbon
kay basin baya’g sa iyang pilak nga sulod
dunay hikaplagan kong usa ka perlas.


-- URIAS A. ALMAGRO
New Berlin, Wisconsin, USA

Daghang salamat sa mga maniniyot nga gapaambit sa ilang mga hulagway sa Google ug Flickr.