2.28.2012

taliwala sa kaguliyang

Nagbaha sa Pakistan,
Naglinog sa New Zealand,
Gihapak sa tsunami ang Japan,
Nagkagubot sa tunga-tungang Silangan,
Apan taliwala sa kaguliyang sa kanasoran,
Sa gamay nga eskina sa kasaysayan
Nga napatik sa basahon sa kamatuoran,
Gipahunong Niya ang unos sa kadagatan.


-- JON R. SAGUBAN
Iligan City, Philippines

dagom


Pagamay-gamay ka lang
apan lisora gunitan.
Lungag mo pagkalisod sudlan.

Panipis-nipis ka lang 
apan nituasik akong tudlo  
sa usa nimo ka tusdik.


-- JIN GARCIANO
Camotes, Cebu, Philippines

2.26.2012

hagawhaw sa hangin


Gipakgang sa sakit ang akong biyahe
apan ang akong damgo mipaturatoy
paingon sa napagbang kasagbotan.

(gikan sa haiku ni Basho)


-- VICENTE VIVENCIO BANDILLO
Manila, Philippines 

nasaag ang kagang

Nakahil ang langit 
sa dihang gisugat 
ang adlaw sa gabii. 
Taliwala sa huni 
sa lapyahan ug hangin, 
milabay ang duha ka 
langgam, gatuwit-tuwit 
og sumo nga awit 
samtang gaduko lang ko, 
gabadlis bisan unsa sa ba’s. 
Milabay ang borikat 
ug ang iyang kaparis 
nga kagiron, nagkiatkiat 
sa akong atubangan. 


 -- TON DAPOSALA 
Cagayan de Oro City, Philippines

2.24.2012

sugod sa semana santa

abo sa agtang

sayaw sa aso
gikan sa pabilo

nikamang ang adlaw gikan
sa lapokon nga kahinanok
diin gauwan og mga lansang

walay laing halad 
nga dawaton bugti 
sa kangitngit gawas sa piyong 
nga hagit sa paghangad


 -- MICHAEL U. OBENIETA
Topeka, Kansas, USA

ang hinog nga mga pulong


pagkadaghan sa akong mga pulong
nga nangumbitay sa akong dila
morag mga hinog nga bayabas
sa gamayng sanga niini

pagkatig-a sa akong baba
nga dili moabli busa wala koy masugid
wala koy mahalad alang kanimo

sa kaadlawon sa dihang ang mga lamok
nahupong na sa dugo sa akong mga bukton
sa oras nga masulub-on kon matagak ang
usa ka hinog nga bayabas
imoha na kana
wala'y mobadlong


-- RIC S. BASTASA
Katipunan, Zamboanga del Norte, Philippines

2.22.2012

nganong magdugay ko sa glassware section

usa ka tanghaga 
ang kahilom sa naglaray nga 
mga baso kay kon matandog 
kini mokagay 


 -- JONA BRANZUELA BERING
Tuburan, Cebu, Philippines

romancing the rain

Adunay 
mga adlaw nga 
buot kong hinganlan 
ang pagduaw sa ulan. 
Ubos niining balisbisan 
mihabol ang kalibotan 
sa tanang kaanyag 
nga iyang matanyag.                                                                                                                                  
Usahay 
sa kapulihay 
buot ko lang 
unta siyang 
gakson ug tutokan 
sa hungawng ginhawa 
saysayan sa mga                                                                                                                                     
matinud-anong pulong 
nga sa hinanok dili na malitok.                                                                                                                
Sama sa: 
"Ang kasingkasing ko daw biyuos 
nga nagsud-ong sa imong tagaktak 
sama sa nibukhad nga mga bulak 
nagtinguha sa gugma sa Diyos."                                                                                                                  
o                                                                                                                                                          
"Ang suga niining atong gugma, 
nagpabiling buhing kahayag 
awhag nga dili tanang tubag 
gitangag sa hubag nga pangutana."

  
--ERIK E. TUBAN
Mandaue City, Cebu, Philippines

2.20.2012

jet lag


nunot sa 22 ka oras nga pagkiyugpos
pagtikungkong pagminanok sandigtulog
tanggong sa aserong halwa
hala mag-iring-iring na kita sa haruhayng kama
apan pastilan unsaon ang buntag giminong hapon
ang adlaw nagtakobang gabii
nagkabaylo ang siklo ug ritmo
sa sawumsom ug banagbanag
nabali ang telon ug tabil sa kangitngit ug kahayag
poreso samtang ikaw nagtuwad gatutalimbang
mobalintong magpiyong na lang ako kanimo


-- MELQUIADITO M. ALLEGO
 Palm Harbor, Florida, US

linog ug ang kurog nga tingog pagtawag kuno ni Chona Mae


Matamboan ang kinatibuk-an sa dakbayan sama 
sa mga sulom nga tandogon, magkatibulaag.
Sigon sa hisgotanan ilaw’m sa buwan—nanghuy-ab
ang higante sulod sa bulkan,  ug gadaguok ang kahiladman.

Buot mokunsad sa iyang kapuol, naghulat nunot sa pagtakdol. 
Buwan sa Pebrero.  Sa iyang pakig-abyan sa planeta
gawelga ang kalibotan: Gikapoy nako’g tuyok balik-balik
wala ba mo malipong, buntag, udto hapon?

Mikidhat, mikatol ang uwat sa akong matag-tiki,
may talan-awon nga dili na mistil sutaon...
Walay misugyot pipila ka minuto gikan niadto  
kon dili ang pagsayaw sa akong lamesa,
ang paglumoy sa akong batiis ug tiil, 
ang pagtinikling sa akong bolpen.

Nagbilin ug lama ang kalipong, 
liki sa bag-ong tintal nga bungbong
ang anino sa kahadlok gahata-hata 
sa panganod nga gadag-om.

Gikan niadto ang batang si Chona Mae
nga gipangita kuno sa iyang amahan unta nakaplagan na.
Unta makahukom siya nga ilisan nalang iyang pangalan.


-- GENALYN G. OMAPAS
Cebu City, Philippines

2.18.2012

sa pagtungtong nakog sayenta y says


Kon mangutana ka nako unsay gugma
Wala koy tinong ikatubag niana
Mas maayong itandi na lang nato
Pananglitan, sa kahoy sa acacia
Nga molungtad apan mamatay ra
Kon ibton ang gamot o kon linogon
Sama sab kayha sa langgam alimukon
Nga gawasnong makapaturatoy og lupad
Sa mga agianang masukod sa anad
Ug sama sab tingali sa iro kon gamay
Mangitag pagtagad sulod sa balay
Kon dako na bangis nga mopaghot
Ug mopaak sa banyagang kamot.

Apan wala ra kining tanang pagtandi
Kon ikaw nay akong atubangon gani
Ikaw, gugma, ang naghatag og hinungdan
Nganong molayat pag pitik kining dughan
Bisag hanap-hanap na ang panan-aw
Ug hinay-hinay na ang paminaw
Wa pay linog nga motumba sa acacia
O dakong banog nga moali sa alimukon
Ang iro molahutay gihapon og bantay
Samtang ikaw ikaw ug ako ako gihapon.


--ERLINDA K. ALBURO
Cebu City, Philippines

way kahayag sa langit


Unsay tua luyo sa kapunawpunawan
tadlas sa tanang planeta ug bituon,
sa igot-igot sa langit,
sa lugar nga di na makawhat
sa kuyamoy sa kahayag?

Tubaga ko...
Ayaw kog pasagdi dinhi
sa katugnaw, kahilom, kahaw-ang,
ug kangitngit sa akong balatian.


-- RODELIO BARELLANO
Caloocan City, Philippines

2.16.2012

kamingaw


Miawas ang dagat gikan sa mata sa panganod.
Sama sa langit, walay baybayon ang imong pahiyom.


-- VICENTE VIVENCIO BANDILLO
Manila, Philippines 

lunangan

Igang nga kalibotan. 
Ug ang kabaw nagpahimulos 
paghulom sa iyang lunangan.
Apan laing kaigang ang bati-on 
sa naglugnot nga mananap
nga nia sa atong kinahiladman.
Laing lunangan
ang buot niyang ambakan.
Laing lapok ang iyang ligiran.


-- URIAS A. ALMAGRO
New Berlin, Wisconsin, USA

2.14.2012

pakan-a ko


Abir, pakan-a kuno ko’g dalit
Gikan nimo. Kanang kagumkom ha.
Mas maayo kon init-init pa-- 
Kanang gikan pa gyod sa abuhan.
Sugot ra pod ko anang dukot.
Kay mas lami baya na lugit-lugiton,
Ug ingkit-ingkiton labi na
Kon magkinamot tang duha.


-- GINA MANTUA-PANES
Cebu City, Philippines

sa tumoy sa dila


“Buhat sa balakero ang paghingalan sa dili mahimong nganlan” – Salman Rushdie

Niining hapona, ang hunas sampak sa lawod.
Nagpista sa hunasan ang pundok sa mga kalaw.
Nanibsib ang baka sa mga lumot ug lusay
ug nangadugmok sa matag asdang niini
ang kagaangan lakip na ang mga tuyom,
suyok-suyok, dap-ag, ug swaki. Mitugpa 
ang kalaw sa buko-buko sa baka.
Sa sinugdanan, mga kuto lang niini 
ang gikalingawan og hagpat sa pak-an
ug gaanam-anam kini’g kamang 
paingon sa iyang tangkugo 
libot ngadto sa iyang agtang, dayo’g tuhik-
tuhik sa gabudlat niyang kalimutaw.
Sa akong pagmata, nalimot nako 
sa tingog sa nagtinga nga baka ug sa kaguliyang 
niadtong dakong kumbira.

Nangutana ka unsa’y nakita ko diha nimo,
nganong gihigugma tika. Sayod ko
parayeg lang ni, pinangga. Apan unsay akong mahimo? 
Kon ugaling mahinundom ko sa langgis 
nga pangaliyupo sa nagtinga nga baka  
didto sa hunasan sa akong kahinanok,
wala’y katahap nga wala ko magdamgo.
Ug kon malampuson ko mang mahinganlan
ang butang nga buot mong masayran, 
nahadlok ko nga sa higayong hisaghiran
sa akong dila ang maong katahom, dili
ug dili na tika mamahimong higugmaon.
Ug bisan ang bantugang balakero
dili mahinumdom sa kinatibuk-an sa damgo,
makalitok ko sa katahom 
nga gihigugma ko diha nimo.

kang Carmie

-- IOANNES ARONG
Lapu-Lapu City, Cebu, Philippines 

2.12.2012

pito ka paresan sa pebrero

Kahambog

Baya, gatuo si Undo nga sayon ra gyod abton ang bituon!
Hastang ilara ni Inday, gatuo nga siya ra’y angay hangdon!

Kasina

Maayo pa silang Romeo ug Juliet padayon pang gihisgotan
Samtang kita gabungol, lupig pa’y mga patay nga nalimtan.

Kahangol

Sa suok naa’y duha gahangos; ang ilang dila gasinumpayay.
Ay, ang gapahipi paglili nila taman sa ginhawang galaway!

Kaulag

Kalami unta nga hangtod inig tuktogaok dili ta mag-ibot
Apan gahuwat ra ba si misis pagputol sa akong kapisot.

Kasilag

Naa’y dila ra wa’y labod. Samtang namuwak iyang panit
Og bun-og, bisan ang dugdog amang sa iyang pagping-it.

Kahakog

Talikdi ang kalibotan. Wala ka’y laing atubangon: Ako ra.
Kabay-an ko ikaw hangtod su'd sa imong lungon: Akoa ka.

Katapol

Naminhod ang mga bukton ni Kupido. Gadamgo’g duyan,
Siya gadupa-hayang, gitusak-tusak sa mga tipak sa buwan.


-- MICHAEL U. OBENIETA
Topeka, Kansas, USA

pagtalikod sa balaknon nga bakakon


dili ko motuo sa iyang yamyam

kon kutob ra ang iyang tuno
sa tumoy sa iyang alimpo

kon kinawat ang iyang gipanghagdaw
sa kaban sa iyang handuraw

dili ko modawat sa binuwakang kasakit

kon magtubod iyang dugo gikan
sa pison nga nakaligis og daghan

kon ang gisukod niyang himaya
gisukad sa gutom nga mga hadla


-- JONALYN ALMACIN
Nantes, France

2.10.2012

hilomon


Ang imong pagsulod sa bintana: gaan 
sama sa balhibo sa himungaan
ug ang imong matag tunob 
ingon ka hilomon sa anino 
samtang miaginod ka sa kusina 
ug mihunong tungod sa lamisa.                                                                                                             
Gibag-id nimo imong kilid ubos 
sa lingkoranan, dayon gapanilap 
sa imong tiil samtang hait 
ang akong pagtutok nga 
wala nimo panumbalinga.                                                                                                                  
Gisundan nako ang imong paghangad 
sa alkuba, ug nalingaw ko’g tan-aw 
sa duha ka tiki nga nagdakpanay.                                                                                                     
Pagtugdon sa akong pagsud-ong 
balik sa lamisa, wala’y kasikas 
ang imong pagkahanaw apil sa akong 
pamahaw nga buwad-pinikas.


 -- GRATIAN PAUL R. TIDOR 
Dipolog City, Philippines  

pagpaabot

galungot-lungot pag-ihap 
sa matag gutlo nga gapakli 
sa kalendaryong gisi
gimarkahan ang mga adlaw                                                                                                                        
nga nanglabay samtang 
nag-alindasay sa nagnana 
nga kugan sukad                                                                                                                                          
nakawrasan sa kamingaw 
kining akong dughan                                                                                                                                        
kanus-a kaha matambalan 


-- TEA SOLON
Cebu City, Philippines

2.08.2012

estrous cycle


Gidali-dali'g punit ni Nador ang iyang purol
Ug si Sepa morag kinilaw nga nangluspad
Kay didto sa atop, lupig pa'y unos nga
Nagdahunog ang duha ka iring banbanon
Layat ngadto sa balay nilang Sidra-Alipio
Igpot na man ngadto sa bubungan nilang
Juliana-Teban. Ang mga hinampak! Didto
Maghuman sa atop sa way tawong' payag
Nga dugay nang pahungawanan sa manag-uyab.

Didto sa atbang nga balay, si Ingko Roman
Nagpunay'g yawyaw kay ang iyang pinanggang
Dalaga wa na sad motungha ining gabhiona.
Pero ang iyang yawyaw lugos mabati kay 
Si Titing-Adik kusog kaayong' nagpatokar sa
“Teach Me How To Doggie” kang kansang
Lagubo mitabang pagtago sa pinong' kagaskas
Sa kasagingan. Ug nianang alas dose sa gabii
Ang bayeng Siberian Husky ni Meliton miuwang
Nga naghangad sa nagsinanggot nga Bulan.


-- OMAR KHALID
Metro Manila, Philippines

halloween sa valentine's day

Karong Adlaw sa Gugma,
Pamuniton nako ang mga pulang rosas
nga gihalad sa pantiyon
ni Kupido.

Dukdokon nako matag gihay niini
ug isagol sa  dinner sa managhigugmaay.
Iyawat na lang matambalan
ilang atik-atik.

Kadtong nagpabiling mga tunok
sa punoan, hagpaton nako 
matag lusok ug isabwag dayon
sa karsada-- himuong pasuyak 
sa mga sakyanan paingon didto 
sa Sogo Motel aron mabangga sila
lahos sa menteryo 
ug tanan nilang mga bakak
malubong didto.


-- JIN GARCIANO
Camotes, Cebu, Philippines

2.06.2012

kwerdas

Ako ang kwerdas
Nianang sista
Nga gisangit
Sa imong bungbong.

Gisangit kay kuno
Mosimang na
Ang matag til-is
Sa mga nota.

Apan nagpabilin
Gihapon ang abog
Sa kagahapon, banha
sa mga sungog.

Diin ako nabulit
Sa singot, naligo
Sa imong mga kamot
Nga gakiat-gitik.


-- GINA MANTUA-PANES
Cebu City, Philippines

badlis


Sama sa langob nga ngitngit, dili matugkad
sa akong panan-aw ang gilawmon niadtong
gisubli nimo paghandom. Molungtad kaha

ang imong tanghaga nga sama sa unang uha
sa bata? Ang tubod sa akong pagtuo lagbas
sa bato, ug bisan dili na masubay ang luha,

tultolon gihapon ko sa ulan nga gaagay-ay
og sapa-sapa ilawom sa imong lawak diin
ang bintana bantang sa langob nga dag-om.

(alang sa akong Amahan)


-- DENNIS S. SARMIENTO
Maryland, USA

2.04.2012

hyperbole antithesis


"A poet is the last person to know what the poem is about." 
-- T.S. Eliot

Isip suod mong kaparang, ipangilaba ko 
Nga unta kulatahon ka didto sa paraiso,
Patid-patiran ka sa mga papel de banko, 
Bitayon ka sa masadyang kinabuhing mangilad, 
Mag-ilaid ka sa gakata’g gasobrang credit card
Sagpa-sagpaon ka sa mga katawa ug halok, 
Kunis-kunison sa katam-is ug kagilok, 
Magtingkagol sa luxury suite sa ispidno.


-- MELQUIADITO M. ALLEGO 
Palm Harbor, Florida, USA

gripo

nanuktok 
ang gatulo 
nga gripo 
diha sa liki 
nga balde 
gaagas 
sa utok 
nga bisan 
pun-on pa 
og pila ka 
galon sa 
kalipay dili 
matagbaw 
samtang 
padayon ko
og ihap sa 
tagaktak sa 
tubig nga 
gadugang 
paglanog sa 
kahaw-ang


-- TON DAPOSALA 
Cagayan de Oro City, Philippines

2.02.2012

pagbudhi


ning panahon sa ting-ulan
nanuot-suot ang kabugnaw

sa akong ilok lakip
sa akong dalunggan

magtinabangay ta
paduol na kanako

ang kalayo sa akong dila
idabdab ko sa imong dughan

ang kainit sa akong kahiladman
akong idap-ig sa imong pus-on

hawid sa akong duha ka kamot
kapyot sa akong mga bukton

sa imong humot nga buhok
tayhopi ang akong aso

magdaob ta sa ning lawak nga walay kahayag
sunugon ta ang gilumotan na nga mga kalag


-- RIC S. BASTASA
Katipunan, Zamboanga del Norte, Philippines

world peace


Tuig kadto sa ikatulong gubat sa probinsya. Walay sama ang kaigang ug usahay makamata ako sa kahayag sa bintana, sinundan sa pakapaka sa lantaka. Usa ka gabii, may nanuktok sa pultahan. "Syo! Naa ka diha, Syo? Si Loloy ni. Abrihi ko. Dali." Dalidali kong nag-ilis ug gisugat ang silingang Waray sa may pultahan. Sa pagpaduol niya sa hayag namatikdan kong nagkadugo ang iyang sinina, kuwang ang iyang bukton ug naharos ang tulo ka ngipon. Naunsa man intawon? "Ulahi na ang tanan sa dihang midagan mi, Syo. Kalit kaayo ang panghitabo. Wala mi nakabantay nga nag-ukoy-ukoy ra diay ang mga sirena sa suba. Naluoy ko ni Kapitan Lao Tzu ug Padre Achilles, napagan og apil sa lamok-lamok," asoy ni Loloy nga nagkisikisi, naggukod sa ginhawa. "Daan ko pa. Niining mga panahona, may giluom gyod ang kangitngit sa suba." Sa kusina, samtang nagpintal og uling sa nawong si Loloy, giandam ko ang kataposan namo nga hinagiban. Nakahukom mi nga inig ka kadlawon, among patulbongan ang kaaway og linukot nga puwang t-back. Sinuksokan kini’g mga balak ni Neruda. Tingali, sa ingon ining paagi, wa'y mapildi. 


-- ERIK TUBAN 
Mandaue City, Cebu, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.