9.20.2011

kidhat ug badlis: laguardia airport, new york

Sa pagpasiplat, lipaghong ang napadpad
nga panganod ug daw gadag-om
sa danguyngoy sa mga gangis. Dinhi

sa daplin, gapanagpa ang mga lalis
sa dahon ug daw gaawop ang mga aninipot.
Di madid-an ang pagdakop sa imong pahiyom

dihang mitim-aw ang anino sa kasadpan,
gahulat sa pag-unlod sa adlaw balik sa pusod
sa kagabhion. Sama ining pagduaw dinhi

sa gip-ot nga dughan sa New York City,
kutob ra sab ka nganhi sugod niining
tugpahanan samtang namauli ang tanan

gikan sa ilang panaw. Sa layong tinutokan
tugbang sa langit, diha’y kidhat sa eroplano
mipapas sa badlis sa kapunawpunawan.


-- DENNIS S. SARMIENTO
Maryland, USA

1 comment:

M said...

talagsaon ang la guardia airport.
adunay mga gangis ug aninipot.
least likely but cannot be
entirely excluded due to the
scope and power of the poet's
imagination.

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.