11.30.2012

dihang mihukom ta nga andam moantos

(kang MMS)

Wala na kitay mahimo
Kon magmangtas ang haguros sa unos,
Kon maingon ta nga kining mga damgo
Nga atong gipanghapyod taliwa
Sa ngilit sa gabii maoy
Mga inumol sa pagpakaaron-ingnon
Bisan pag sa makadaghan kita
Mihukom nga kini mao lamang
Ang pag-ikyas sa mga maligno ug daman
Lagbas sa nagkurog nga mga dughan.

Nangayo tag mga tambag sa bituon
Apan hakog ang gabii niadtong higayona.
Tingali may laing nangamuyo sa iyang lamdag
Busa minghukom tang pakabililhon na lang
Ang mga gutlo samtang kita
Nagpaabot kanus-a ang dili moabot
Ug sama sa daghang nag-una kanato
Kita andam usab nga moantos.


-- OMAR KHALID
Metro Manila, Philippines

1 comment:

M said...

ready to suffer
and sacrifice
for a late-appearing love.
unsaon ulahi na man kitang
nagkahibalag


-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.