8.25.2010

ang kampana sa tore
















Nganong masulob-on ang pagbagting sa kampana?
Ang iyang tim-os nga taginting mikuyanap
Sa lungsod gikan sa tore sa simbahan
Ngadto sa abohong mga atop nga nangluspad
Ilawom sa mansadong buwan
Sa pagtuyok sa ngipon sa plata nga orasan.

Tungod ba kaha sa kabugnaw sa yamog
Nga migakos sa puthaw?

Ang pana milahoy sa kangitngit.
Ang binaid nga tagming mitaop sa akong dughan
Pino nga kahait
Mobuswak ug kahigwaos,
Ang hardin sa mga rosas miawas sa alimyon
Sa matentalong kasubo, madanihong kasubo.

Ang lumotong ang-ang sa hagdan midawat
Sa tunob sa kampanero nga nanaog sa tore.



-- ESTER TAPIA
Kathmandu, Nepal

2 comments:

M said...

ester,

makatagbawng balaknindot.
Kamong tolo:Cora, Ester & Merlie
(CORESTMER) maoy literary triad
sa tadhang female poetesses sa natad sa Katitikang Bisaya.
Sa mga batan-ong sumusunod: GENI-GENA-GINA: Neile Genica-Mijares
Genalyn Omapas
Gina Mantua-Panes
-mananambalak

M said...

akong i-add si JONA, akong katagilungsod.

JONA-GENI-GENA-GINA.

Sorry nga nalimtan tika, Jona.
Kining giango-ango nang nagyupyop
sa tinustos ug hapit na mahulog
ang hinulamang pustiso.

Nindot king balak ni Ester: Ang Kampana Sa Kampanaryo

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.