6.06.2011

pag-inusara


(paghubad sa inenglis nga balak ni Michael Carlo C. Villas, gikan sa 35 mm transparency ni Russ Osterweil nga Gay Pride Parade ’03, San Francisco, USA)

Politika ang gadala nato diri, gauban.
Way kaso kon unsang tuiga, o asa,
unsang dalana, ang pagkanta’g
“Kagawasan!” Gawasnon kita
sama sa bangaw nga bandera, gawasnon
sama sa konfeti nga nangahulog sa ulo
sa mga gabinabayi’g sinina nagsayaw sa utaw-utaw.

Way kinahanglan og mga banda, megapon,
gadahunog nga stiryo aron ibandilyo
kon unsa kita kagawasnon.

Gawasnon ‘ta kay
kita sayod gayud
sa atong tinag-iyang
pagtinagsa:

Gahapuwap ako sa imong tangkogo,
kinadul-an diha, diin ikaw da
ang makadungog kanako
dinhi niining makabuang nga katapokan:

Walay lain gawas kanatong duha. Walay lain.


-- MARJORIE EVASCO
Manila, Philippines

1 comment:

M said...

balakpolitika
apasumpay "sa pagsugod
sa akong pag-inusara"
ni katipunero ric bastasa.
kudos. we should have more of this
riveting poem beyond mundane
existence.

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.