4.01.2013

epistola


nitidlom ang kahilom
nagsukod sa wa'y kataposan

nga balod sa gataob nga panumdoman
sukad sa batoong baybayon diin

napapas ang natagik natong mga tunob
sama sa pagkapukaw gikan sa damgo

nga mikagiw ug giapas
sa naulahi kong kahiamgo

padayon nga gisanapan
ang akong dughan sa gabalik-balik

nga kanaas atol sa pagdat-ol 
sa atong palad taliwala sa kagabhion 

nga nikisaw ug niawas 
sa akong kamingaw


-- GILBERT INTERVALO, JR.
Bais City, Negros Oriental, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.