11.04.2012

sa batang nailhan ko dihang naligo mi sa camp bagong diwa


Kon mamugos gyod ka sa imong
pangutana, ingon anion nako pagsulti
aron masabtan nimog maayo:
Ang pag-ambak ngadto sa lim-aw
mao ang pag-angkon sa panganod
ug tubig sa susamang paagi.
Buot nakong pasabot nga gihiusa
ang paglupad ug paglangoy
sa pako-silik mong mga bukton.
Langgam kang mohikyad
sa duha mo ka pako ug timbang-
timbanga ang gibug-aton
sa Adlaw ug Buwan hangtod imo
nang mahangop ang langit—unya, ambak!
Ayaw kahadlok kon buhian ka
sa sapnay sa nipis nga huyuhoy.
Itungtong ang damgo ug pangandoy
sa isig kapikas nimong abaga
ug tabasa sa makusog
nga tibugsok ang kahilom sa kahinam.
Dili ka lumsan sa imong hasang.


-- NOEL P. TUAZON
Dauis, Bohol, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.