5.30.2010

dili ako ang nagsulat ning balak
















may anino nga miyuhot sa landong
gimino ang nagdukdok sa mga tekla
gilamat pagkunsad sa hungihong
gikan sa espirito santong tugahala


-- MELQUIADITO M. ALLEGO
Palm Harbor, Florida, USA

mga bintana ug mga pultahan
















mas nindot unta kon ang mga bintana
sama kalapad sa dagat
ug ang mga pultahan
sama kakipot sa mga liki
sa pangpang aron dali
ang paglupad sa hunahuna
ug lisod ang tinagoan sa pagpahawa


-- RIC S. BASTASA
Katipunan, Zamboanga del Norte, Philippines

5.28.2010

pagpamalak
















Niadtong higayon nga didto ka sa ngilit
sa kataposang paglalin,
akong nasulat ang usa ka balak.
Apan wa ka mahinayon sa imong pagbiya
ug hangtod karon nagpabilin.
Maong, bisag labing manindot,
akong gigisi ug gilabay kadtong balaka
kay di na man matuod.
Ang pagpamalak mao
kadtong nindot nga mga pulong
nga akong gilabay, aron wa nay lain pa,
lakip ikaw, nga makabasa.


-- URIAS A. ALMAGRO
New Berlin, Wisconsin, USA

mga balak ni lolo menes
















Ang mga balak
Sa akong Lolo Menes
Sama sa among kabaw
Dili angay igaid
Sa bisan asang punoan,
Pasagdang manibsib
Sa kabalilihan
Bahalag masangit
Sa mga sampinit
Kay sayod si Mamang
Mobalik ra gihapon
Ang kabaw ni Lolo Menes,
Magdalag pinupo gikan
Sa kakugnan aron ihalad
Sa lunangan.


-- GINA MANTUA-PANES
Cebu City, Philippines

5.26.2010

kaminyoon
















Managlahi gayod, ang lalaki
Ug ang babaye:
Sapa nga gadagayday
Sa umahan.

(gikan sa Iningles ni William Carlos Williams)


-- VICENTE VIVENCIO BANDILLO
Koror, Palau

5.25.2010

pangampanya
















Samtang nanampiling gahapon
sa hagdan sa iyang payag,
giduol siya'g kandidato,
gihataga'g papel
nga wa niya masabti
samtang siya giawhag:
"Botari ko, nong, ha!’

Nagsakit iyang tiyan ganiha
ug karon nagpasalamat
kay duna na'y makumot
didto sa kasagingan
alang sa iyang sampot.


-- ROMEO NICOLAS BONSOCAN
Carcar, Cebu, Philippines

5.19.2010

metamorposis
















ang mga diyosang kandila nga gipang-ugbok
sa balisbisan sa pantiyon nga kagabhion
tagsa-tagsang nangapalong...

ang kaganinang naghagok ug nagbuy-od
nga blunda sa kadulom nahimong palispis
sa ugis nga kahayag nga nanghuyatid sa suwambi...

ang maninintal nga kidhat sa mga bitoon
dili na makawhat sa madibuhoong mga mata
kay ang kaambong gipamala na sa pisara sa langit...

sa balkonahe nangatagak ang mga pako
sa mga siawan ug latagawang bulalakaw
ug gipamunit ang mga tipaka sa ilang kasugiran...

sa asoteya nangiswid ug nanghuy-ab
ang mga parayegong gihay sa mga senyoritang bulak
nga nangaligo sa yamog sa nangalimyong kadingding...

tala na bathalan-ong kalagpares manglimugmog
himamaton tang luming saloma sa adonis diwa
nga nanighawak sa taluktok sa gabonong mga bungtod...

mapahiyomong nagsidlak og mga sedang bulawan
ning matahom hardin sa samuyawng kinaiyahan
ning mahumot paraiso sa nanglunong bulakbalak kausaban...


-- MELQUIADITO M. ALLEGO
Palm Harbor, Florida, USA

sa baybayon
















pipila ka dahon
nangahulog sa punoan sa pitogo

init na ang hangin gikan
sa Sta. Catalina

lubog kaayo ang dagat
sa sayong kabuntagon

kusog kaayo ang ulan
sa miaging gabii

nagbaha na usab sa Diwan
nahinangop ang baba sa bukana

daghan ang moabot
mga siwil mga binhi mga sagbot

namantsahan ang dagat
sa lama sa tanang bukidnon

ang taga Suba nanugsok
sa mga pulak

dinhi miturok sa akong hunahuna
ang bag-ong binhi kinabuhi


-- RIC S. BASTASA
Katipunan, Zamboanga del Norte, Philippines

5.18.2010

ang krus ni magellan
















Sa abaga sa syudad sa Sugbo
Nagpabiling nahimutang
Ang krus ni Magellan.

Ang bato’ng bungbong
Sa gipasilongang kyosko
Dunay mga liki.

Sa iyang tiilan,
Sa nagsagol nga abog ug lapok
Nagpadayon pagdilaab
Ang mga kandila.


-- URIAS A. ALMAGRO
New Berlin, Wisconsin, USA

kinanaas
















Sa laing mga kamot
Nga andam
Mopandong nako
Mopasilong ko,
Mohangop sa pagkagiw
Sa mga kinana-as
Sa miaging kalibotan.


-- GINA MANTUA-PANES
Cebu City, Philippines

5.17.2010

usa ka adlaw, duha ka dimalas
















Banagbanag


Nasabod ang tinan-awan
nga imong gipakamang sa dunot nga banggira,
ug dihadiha mialibwag ang mga antulihaw.

Kilumkilom

Napalgan gihapon sa hangin ang mga tunob
nga didto motago ilawom sa ginuba
nga dapat sa imong barungbarong.


-- VICENTE VIVENCIO BANDILLO
Koror, Palau

unya, sa di madugay
















Bugnaw
Ang hangin
Init
Ang kape

Hilom
Ang katawhan
Banha
Ang kinaiyahan

Sayo sa buntag

Gikaligo ko
Ang
kataposang kabo
Sa tumang kamingaw

Antos gamay
Unya, sa di madugay
Tapisan ako'g
Mga gakos ni nanay

Ang cattleya, ang vanda
Mamuklad
Sabay kaming
Sa adlaw manghangad

Unya, sa di madugay
Ako mopauli na
ngadto sa Kidapawan.


-- PAUL RANDY P. GUMANAO
Kidapawan City, North Cotabato, Philippines

5.16.2010

panawagan sa gugma
















Sul-oban nako ang kaugalingon sa imong tingog, imong tingog, ug mogawas ko nga dili magpakita diha sa dalan. Magbarog ko diha uban sa imong tingog, imong tingog sulod nako, ug labyan ko sa mga balay sama sa gikapoy, hapit na malunod nga mga barko. Ug molungtad kini og gatosan ka tuig, gatosan ka tuig, hangtod pulihan sa mga langgam ang imong tingog, imong tingog, aron pahinumdoman ko nga kinahanglan ko nga molahos pagsibog.

(hubad sa balak ni Dubravko Detoni)


-- MICHAEL U. OBENIETA
Topeka, Kansas, USA

makasaysayanong adlaw: 5/12/ 2010
















Nalanay ang usa ka buwan kong pagpaabot.
Nyor, karong adlawa-- ganiha lang gyod,
Nitugpa sa akong tungod
Ang imong gipalupad nga Illuminations
Ni Arthur Rimbaud gikan diha
Sa imong diyamanteng tugkaran
Sa Palm Harbor, Florida. Gipunit ko
Ang Illuminations. Sa akong pagpapha ini,
Mahikanhon kining nigilak-gilak.
Nilagiting, Nyor, ang akong kamot
Samtang gikuptan ko ni. Ug sa akong pagpakli
Sa mga pahina, ang mga balak ni Rimbaud
Nisangyaw og di matukib nga kahayag
Nga nasungasong lang nakog tutok
Sa dihang nipiyong ko.

(pasalamat kang Nyor Mel Allego)

-- KEVIN A. LAGUNDA
Mandaue City, Cebu, Philippines

5.09.2010

mama miling papa dading
















Sa kanunay ako naghandom kaninyo. Sa dili pa ko matulog
sa tungang gabii--- iampo ko kamong duha ni Bathala
nga unta lugwayan ang inyong kinabuhi aron masud-ong
ug mahikap ug mahagkan namo sa among pagduaw kaninyo.

Usahay mangandoy ako nga unta kaming walo nagpabilin
lang mga bata--- magduladula sa nataran sa atong
natun-as nga balay sa Putat magsakaysakay sa Bisaya
ni Gerundio Esmero magtanom mga saging ug lubi
sa atong yuta sa Ibabaw manggukod sa mga bitin
sa Macalbang manughit sa mansanitas atbang sa tindahan
ni Tiya Nene manuroy sa tampi sa sapa sa kasireguylasan.

Matag gabiing bulanon maminaw ako sa inyong duweto.
Oh Lazy Summer Moon. Ug dayon sa pagpamilok
manglugmaw ang mga kay-ag nga lusok sa kahayag.


-- MELQUIADITO M. ALLEGO

Palm Harbor, Florida, USA

nabungol ang ginoo
















ang iyang gipangadye sa matag gabii

disir siya matulog mao nga unta
kuhaon na siya
sa ginoo

kay sa iyang lantaw sa kaugalingon
wala na siya'y pulos
sama sa usa ka kutsara sa kusina
alang sa mga tawong ganahan
magkinamot

apan nabungol na ang ginoo
naglagot siya ngano nga pagkaugma
nakamata siya
nga buhi pa
lig-on pa gihapon ang iyang lawas
naglibog siya nganong
makahinumdom pa gihapon siya
sa tanang panghitabo

nganong ang ginoo
kon gusto ka nang mamatay
gahinan ka man hinoon
og kalipay

naglingkod siya sa daplin
sa ilang hagdanan atubangan
sa karsada daghang milabay
nga wala na niya mailhi apan
silang tanan nakaila kaniya

lahi kining tawhana
gustong mamatay apan
nganong dili na man lang siya
maghikog


-- RIC S. BASTASA
Katipunan, Zamboanga del Norte, Philippines

5.08.2010

kadtong gikanta sa mga timos












"The crickets sing

beneath the flowers."
-- Federico Garcia Lorca

Ang mga timos nagkanta
sa tibuok gabii, daw way tinguha
sa paghikatulog.

Sa tubaan didto sa eskina
ang kasaba sa mga nanag-inom
nag-anam na pagkahilom.

O, ang mga timos nagkanta
sa tibuok gabii.
Ug sama sa usa ka duyan
gitabyog ang akong kasingkasing.


-- URIAS A. ALMAGRO
New Berlin, Wisconsin, USA

mga maleta
















Nagbutod ang tiyan sa mga maleta
Nga gipasandig ko sa pultahan
Gusto moikyas, moluklok
Og balik sa aparador.

Ang mga maleta nagpabug-at.
Natahap.


-- TEODOSIA "Dindin" P. VILLARINO
Toronto, Ontario, Canada

5.07.2010

tagoanan
















wala ko hiabti ang karaan tang balay
usa man unta kadto ka kilometro
gikan sa dagat
apan karon haligi na lang ang migimaw
ibabaw sa tubig nga nagpanilap
sa sementadong kalsada
nga mao na karon ang lapyahan
pila na kaha ka tuig ang milabay
sukad sa kataposan kong pagduaw
gayod dili kapugngan
ang dis-og sa baybayon
morag kagahapon lang
nga basolon ko ang akong inahan
nganong wala niya ako pukawa
sa wala pa mosilang ang adlaw
karon ania ako
kunot ang agtang nga nangutana
sa kaugalingon
nganong wala dayon ako makaamgo
nga kining halapad nga hunasan
maoy diay ang tagoanan
sa ligoy kong panumdoman


-- VICENTE VIVENCIO BANDILLO
Koror, Palau

ikaw
















gasang gikulit
sa akong kalibotan nihingpit
apan sa imong paggikan
natun-as ang tanan


-- GINA MANTUA-PANES
Cebu City, Philippines

5.06.2010

ang haibun nga ningtugdon sa akong hubon usa ka dominggo sa buntag
















Luwak sa bintana sa lawak, walay timik ang adlaw gawas sa kisaw sa maple sa atbang kansang mga dahon gihagwa sa kinanaas sa squirrel. Ang tun-og nga anino sa hamog sa kaadlawon nihangop sa kaunoran sa dihang giablihan ko pagtuyo ang tamboanan. Lunhaw sab ang balilihan naghulat sa tinghulaw. Ah, adunay saag nga deer naglungaylungay sa iyang sungay ninglabay. Ug ang panganod, hahay, sama sa simod nagkusmod sa iyang pag-aginod. Sa kalit daw kilat ang pagkisdom sa akong nataran, natimbakuwas akong panan-aw sa usa ka dakong banog nga daw mohakop sa adlaw. Pastilan, sama ba kaha niini ang talan-awon sa umaabot nga pagpangatagak sa mga dahon?

Ulod nagkamang.
Sa pagsakdap sa langgam,

langit nalisang!



-- NOEL D. RAMA
Accokeek, Maryland, USA

kon hiktan nako ang bulan
















Kon pwede lang untang talian ang bulan,
kaw-itan ko kini'g pisi ug ihikot sa haligi.
Ipaguyod ko ang akong payag sama's kangga sa kabaw,
ug salmotan ko ang bulan sa iyang paglatagaw.

Mohangad ako.
Lili-on ug ngisihan ko siya
gikan sa gamay kong bintana.
Makapamalandong ako.

Tuod, wala ako'y bitoon
apan higala kami sa bulan.
Ipaguyod ko pa ang akong payag
Ug ipaguyod ko usab ang akong kalag

sama sa kanggang sakyanan sa mag-uumang
nangandoy makakaplag og kapahuwayan.
Tultulan ako sa bulan sa iyang tagoanan
sa mga higayong masilawan siya sa adlaw.

Hatagan kaha ko niya og bisan gamayng luna?
Dinhi sa kalibotan dili akoa kining yuta.
Taud-taod ipakita sa bulan ang iyang tulomanon,
ang iyang bag-ong porma.

Monipis, moniwang,
mahisama sa garab!
Garab! Sama ka's garab,
higalang bulan! Hait ug talinis.

Hay! Kon pwede lang untang talian ang bulan.
Apan karon, itugyan ko usa ang akong mga damgo.
Ugma, sa pagmata puniton ko ang garab
ug mosakay sa kangga

Pikpikon ko ang kabaw
aron among gukdon ang bulan!


-- PAUL RANDY P. GUMANAO
Kidapawan City, North Cotabato, Philippines

5.02.2010

sa kagabhion samdan ang mga rosas
















Sa kagabhion samdan ang mga rosas
gidunggab sa hait nga suwab sa bulan,
sa pagkabuntag gibukhad nila
ang mga samad nga mga biyuos
ug ialibwag kanato ang nagkadaiyang bulok
pula, dalag, puti, pula-pula,
pagkanindot sa mga rosas, pagkalugdang
sa ilang tingog nga sa kanunay bag-o sa atong paminaw,
atong simhoton ang makalumos nilang kahumot
atong igasa sa tingkasal, sa mga adlaw sa gugma
ug iladlad sa kalye sa mga nagpasad nga gipamusil
ilang hagwaan ang mga lubnganan
diha sa kilid sa bungtod
diin naglakaw nga nagkinuptanay ang managhigugmaay
nga nangitag kamingawan.


-- ESTER TAPIA
Kathmandu, Nepal

hulagway sa pagsaulog
















Gakayab ang mga banderitas.
Ang kasadya wala’y kutas.

Ang letson nagbuy-od sa lamesa:
Gipangtawag ang mga bisita.

Sagad mga beata ra ang gapanon
Luyo sa karaang karo sa patron.

Kay ang uban tua na sa sabongan,
Kay ang uban tua ra sa diskohan.


-- ROMEO NICOLAS BONSOCAN
Carcar, Cebu, Philippines

5.01.2010

mga tipak: mga mubong balak
















Mga Bituon

Sa gabii,
sa di pa ako mopiyong
akong sud-ongon
ang ginatos ka mga bituon.
Sa banagbanag,
sa akong pagmata
mao ray akong sud-ongon
ang Kabugason.

Sulod Sa Usa Ka Pinitik

Dili ako mangayo
og usa o lima o daghang mga tuig
nga ikaw makig-unong kanako.
Igo na nga ako makigsalo
sa usa ka pinitik sa imong kasingkasing.

Ang Akong Mga Balak

Ang binhi
ning akong mga balak
tua ko ipugas sa imong yuta.
Kon motubo ug mamunga,
imo ug dili akoa ang mga maani.

Sag-ob


Kon imong tan-awon
kadtong tawo’ng nagpas-an
og sag-ob nga kawayan,
dili lisod mong ilhon
kon ang sag-ob duna ba o wa bay
sulod nga tubig.


-- URIAS A. ALMAGRO
New Berlin, Wisconsin, USA

sa unang higayon
















mohalok
sa pagpaubos
ang akong mga tuhod

mag-akob
kining akong nagsanga
nga mga palad

mokalawat
dayon akong tunlon
ang buwan


-- RAUL M. FIGUES
Oslob, Cebu, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.