1.07.2011

lamat sa las vegas
















Wala’y luna ang luha dinhi sa karaang disyerto. Taliwala sa lunop
sa mga turista, bisan ang makililimos duol sa Caesar’s Palace—
gakwentas og kwadradong karton nga gisulatan sa iyang pakiluoy
og hinabang aron kuno siya makauli didto sa ilaha sa Wyoming—
dili minghoy. Hapit gisud-ipan dihang gisitsitan niya ang dalaga
nga lupig pa’y gidaman, nasaag gikan sa banyo. “Hot,” sangpit pa
sa karaho, “What’s your name, miss?” Wala siya tagda samtang
nakay-ag ang kilumkilom sa kundat sa mga dagitab nga labaw pa
og pagawal sa bangaw. Nibalit-ad gikan sa linaw sa tugkaran
sa Bellagio, nakigbayle ang tubig, nibusikad duyog sa gahaguros
nga huni. Sa atbang, layo apan tugbang sa gamingaw nga tingog
ni Piaf ang layaw nga kahayag sa Eiffel Tower. Ay, ayaw pamilok.
Basin dagiton ka sa kidlap sa camera samtang makigdumog anang
gakampat nga bawod sa pasundayag: Galutaw nga gondola sa sapa-
sapa sa Venetian. Langit-langit sa Palazzo. Tuliyok sa tsubibo
luyo sa New York-New York gikan sa gingharian sa Excalibur.
Piramidi sa Luxor. Giduslitan ang huyohoy gawas sa lasang diha
sa lobby sa The Mirage Hotel Casino. Gahuwat sa kainit gikan
sa imong bulsa ang mga tigsundog nilang Super Mario Brothers,
Spider-Man, Michael Jackson, ug Elvis Presley. Wala’y nilingi ni
Marilyn Monroe, wala’y maskara batok sa kunot, kagot sa ngipon,
ug pahiyom. Wala’y luna ang luha dinhi sa karaang disyerto.


-- MICHAEL U. OBENIETA
Topeka, Kansas, USA

1 comment:

M said...

the tourist poet covered
all the bases
interesting and popular tourist
spots in the city that never sleeps
after reading this poem, you
have a bird's eye view of las vegas
if not a deja vu of magical
proportion.
Very High Triple A rating.
National Geographic Award Winner.

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.