dihang ga-brownout usa ka gabii

Nabadbad ang ginaid nga balikas 

Gikan sa alingagngag sa akong amahan.
Nagpamati lang sab sa mga mosunod nga esena 

Niadtong gisundan namong' gubat nga salida. 

Ang kaguliyang nga namugna 

Tungod sa kalit nga paghikyad sa kangitngit 

Nakig-indig sa nagkayuring nga suliyaw sa mga gangis. 

Migawas ko ngadto sa among nataran 

Ug midagkot og sigarilyo. 

Sa akong pagbulhot-bulhot sa aso, 

Maoy akong nayanghagan 

Ang naingo’g ayagan nga bayhon sa buwan 

Nga mao pa'y pagsubang didto sa silangan, 

Ang wa'y sukod nga wanang 

Diin nagpunsisok ang mapiratong mga bitoon, 

Ug ang mga aninipot nga naghadla- 

Hadla sa may mansinitasan sa akong tungod. 

Didto sa balay sa akong apohan, 

Atbang sa amoa, 

Ang kundiman sa radyo

 Miharana sa nahilom nga kagabhion. 

-- IOANNES P. ARONG 

Lapu-Lapu, Cebu, Philippines