5.06.2012

pista


Mao'y pagtuo ko kaniadto
nga kada adlaw sa syudad—pista!
Kay tiaw ba god na nga kon dad-on ko
ni Mama nga magkubra og sweldo
sa syudad sa Lapu-lapu
kanunay man nilat-ang baboy
among paniudto. Duna usahay
usa ka takos sa dinuguan, usa ka yahong
sa lagpad nga afritada, usa ka platitong ginaling
ug panaksan sa naglasa-lasa pang humba.
Pastilan, matod pang Mama,
panington gyod kuno ko sa duha
ka bandihadong kan-on-humay
nga pinisingan dayog bugnaw nga 8 oz.

Kay sa amoa man god sa isla
makatilaw lang anang mga pagkaona kon pista.
Isda man lang tawn ang madali-dali.
Kasagaran pa gyod kanang isda sa bato,
kanang mulmol nga baska og unod
kon un-onan, tab-ang og sabaw kon tuwahon.
Usahay, manginhas mi’g aninikad ug swake
o kaha mangmata mi’g balisa sa kabakhawan
o mamunit og dawraw sa katunggan kon mag-uwan.
Kon magkulyada, magkilaw la’g dahon
sa kamote o puso sa saging
o kaha magmantinil lag ginamos o dayok
o buwad-pinikas ipares sa kinot nga puto.
Apan utan-binisaya nga sinubakan og bulinaw gyod
ang kanunay namong sud-an.
Lunhaw lakip ang sabaw—
mora mi’g kanding nga sagbot ang kinaon.
Sa bakanteng luna kilid sa among payag
dunay pipila ka punoan sa kamunggay,
okra, talong ug siling kulikot. May naluyong sab
ang mga punoan sa atis kilid sa tabay
kay gikabay-an man
sa alugbate ug kalbasang puwa.
Ug yuna pa, gipul-an nako’g kina-on
anang mais nga kan-on
ug tab-ang na sab kadugayan
ang tam-is untang tubig sa tabay.

Apan diha ko lang naamgo
sa nagtungtong nakos kolehiyo
nga kada adlaw diay sa isla—pista!
Dili tinakos ang hiwa sa inun-unang mulmol
nga amo lang kalingawa’g pana
sa kabatoan sa lapad namong hunasan.
Magdala mi’g bahaw sa dagat
sa mga hunas sa hapon
kay samtang among hagpaton
ang nagpasad nga aninikad,
si Mama ug Papa maghaha og swake
nga ikumot namo sa bahaw
sa dili pa mosaw’p ang adlaw.
Pagkatam-is sa sabaw sa aninikad ug balisa
nga among saw-an sa pagka-ugma.
Ug sa ting-uwan, mag-alirong mi
sa lamesa, magkaguliyang og supsop
sa tinunoang dawraw.
Ang kinilawng’ dahon sa kamote o puso sa saging
ug ang ginamos ug ang dayok
ug ang buwad-pinikas
nga tagana kon magkulyada
sinawsaw man sa sukang pinakurat,
pinug-an og lemonsito ug siling kulikot.
Gihidlaw nakos utan binisaya ni Mama.
Dili naman god presko ang utanon
nga tinda niadtong suki nakong karenderia.
Mora’g nilugaw ilang humay nga kan-on
dunay chlorine ilang tubig.

Ug diay, sa buwan sa Mayo
sa amoa sa isla, kada balay duna’y hikay
matag bisita mopauli nga dunay bitbit
nga cell phone* ug laptop.*

-------------------------------------------------------------------------

* cellphone: siluping puno
* laptop: lapad nga tupperware


-- IOANNES P. ARONG
Olango, Lapu-Lapu, Cebu, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.