5.05.2011

bakaybakay*


Mitaak ako sa hunasan.
Niadtong daklit nga kalibotan
sa mga bato ug mga lusay.
Midayon ako sa pinuy-anan
sa mga bunog, mga kasag, mga tuyom.
Unya sa hinay kong paglakang
sa humok nga balas ug bunbon
akong ningsindolan
ang usa ka bakaybakay.
Gipunit ko ug akong gitan-aw
ang iyang bukobuko ug ang iyang tiyan.
Ang iyang lawas gahi ug tuskig
daw bato’ng patay.
Apan didto sa iyang tiyan
akong nakita ang hinay’ng paglihok
sa daghang mga gamay’ng gaway.
Nagtimaan nga siya buhi sa kanunay.
Gibutang ko siya pagbalik
ngadto sa mabaw’ng tubig.
Ug unya sa akong pagdungaw
nakita ko ang kasin-ag sa langit.
Hayag pa ug wa pay mga bituon.
Apan didto sa tin-aw’ng tubig
akong nakita nga kadtong bakaybakay
usa ka bituon
nga nagbaton og kaugalingong kasin-ag
nga nagtanding
sa aninag sa langit.


* starfish

-- URIAS A. ALMAGRO
New Berlin, Wisconsin, USA

1 comment:

M said...

adunay bitoon sa dagat
sa langit
nabanlas bitoon sa lapyahan
adunay pilipino
sa matag suok sa kalibotan
napadpad sa tingusbawan
tabunon mubo
madamgohong bitoon

analohiya vers libre
urias almagroesque

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.