11.29.2013

tubag-pangutana timbang sa balak ni Butch Bandillo


Pila'y kanding sa bukid?
Kadaghan sa bakilid.

Hiniktan binuhian?
Gabahihing' sungayan.

Pila'y karnero sa kapatagan?
Dili maihap nagdagan-dagan.

Hiniktan binuhian?
Sa ikog gilabnihan.

Pila'y anghel sa tumoy sa dagom?
Gainusara pwerteng panglagom.

Hiniktan binuhian?
Baw' lang ikay lintian!


-- MELQUIADITO M. ALLEGO
Miramar Beach, Florida, USA

sagmuyo sa maestrang dalagang ulay


Kuyog nako sa eskuylahan  
ang kasadya sa mga banhaan--
pulos di mamuhi sa akong saya 
ug mag-indigay kinsa'y makauna
sa akong pagtagad. Apan unya 

sa pagpauli inig tikyop sa adlaw,
inig abli nako sa pultahan 
magdagan dayon ang pagkapkap
ug pagkat-on unsaon pagtagbaw 
og gakos sa kamingaw.


-- JONDY M. ARPILLEDA
Davao City, Philippines 

11.27.2013

haikugang


mata sa isda
gasiga sa paglutaw
diha sa kaha

gamayng ilaga
garapon gitungtongan
hangtod nahapla


-- DENNIS S. SARMIENTO
Baltimore County, Maryland, USA 

igo na ba?


Igo na ba
Ang mga pulong tang balaknon
Aron atong pagbati saulogon?

Igo na ba
Nga itunong ubos a takdol nga buwan
Atong mga panaad aron dili malimtan?

Igo na ba
Ang mga hugna sa kahilom
Sa gainusara nga paghandom?

Igo na ba
Nga mohangad sa mga bituon
kon ang luha kabundakon? 

Igo na ba
nga dili ko nimo tagdon kay balik-balik ra
ang wala nimo damha nga mga pangutana?


-- ELVIN E. RUIZ
Liloan, Cebu, Philippines

11.25.2013

pangutana ug tu(libag)bag


Pilay kanding sa bukid?
Usa ka bakid.

Hiniktan, binuhian?
Kiniskisan.

Pilay karnero sa kapatagan?
Usa ka panaksan.

Hiniktan, binuhian?
Hinugasan.

Pilay anghel sa tumoy sa dagom?
Usa ka kumkom.

Hiniktan, binuhian?
Way sapayan.


-- VICENTE VIVENCIO BANDILLO
Manila, Philippines

gugma sa kaugalingon


humot ang alisngaw
sa akong ilok

tam-is asgad pod
ang akong singot

kanunay kong mingawon
sa nabaklag nakong purol

ang kugang sa akong samad
nga akong gitangtang

sa ibabaw sa akong palad
lami kaayong lantawon


-- RIC S. BASTASA
Katipunan, Zamboanga del Norte, Philippines

11.23.2013

pinisik


Magdumili sa mahinayon nga pagpadulong sa maayong kagabhion, Kinahanglang magdilaab ang katigulang ug magbagulbol sa kilumkilom; Mapungot, mapungot batok sa kahayag nga himatyon. Bisan ang maalamon sa ilang kamatayon nakahibalo nga tukma ang kadulom, Kay ang ilang mga pulong wala’y gihiwa nga kilat sila Magdumili sa mahinayon nga pagpadulong sa maayong kagabhion. Mga maayong laki, ang ulahi gakayab sa iyang kamot, gahilak kon unsa kasanag Ang pagsayaw unta sa ilang huyang nga binuhatan diha sa lunhaw nga baybayon Mapungot, mapungot batok sa kahayag nga himatyon. Mga tawong idlas nga nidakop ug niawit sa adlaw nga paspas Ug nakat-on, iwit na kaayo, nga sila nagbangotan ini sa iyang pag-agi, Magdumili sa mahinayon nga pagpadulong sa maayong kagabhion. Mga tawong lawom, duol sa kamatayon, nga nakasaksi sa suwaw nga talan-awon Mga matang buta mahimong magsiga sama sa mga bulalakaw ug malipayon, Mapungot, mapungot batok sa kahayag nga himatyon. Ug ikaw, amahan ko, diha sa masulob-on nga kahitas-an, Balikasa, benditahi, ako karon sa imong bangis nga mga luha, giampo ko. Magdumili sa mahinayon nga pagpadulong sa maayong kagabhion. Mapungot, mapungot batok sa kahayag nga himatyon. 


-- MICHAEL U. OBENIETA 
Topeka, Kansas, USA

usa ka sugilanon sa gugma


nagpabug-at
ang usa ka bunga
sa tambis

di mobuhi
ang sanga

samtang
naghangad
ang nagpaabot
nga sagbot.


-- GRATIAN PAUL R. TIDOR
Dipolog City, Philippines

11.21.2013

hemicrania continua


kanunayng gabug-at
mosiak mopislat

labaw pa sa migraine
lupig ligsan sa train

hala ihayon na ang parakol
buk-a ning bombang bagolbagol!


-- MELQUIADITO M. ALLEGO
Fort Walton Beach, Florida, USA

duhiraw


Ganina, way timik imong pagbiya  
bitbit ang mga bug-at nga pulong
nga akong gihabwa 
sa atong talad kan-anan.  

Karon nga gihabolan atong lawak 
sa kamingaw, gabilin og panuhot 
ang pag-alindasay sa balik-
balik nga pagpaabot…


-- JONDY M. ARPILLEDA
Davao City, Philippines 

11.19.2013

berbo: hubad sa balak ni Pablo Neruda


Akong gum-oson kining pulonga,
akong lubagon,
oo,
kay sobra ra ang kahamis,
daw ang dila sa usa ka dakung iro 
o ang tubig sa dakung sapa
mihinis niini
sa mga tuig ug mga katuigan.

Gusto kong hikit-an 
ang pagkakunot sa maong pulong,
ang daw puthaw’ng kaasgad,
ang way ngipong kusog
ning kalibotan,
ang dugo
niadtong mga misulti o niadtong mga wa mosulti. 

Gusto kong hikit-an ang kauhaw
sa sulod sa mga silaba:
gusto kong mohikap sa kalayo
sa iyang tunog:
gusto kong mabati ang kangitngit
sa singgit.  Gusto ko
ang kunot nga mga pulong
nga sama sa putli’ng mga bato.


Gihubad ni:
-- URIAS A. ALMAGRO
New Berlin, Wisconsin, USA

tiyo landa


dia na sad ning bayot ay, manaygon sa kalag-kalag.
udtong dako, tagaig piso para motihol. tagaig kwatro 
para mo sirko balentong. "lit-ag sa mga aninipot 
ang alimpulong gidalas dangan," matod pa ni bobby b.
si bobby ba! inyong silingang barberong taga siquijor 
nangluspad man to ganiha apan klaro na kaayo 
nga iya na sad nasayran ang mga butang umaabot.

sigon pa niya, diang mga signos: lamping may tina sa dugo,
ang mga hulmigas nagdasok sa balay sa putyukan 
daw niuk-ok nga panit sa bakukang. gibulhot sa bulhog 
nga bayookon hait ang silindron nga may kagis og patilya,
bug-at ang kamot sa way puangod nga nanilhig sa di oras,
di ikalipay nga wa pa ka nakakaog imported nga de lata,
ug di unta makusokuso ang mga butang nga way mantsa.

bitaw, may nang preparado kay sa magtuotuo. isirado lang
ang atong gamayng tindahan sa eskina, sa kadlawon 
nga maligsan sa mat-ang sirko ang nag-iyagak nga anay.


-- ERIK E. TUBAN
Alang-alang, Mandaue City, Philippines

11.17.2013

taliwala sa lawod: gipaangay gikan sa balak ni Robert Bly


Tibuok adlaw ko ikawng gihigugma nunot sa hilanat nga nagkumbitay sa ikog sa kabayo. Miawas ako sa matag higayon nga kab-oton ko ikaw. Mitadlas ang akong kamot sa imong lawas nga liniminan sa sapot nga makapaksit sa kuyamoy sa mananap nga molatay sa mga dahon. Misibog ang unos mibukhad ang mga panganod midalipsay ang mga bidlisiw sa aping sa lawod kaliboan ka milya gikan sa baybayon.


-- VICENTE VIVENCIO BANDILLO
Manila, Philippines

tinuod nga kahayag


dayag kaayo 
nga abli ang pultahan

ania ang pagduha-duha
kon sugdan ko na ba
ang pagbiya

ang mga kamot sa
kahayag
nangamay kanako

ug ang pultahan
nagsayawsayaw


-- RIC S. BASTASA
Katipunan, Zamboanga del Norte, Philippines

11.15.2013

dapit sa kasakit


Magdumili sa mahinayon nga pagpadulong sa maayong kagabhion, Kinahanglang magdilaab ang katigulang ug magbagulbol sa kilumkilom; Mapungot, mapungot batok sa kahayag nga himatyon. Bisan ang maalamon sa ilang kamatayon nakahibalo nga tukma ang kadulom, Kay ang ilang mga pulong wala’y gihiwa nga kilat sila Magdumili sa mahinayon nga pagpadulong sa maayong kagabhion. Mga maayong laki, ang ulahi gakayab sa iyang kamot, gahilak kon unsa kasanag Ang pagsayaw unta sa ilang huyang nga binuhatan diha sa lunhaw nga baybayon Mapungot, mapungot batok sa kahayag nga himatyon. Mga tawong idlas nga nidakop ug niawit sa adlaw nga paspas Ug nakat-on, iwit na kaayo, nga sila nagbangotan ini sa iyang pag-agi, Magdumili sa mahinayon nga pagpadulong sa maayong kagabhion. Mga tawong lawom, duol sa kamatayon, nga nakasaksi sa suwaw nga talan-awon Mga matang buta mahimong magsiga sama sa mga bulalakaw ug malipayon, Mapungot, mapungot batok sa kahayag nga himatyon. Ug ikaw, amahan ko, diha sa masulob-on nga kahitas-an, Balikasa, benditahi, ako karon sa imong bangis nga mga luha, giampo ko. Magdumili sa mahinayon nga pagpadulong sa maayong kagabhion. Mapungot, mapungot batok sa kahayag nga himatyon. 


-- MICHAEL U. OBENIETA 
Topeka, Kansas, USA  

luha sa uwan


Usahay, ganahan kong mohunong taliwala sa gabunok nga uwan
Duyog sa paghagti ini sa mga balili samtang namungingi
Ang kahinam sa gasugwak nga pagtugpa sa akong mga pilok. 

Sa akong inusarang pagkahumod, lagmit mangatawa sila--
Wala masayod nga inubanan sa pagdaligdig sa katugnaw 
sa akong aping, mahimong molutaw ang nahunlak kong dughan.


-- ELVIN E. RUIZ
Liloan, Cebu, Philippines

11.13.2013

pangutana sa bana ngadto sa nagmug-ot niyang asawa sukad niabot si yolanda


Angay ko bang basulon ang kakamig
nga miipsot sa nawaskag natong bungbong, day? 
Apilon ba pod nato ang mga alindahaw 
nga namatog sa talamboan nganong 
kalit nahupas ang kainit
sa bag-ong gihaon nimong kape tupad
ining sud-an nga buwad? 


-- JONDY M. ARPILLEDA
Davao City, Philippines 

tugnawng gabii


alang sa mga biktima ni Yolanda

Gabii sa akong pagkatulog
Gipukaw ko sa katugnaw.
Sa gawas nadunggan ko
Ang paghagiyos sa hangin--
Mangtas ug madinumtanon.

Dali kong nisuksok sa habol,
Nangiyawat og saag nga kainit
Apan sulod sa kangitngit
Lahos sa akong hunahuna
Giurom ko sa akong nakita:

Ang mga gaduhiraw sa kagutom
Wala'y makatulgan; wala'y sawog,
Atop ug dingding samtang
Wala'y lipod-lipod sa gawas 
Ang pagbulhot sa mangtas.

Gabii natugaw ko sa kabugnaw.
Apan diha sa akong pagbukot kalit 
Nawahig ang habol, ug mora'g 
Nakahubo ko sa akong nadunggan:
Mga bawod sa pagbakho.


-- JAYSON E. PARBA
Honolulu, Hawaii, USA 

11.11.2013

musika

konserto

Sama lang gihapon ang mga awit
sa kalanggaman
nga akong hidunggan 
sa akong tugkaran matag buntag.
Sum-ol na ang ilang konserto.
Unta
dunay buntag
nga sa akong pagmata,
maoy akong hidunggan
ang lahi’ng awit nga nagagikan 
sa usa ka laing langgam.
Ang konserto sa usa ka bag-ong tingog.

ang baho

Nagtugtog ang orkestra.
Sipa nga tunog sa trumpeta,
agung-ong sa mga saksopon,
panghayhay sa mga trombon.
Apan maoy labi kong nadungog
ang tugtog sa baho de arko.
Tugtog nga tua lang
sa bakgrawn, apan
makanunayon 
sa ubos niyang kompas.
Ritmo nga maoy pinitik 
sa kasingkasing sa gitugtog nga huni.


-- URIAS A. ALMAGRO
New Berlin, Wisconsin, USA   

nangumpisal si Yolanda


Taliwala sa akong hangin ug uwan
ang kahagip-ot sa inyong panimalay,
ug sa inyong pamahaw: mga tumang pangandoy
nga miangkon kanako.
Gidayeg ko ang inyong kaisog
sa akong pagkulikot sa inyong dughan,
bisan kini ningkipos,
madungog nako ang mga tipak-tipak
sa inyong natun-as nga gininhawa, nisubli kini
kanako, miukiot sa yuta,
apan mitapot sa akong mata
ang inyong paglimot sa pag-amuma
sa akong mga igsuon--dili na nako sila mailhan;
bisan ilang mga ngalan inyong gikalimtan;
ang inyong kaugatan, inyong giutlanan.

Pasayloa ko, apan gibundak ko kaninyo
ang akong pagkahunlak, mao kining taknaa
nga akong bawion ang inyong mga kaugalingon
aron inig balik ini, ang mga kalasangan, dagat ug uwan
matinud-anong mangita sa inyong mga tudlo ug palad.


-- CINDY VELASQUEZ
Cebu City, Philippines

11.09.2013

wala'y kapaingnan


mga hunahuna
nga mora'g mga kabayo 
nagdagan kusog kaayo 
sa dakong bukid
paingon sa pangpang dayon

nangahulog 
nagbilin og 
mga abog


-- RIC S. BASTASA
Katipunan, Zamboanga del Norte, Philippines

lahing pagtan-aw sa akong balak nga “gikan sa kusog nga hangin ug ulan”


Wala na ang punoan sa kaymito
Uban sa mga sanga, dahon, ug goryon.
Sa kanhi gibarogan sa punoan, gahigda
Ang punoan sa saging
Nga, kagahapon, gianod
Sa usa lamang ka haguros.

Sa pagtugdon sa bidlisiw
Diha sa punoan sa saging, nakita
Ang patayng lawas nga daw way kalainan
sa natumbang punoan.

Ug diha sa maong lawas,
Gabarog ang sunoy
Nga minghoy’ng mikapa-kapa
Sa unsa'y nahabilin
Sa iyang mga pako.


-- GRATIAN PAUL R. TIDOR
Dipolog City, Philippines

11.07.2013

haikuhit: pasiaw nga hunghong sa palautog nga kalit natugaw sa damgo kabahin sa linog ug bagyo

Hangin galanog,
galugitom. Kaputi
sa akong itlog!

Pastilan, inday! 
Panalipdi tawon ko
sa imong tanday.


-- MICHAEL U. OBENIETA 
Topeka, Kansas, USA

dinalian


kang Vicente Vivencio Bandillo

Dinalian nga magpatupi ko 
aron pirmeng gwapo.
Dinalian nga mopalit kog tambal 
aron dili sa kalit modiwalwal
Dinalian nga bayran ang electric ug water bill 
aron sa kadulom ug kauhaw makatubil.
Dinalian nga ilisan nako ang napudpod na nga silhig tukog 
aron dili unya ko malubong sa mga abog.
Dinalian nga ihatod nako ang labhonon sa laundry shop 
kay hapit nang birok giusap.
Dinalian nga tubagon nako ang nagtipun-og nga mga e-mail 
kay mahiubos unya si Mike, Ric, Ury, ug Mel.
Dinalian nga usbon ang akong kinabuhi 
kay kuyaw mahimong patayng' buhi!


-- MELQUIADITO M. ALLEGO
Destin, Florida, USA

11.05.2013

walay dinalian


Dili dinalian nga magpatupi ko.
Dili dinalian nga mopalit kog tambal.
Dili dinalian nga bayran nako ang electric ug water bills.
Dili dinalian nga ilisan nako ang napudpod na nga silhig tukog.
Dili dinalian nga ihatod nako ang labhonon sa laundry shop
Dili dinalian nga tubagon nako ang nagtipun-og nga e-mails.
Dili dinalian nga usbon nako ang akong kinabuhi.


-- VICENTE VIVENCIO BANDILLO
Manila, Philippines

kahigal #2


Ang taong uwagan mahisama sa gutom
nga iring sungkaban. Wa’y kahadlok mokatkat,
molayat  sa mga akmoanan. Molusot 

sa bangag bisan unsa pa kagamay apan 
magkinto nga molakaw paduol sa tinakloban.   


-- JONDY M. ARPILLEDA
Davao City, Philippines 

11.03.2013

human sa akong mga paglibotlibot


Magsugod ako gikan sa sinugdanan.
Sa sinugdang tumoy sa taas nga hilo
nga akong nasubay.  Gikan sa akong pagliyok 
sa sidsid sa balangay sa pagkainosenti,  
ngadto sa akong pagsum-ok sa tiyangihan 
sa kahimatngon, diin wa ko hikat-oni  
kon unsaon paghangyo ang presyo sa kinabuhi.  
Unya sa akong paglusad sa mga dakbayan 
sa paningkamot, diin ang akong mga sapatos 
nangadunot sa tanto kong paglakawlakaw 
sa mga abugong kadalanan.  Magsugod ako 
gikan sa tuburan sa paglaom, ngadto 
sa akong pagtabok sa isla sa kamingaw.  
Misulod ako sa mga paril sa kahilom, 
mitambong sa mga bangkete sa panaghigala, 
ug miapil-apil sa pundokpundok sa kasilag.  
Gidan-agan ako sa bidlisiw sa mga pahiyom, 
ug ningpiksan sa mga lusok sa kagul-anan… 
Ug karon human ning tanang mga paglibotlibot, 
midangat na ako sa balkon sa handurawan, 
uban sa usa na lang ka pangandoy: Nga unta 
way motugaw sa akong paghitagpilaw  
Ning liyaliya sa akong pag-inusara.

-- URIAS A. ALMAGRO
New Berlin, Wisconsin, USA

sinugatan


Ayaw baya papasa ang pahiyom
sa usa ka kuwatro anyos. 
Kon aduna pa’y dagway 
ang kalipay, saksi pod unta bisan
ang manok nga wa’y liog. Daghan sila 
nga nanagan, daw nahadlok 
sa habo-habo. 

Pahilayo sa giingon niyang "giant,
hugot pa sa bitbit nga panihapon 
ang paghawid sa mubo nga bukton--
Usa ka batang babaye nga gasapwang 
sa usa ka galon nga gatas; iyang kidhat 
sama sa mauwawon nga kilat.

Karong adlawa ang sabot. Ug bisan 
lamyon pa sa uwan ang humot nga aso, 
di gihapon madagit sa hangin ang kinatibok-an 
sa sinugatan. Gani masaligon ang imong anak, 
nga unya atol sa panihapon ikatug-ab ang kagutom.

Karon sab ang adlaw sa pagbalik sa tingtugnaw.
Pangitaon na sab unya pagbalik ang kaigang sa pahiyom.


-- DENNIS S. SARMIENTO
Baltimore County, Maryland, USA 

11.01.2013

karon malinawon


ang kagabhion
lahi na gikan
dili ko makatulog 

kaniadto sa kakulba

apan bisan haw-ang 
ang alugnan
salamat nga ikaw

karon wala na


-- RIC S. BASTASA
Katipunan, Zamboanga del Norte, Philippines

sa menteryo


ang pag-inusara
gihulagway
sa nadugta nga bulak
nga salin pa
sa miaging kalag-kalag

ug ang kalipay
ingon ra nianang kandila
nga kalit maupos 
inig biya
sa miduaw


-- GRATIAN PAUL R. TIDOR
Dipolog City, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.