3.23.2011

panginhas sa taobon


(kang Nyor Mel, sa iyang adlawng natawhan)

Maayo gani kay gitunolan ko nimo’g
Gapnod sarang kaabyan
Maayo gani kay gihatagan ko nimo’g
Piniling kinhason, masinawng kinhason
Aron ingnon nga ako, kunohay,
Kumagat nang manginhas.

Abi ko man kadto'g halayo kaayo ang
Lapyahan, ug halayo ang padulngan
Ug ang tungdonon sa unahang payaw—
Mao lay mga balod sa katugnaw.

Sa witik sa imong pulong
Ang dagat mora'g andam magpaulipon.


-- OMAR KHALID
Medellin, Cebu, Philippines

5 comments:

m.u.o. said...

Happy Birthday, Nyor Mel! Gikan sa imong e-mail, kining soneto ni F.CIELO AGANORIO usa ka pagtagay ni Omar Khalid duyog sa iyang balak:


Sukad sa imong pagkahimugso
Niining lunhaw nga kalibotan.
Nagsubay na sa ugat ug dugo
Ang nagdilaab mong salabotan.

Saysentay-siyete nga katuigan
Ang gihalad mo sa imong dagang.
Mga pamalak nga dinuyogan
Alang sa batan-on o tigulang!

Bisan kadiyot lang nga panahon
Kitang duha nagkulukabildo,
Ang imong dahon ug akong dahon
Sa usa ka sanga nag-umido.

O Amahan sa Modernong Pamalak,
Dawata ang akong balak-alak!

M said...

Dear Myke, Richel & Cheeno,

Daghang salamat kaayo.
King kasingkasing gabuhagay
Sa dili matukib kalipay
Ginoo naa kaninyo.

-NyorMel

Archimedia Labs said...

maayong adlawng natawhan, nyor mel! tagay pa!

Litoux Camus said...

maayong adlawng natawhan diha kanimo nyor mel! to your health! salud! - erik (in behalf of the nomads)

M said...

erik & nomads & archim,

salamat sa adlaw-natawhang panghinaot
resulta: morag nabatan-on daw napotot

ania ako sa salagbao
nagyarok alak sa mga damgo


-nyormel


Daghang salamat sa mga maniniyot nga gapaambit sa ilang mga hulagway sa Google ug Flickr.