8.04.2012

ang hara


Dinhi sa akong lagwerta
Walay sagbot
Nga makalusot
Gawas lang kon pagbuot
Sa usa ka hara.
Inig talidhay sa adlaw
Magpahayahay ko
Dinhi sa akong trono
Diin ako ang ampay
Sa mga gangis nga gatagawtaw.
Ang kalabasa nga gakamang
Usahay gahi og ulo
Dili gayod motuo
Nga ang iyang mga liso
Dili mosanay ning lasang—
Magpahiyom sab kanako
Ang bulak sa Kakawati
Sa panahon sa kilumkilom
Aron mahinumdom ko
Sa katam-is ug kaaslom
Samtang ang mga alibangbang
Dinhi nakigdula sa kahoy
Gatagbaw lang og panguykoy.
Ay, kasingkasing hawoy!

Gitigbas dayon nako
Ang amorsiko nga gakanaas
Lakip sa gakamang nga halas
Kay dinhi sa akong lagwerta
Mao ra ko’g si Bathala
Samtang ang sampaguita
Niusbong diha-diha dayon
Uyon sa mando ning dughan:

Gibuboan sa ulan,
Gihagkan sa bulan.


-- MARIA VICTORIA BELTRAN
Cebu City, Philippines

4 comments:

ღღČяїstinEεїз said...

I noticed some of the poets in this blog is from CNU. Are you a normalite too??

bambibeltran@gmail.com said...

Nope, i am from UP :-)

bambibeltran@gmail.com said...

Nope. I am from UP :-)

bambibeltran@gmail.com said...
This comment has been removed by the author.

Daghang salamat sa mga maniniyot nga gapaambit sa ilang mga hulagway sa Google ug Flickr.