9.09.2010

kabahin sa hinawayon nga gapaila sa iyang kaugalingon nga “way alimpulo”
















Basin gituboan og bulbol ang iyang pahak.
Mao tingali
nga bisan gapangiyod siya nga ilhong
maayong laki—
lanog ang bahakhak ug bagulbol
pakapin sa pangulihad—
dayag nga kutob ra tawon siya
sa hupo-hupo, kuwang na lang
ipandong iyang bahag.

Basin gikuto pod iyang bangas
ug kilay.
Kon mao, dayag ug ayaw na lang kahibulong

nganong wala siya’y dagway ikaatubang.

Basin galukdo
siya gihapon sa iyang bukol.
Sa una, niuntol sa iyang ulo
ang iniduro dihang
hubog nga nanghagis kay wala siya padayona,
gihinginlan sa giharanahan nga hagbay ra
nakasimhot sa iyang tinagoan
: bisan unsaon niya
paghiso og pahumot sa iyang hinapay, lupig pa niya

gapomada og tiktik sa iyang pagkapisot.


-- MICHAEL U. OBENIETA
Topeka, Kansas, USA

1 comment:

M said...

A masterful choice of belittling and
ridiculing words
Satire at its best
Ang agtahigante
nahimong inanoduwende
Akong saludo,

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.