12.30.2014

pasidaan sa dili kapasidan-an


Ang lalim uyamot nga kalipay
Dili mapatin-aw sa talidhay
Ug sa labing hapdos nga kasakit
Walay danguyngoy nga makahubit.


-- VICENTE VIVENCIO BANDILLO
Dhaka, Bangladesh

acapella ngadto sa bag-ong tuig


pakapaka sa palakpalak butobuto sa rebentador tiliis sa kuwetes
kinanaas sa dahon hinaganas sa balod hinaguros sa hangin
ingaa sa baka bahihi sa kabayo piyakpiyak sa piso tuktugaok sa manok
tinagaktak sa ulan hinadyong sa tabanog paminti sa kilatliti bagulbol
sa dalugdog agumod sa panganod taghoy sa huyuhoy tawag sa budyong
dinagayday sa busay dinaligdig sa tubig  tinapyatapya sa lapyahan


-- MELQUIADITO M. ALLEGO
Larose, Louisiana, USA

12.28.2014

bag-ong kahidlaw sa karaang adlaw


Nangapkap na ang salumsom. Gikan sa suba,
galukdo si Manay Basyon sa mga linabhan. 
Tataw gihapon iyang mga tunob bisan dugay ra

gasukarap ang iyang tinutokan nga sarang pa
gasubay sa iyang naandan lahos sa tugkaran 
diin gahuwat ang iyang binuhing iring. Gahagwa

ang katugnaw, galatay tadlas sa hayhayan... 
Ug sa makausa pa, ang yamog sa balilihan
Gisupsop. Nanghinol na sab ang sidlakan.


-- MICHAEL U. OBENIETA 
Topeka, Kansas, USA

paglugway sa kalipay


Mga salin-salin sa refrigerator,
mga ulahing pagpanaygon
ug uban pang bahaw sa Pasko
mingpahinumdom kanako nga tingali
ang kalipay, sama niadtong miaging gabii,
hamubo ug wala'y katagbawan.

Ug tingali kini mopauli ra pod,
moabli sa iyang kaugalingong ganghaan
aron magsugod na sab pag-ihap sa mga adlaw
hangtod sa sunod nga panagtapok. Ug unya,

pananglit, inig abot na sa tanang gipaabot
mahitabo na ang gipanghandom lakip
ang gipamadpad sa hangin-- ang panagkita 
og balik sa tanan, mga panaghisgot,
mga katawa, pagdula-dula sa mga bata, 
pagdagan-dagan, pag-ambak-

ambak… Asa kutob ang huyohoy sa dughan? 


-- ADONIS R. ENRICUSO
Dumingag, Zamboanga del Sur, Philippines

12.26.2014

takulahaw: eksperimento sa rima sa letra’ng 'w'


Kon takulahaw,
sa atong pagtikawtikaw,
dunay usa ka alindahaw
o usa ka antulihaw
nga mosayaw
sa ibabaw
sa bangaw,
ikaw ug ako motan-aw
sa way labaw
nga pagkalingaw. 
Apan bitaw
kini usa man lang ka tiaw
busa, magbabasa, ayaw
(ug gikidhatan ko ikaw)
pagkahanggaw
ning gamay’ng pasiaw.
Kanimo: Maayong adlaw.


-- URIAS A. ALMAGRO
New Berlin, Wisconsin, USA

tilimad-on


Kon sa imong pagpauli, nanglingabngab
Ang mga gangis ug wala motagbo
Ang sinilihang mga pulong-- Diin ka na 
Usab gikan? Maayo ka nakainom og sabaw 
Sa pasaw! Kami hangin ra!-- ug wala na 
Mobagting ang ebanghelyo sa bata,

Paghubog ug paglipay
Kay bulahan ka.

Natulog na ang asawa nga maglamoy og sili 
Samtang maghangad sa buwan. Ug miuk-ok na 
Ang dila sa napagaw nga bata.


-- ELEAZAR T. ACAMPADO
San Jose del Monte City, Bulacan, Philippines

12.24.2014

kontrapunto sa "kasadya ning taknaa"


Gitak-op nako   
ang akong pagtukaw
bisan naminaw ko  
sa huyo nga awit  
sa mga manaygonay
sa pikas balay.

Ang ilang tingog
daw mga pak-an 
nga niyebe, nanugdon 
sa atop ug sa mga sanga 
sa gawas nga gilunopan 
sa katugnaw. 


-- JONDY M. ARPILLEDA
Tagum, Davao del Norte, Philippines

atol sa stop light liwas sa pasko


kadtong bata 
nga nanguhit sa mga langyaw nga lumalabay
nanaygon sa mga pasahero sa jeep
namaligya og kandila ug sampaguita
namunit sa imong piso ug bayntsingko
nabunyagan sa imong pagdayeg ug kanunay 

nga pagsimba samtang gahalad ka sa buwak 
nga tagsengkwenta ang bugkos
daw promo sa newspaper nga putos


-- LESLIE S. NUÑEZ
Compostela, Cebu, Philippines 

12.22.2014

tinagsip nga sumbingay: ang disgrasya usahay sama sa wala damha nga gasa


ang tabanog sa langit
nga gibitad-bitad 

ang tawo-tawo sa basakan
nga gilabyan sa hangin

ang nangakha nga himongaan
nga gisiplatan sa banog 

ang wati nga mitago 
ilalom sa bato nga buhi


-- RIC S. BASTASA
Katipunan, Zamboanga del Norte, Philippines

matag pasko inig alas tres sa kaadlawon


Kanunay ang kawad-on. Panagsa, 
mouwang ang iro. Gikan sa mga pabuto, ang aso 
molamoy sa karsada. Wala'y madunggan 
bisan hunghong man lang. Namauli na 
ang mga sirok nga tapok, ug mamukaw na pod 
unya ang katol nga alisngaw ilawom sa gikamayo 
nga kugan sa napaso nga kalibotan. 


-- SIMON ANTON NINO DIEGO BAENA
Bais City, Negros Oriental, Philippines

12.20.2014

pagtukaw hangtod sa noche buena


Sa tungang gabiing misa ang mga daygon
Salirawan sa pasungang gipanag-alayon

Ipakalawat ang katulogon nga mga balak
Ihalad ang mga osteya ug balaang alak


-- MELQUIADITO M. ALLEGO
Pearl River, Louisiana, USA

x-mas


Nahapinan sa kagabhion ang hilom 
nga eskinita diri sa Krustaal diin 
gapadayag ang mga borikat
bisan sa kadulom nga salin
sa pakyas nga mga poste. 

Ania na ang mga hubog
nga daw duyog sa mga bata 
mga nagkayabag sa ilang panaygon,
giitsahan og singko sentabos
pakapin sa singhag:“Yawa! 
Banha kaayo! Lintika! Hawa!”

Pila kaha ilang ihatag 
sa mga badyi nga gabansiwag 
ang atngal nga gigutman 
ug galaway pod pagpaambit
sa ilang kanta nga sagad
pilit pa sa sinuka. 

Gidundon nako’g tan-aw
kon asa paingon ang mga bata,
giapas sa akong panghinaot
nga ang mga poste sa unahan
mosubay pod unta sa mga eskinita 
nga ilang baktason lahos
sa tanang likuonon. 


-- SUMMER DAFFODIL M. PAGUIA
Nazareth, Cagayan de Oro City, Philippines

12.18.2014

sa kapatagan


kontrasenyas alang kang Richard Hugo

Litok og pulong nga may dagaang. 
Kumusta. Tugob sa kakuyaw 
ang kalibotan hangtod nga gilukmay 
sa hangin ang balili ug gihatagan 
og pahulay ang kaisdaan. Dayon 
kaway, kumusta. Basin baya diha 
sa unahan may nagdulong dinhi 
luwan sa naglingga-lingga 
nga kahayag. Kon asa man kita 
nanimuyo, dinhi kita nangatulog 
diin ang mga baka nangligdas 
sa tampi sa misanap nga sapa. 
Halawom kitang nahinanok dinhi 
nga batan-on sa balak. Tumbok 
sa silangan and rumbo sa sapa 
nga wala magpas-an kanato hataas 
nga dagayday punting sa Day-as. 
Midagayday ang balili walay puas 
paingon kanato, palayo sa kanunay, 
sama niadtong gubat diin gidamgo ta 
nga buhi ang yutang natawhan. 
Nasigpatan ang atong senyas 
sa tawo nga gilaoman ta nga diha 
sa unahan ug paingon na siya karon
sa atong nahimutangan. Litok 
og pulong nga may dagaang. Kumusta. 
Mahimo nga hangtod sa kahangtoran 
matulog ka dinhi niining balili 
ug dili gayod bation og katugnaw.


-- VICENTE VIVENCIO BANDILLO
Dhaka, Bangladesh

hamok sa kataposang pasko


Anaa na sab ang kasinaw sa maraag-- 
mga bola sa Christmas tree. Ug bisan pa'g
gibitayan sa kinaham nimong kolor, kini
nanghamok, nangawras og balik

sa kagahapon diin naglingkod ka
sa tuwang-tuwang, naminaw og mga huni 
sa daygon samtang gisabak nimo 
ang mga bata, gatan-aw sa kipat-kipat
nga bangaw sa siris...

Sa gawas, bug-at ang taguktok 
sa uwan ug duyog sa kahagsaon 
ang sandayong, wala'y laing madungog
sulod sa hawan nga sala diin kanhi
gasugwak ang mga talidhay
nga gapasinaw og samot 
sa mga maraag uyon sa sa panumdoman 
nga galuhag sa kahaw-ang diha 
sa lingkoranan nga tuwang-tuwang.


-- TEA SOLON
Cebu City, Philippines

12.16.2014

oda olango


Pilok na la'y malihok ni Magellan
Sa naminhod niyang lawas. Pastilan,
Ang tawo gihabolan na sa kabugnaw
Samtang nagkaawop ang panan-aw!
Nabati na niya ang karaang sonata
Nga awiton kaniadto sa iyang Mama.

Nihampak sa iyang aping
Ang nagkadugo nga mga balod
Ug nahalingi siya kanimo, Olango.
Nasangit sa imong kabakhawan
Ang iyang panumdoman.
Sa aso nga nagiliyok 
Sa imong kahanginan
Siya nagkanayon:
Ah, nagtak-ang nag pamahaw si Mama
Nianang bahina sa isla.
Magdali ko sa pag-uli
Aron mohigop og sabaw sa init nga tinuwa
Sa dili pa mopahulay sa dako nakong kama.

Wala ni masaysay sa imong kaagi,
Olango! Apan bisan pa man niini,
Samtang gaaginod ang kataposan
Mapasalamaton kanimo si Magellan.


-- IOANNES ARONG
Lapu-Lapu City, Cebu, Philippines

pasko han tuig dos mil trese, waray bata nga nangangaroling ha villa de san juanico, barangay bagacay, tacloban


Ginlam-ud han balud. Diri ngani,
nahanaw ha kawarayan an kabataan.

An ira gudti nga mga tudlo
nangapyot ha riles han alad o alkuba

o sapayan han balay, nangapyot antis
hibul-iwan han mga kamot, nangapyot

antis gindagit han dulok.
An nahisalin nga kabataan, diri

nagawas hit gab-i, nahadlok
kun ano nga bugawak an dara han kasisidman.

Siyahan nga Pasko kahuman han kalunod,
waray bisan usa nga bata

nga nangangaroling ha dalan.
An nababatian ha kagab-ihon

an rusmak ha baybayon
han nagtitikahirani nga dagat.


-- JANIS CLAIRE SALVACION 
Tacloban City, Leyte, Philippines

12.14.2014

pakapin nga kabug-at sa pinaskohan


Ang gasa dili magsaba. Busa, gihilom ra pod sa iyang asawa 
nga tindera'g barbekyo sa eskina ang gitagana alang nila 

ni Inday Belen. Usa ka puloy-anan sa bag-ong subdibisyon
nga kanhi baybayon nga abtanan sa mga manginginhas 
sa Sta. Rosa. Sementado ang bungbong nga pinintalan og 
kaylap sa sidlakan-- labaw pang madanihon sa hiniwa nga unod 
sa queso de bola. Dili na unya siya binlan og kahait 
sa udtong tutok nga sagad mabulasot sa atop. Wala na'y 
salibo nga manguhit niya matag ting-ulan. Kanus-a kaha mouli 
ang akong Inday Belen? Kumusta na… Apan ang madunggan
sa iyang asawa mao ra ang kagod sa iyang dila nga lupig pa'y
gilansang sa iyang nikaging nga bag-ang sukad siya natagakan
og martilyo sa iyang kaubang panday. Bisan tingsi na lang 
sa uwat ang gapabilin sa iyang opaw, ang pahiyom 
ni Inday Belen kanunay mobatog sa iyang panumdoman. 
Ug wa'y hunong pod ang pagsakdap sa iyang hunghong
kang Birhen sa Regla--gasud-ong niya diha sa gianuos 
nga bildo, gikwadro sa bungbong-- nga unta wala'y katugnaw
nga mokaraw sa iyang bugtong anak nga nisamot kahamis

didto sa Amsterdam. Bisan gidan-agan siya sa gabangaw 
nga mga bombilya (maayong igaid sa Christmas tree), dili dayag
ang gabon sa iyang mga mata. Gisuyop niya ang kauhaw 
sa matag turista nga nahidangat diin siya gahuwat
taliwala sa mga samin. Wala'y moduaw niya nga dili 
motuo--samtang ang iyang ngabil gapahugot sa kinatumyan 
sa kagul-anan-- nga siya tuod manggihatagon. Ay, basin pod baya 
isangyaw siya sa mga mananaygon: Bulahan ka sa babayeng tanan!
(Kay motando kuno sa bisan unsang mando.) Pwera gaba, wa'y saba! 


-- MICHAEL U. OBENIETA 
Topeka, Kansas, USA

ang nalawos ug wa mahalin nga kahumot sa tinuhog nga sampaguita


bisan tinuod nikaging na
ang mga gihay

nangumpayot lab-as pa
diha sa dagway

sa handurawan ang mga 
pangindahay


-- RODELIO BARELLANO
Caloocan City, Philippines

12.12.2014

balay-balay


Ang mga dahon, sako, ug karton
sarang na sa pagtukod. Niining luna
nga iyaha ra, bisan ang panahon 
mihunong, nag-agad ra sa bata. 

Dinhi, wala'y kusi ang kabalaka. 
Ug duna'y usa ka inahan nga gatagbaw
og pahiyom sa iyang hinikay--
balas nga bugas, barbekyo nga santan 
ug adobong bato nga hinakot 
sa usa ka amahan nga nagkabulingit
apan gatingsi sa iyang pagkasip-onon. 

Sa gawas, gatipun-og ang mga butang 
nga dili makuptan. Dili masukod
sa gamay nga mga kamot nga wala pa
katultol sa gilay-on sa kanhi niyang  
sabakan, gianod ngadto sa langyaw 
nga mga suok. Dili pod mahikap 
ang kamot diha sa hulagway 
nga sa tiaw nalumos na sa sabaw.  

Tan-awa ang dangpanan nga ginama
sa mga biya nga pinunitan! Dili lisod
tagoan, dali rang mahipos kon 
mobagnos sa dag-om ang tyabaw 
nga gatabyog sa kawanangan hangtod
sa taas pang mga adlaw. Bahala na kon
wa'y kalahian sa hagwa sa panahon 
ang higayon sa pagdula-dula. 


-- ADONIS R. ENRICUSO
Dumingag, Zamboanga del Sur, Philippines

naglikit nga bilog sa posporo


ug sa dihang kalit lang 
gikudlitan gitapsingan 
ang gusok sa alibangbang
milanog milagiti

hangin ra'y nakabati


-- LESLIE S. NUÑEZ
Compostela, Cebu, Philippines      

12.10.2014

sa hardin


Nagsulat kita’g 
mga balak sa katahom  
sa kaamyon sa mga bulak. 
Apan gawas niini 
unsa pa man gyod 
ang atong nahibaw-an?
Nga sila mobuklad
mangalawos mangatagak?
Ang buyog kansang katungdanan 
mao ra ang pagpaniba 
ug way kahibalo sa pagpamalak
tingali’g may labaw 
pang nahibaw-an
kay kanato.


-- URIAS A. ALMAGRO
New Berlin, Wisconsin, USA

unos


Kay lagi ang katahap mahimong dalangpan. Usahay kinahanglan ko mopahuway ug malimot sa mga panghitabo. Ganahan pod tilokon ang kahilom dinhi ibabaw sa dakong bato samtang gilantaw ko ang paghinlo sa langit sa iyang kahugaw. Gapasad ang mga dahon sa acacia ilalom sa iyang kaugalingong ugat nga naglit-ad duol sa kabalayan-- nagnganga ang samad, gidanlak… Magpadayon ang kinabuhi sa matag higop sa tsa, sa matag suyop sa sigarilyo. Daw kublan ang tawo sa kagul-anan samtang gipatas-an ang mga tabanog diha sa suba ni Pelarta. Kabalo ko nga kinahanglan ta motugot og unsay pagbuot sa mga kusog nga labaw pa nato. Ug kanunay kong galaom nga naa'y tino nga kasaligan. Bahala na'g sa kataposan ining tanan, ang mahabilin nato mao ra ang pangagho-- usa ka uknol gikan sa atong ginhawaan.  


-- SIMON ANTON NINO DIEGO BAENA
Bais City, Negros Oriental, Philippines

12.08.2014

ang binilanggo nga namaligya’g parol


gikan siya nahalinan
layo na ang puy-anan
sa ginama niyang parol

bisan pa'g sa iyang hunahuna

gisab-ong niya ang parol
sa balay nga wala na 
mapuy-i hagbay ra


-- GRATIAN PAUL R. TIDOR
Dipolog City, Philippines

paghikalimot

(alang ni Kuya Dirk)
I
Ang gamay, may gilapdong bato, mao'y bugtong saksi sa mga linyang in the name of the father and of the son… dayong wiris-wiris sa gagmiting kuyamoy sa imong agtang. Gialingog-ngogan na gani ang kabo sa nagbalik-balik nga mga pahimangno. Bangkilyahan la'g pasalig nga basta mag-behave igka-Dominggo dalho'g Bogo primyoha'g Cornetto; o kaha, igkahuma'g hinawnaw mangaon og wow dayon sa kinaham mong Jack The Giant Slayer manan-aw duyog sa kadako sa imong kalimutaw nga, lagi, ikaw si Jack, the farm boy. Dayong dailos sa daw bato kong palad-- kubalon sa paghigugmang walay nagmanggad--manglugnas sa mga buling dala sa katuigan: gikan sa hubonan, dughan, itlogan ngadto sa kiting lahos na sa imong kasingkasing.

II
Sa karaan, gamayng sinasa nga lamesa, maoy magpamatuod bahin niadtong kan-on ug sud-an nga madyekon sulod sa imong alingagngagan. Diin sa kada samoal nimog bugon, ambot ngano, putli man nga mahupay ang kamasulob-on. Dagkong hungit ug pagtutagidyot sa paghukbit bisan og buwad nga tabagak kun patang-pinikas lang ang gipunit, dundonan og utan nga hunit, o sabaw sa amahong kun mawos nga ginamos nga bisan sa kakabos apan ang kabusog, puyra buyag, nagbagiyos.

III
Ang daan, kuspawng banig nga romblon, nahapatik ang baho sa mga linyang buhian sa kagabhion: goodnight Papa Dongkey,  goodnight Mama Mae, La, Lo, Mano Anie,  goodnight God sa taas, goodnight God sa pikas balay, goodnight Moon, goodnight Sun… Ug sa dayon nimong kapukan ubay sa habol ug halok nga buhian, dinuyogan sa imong ihi matag kadlawon nga dili ra tagdon kay kini sulondon-- mopalagsik sa kaugatan nga ugma abton gyod ang tingusbawan.
IV
Apan sayod ko (oo, kinsa ba'y wala?) sa kabuntagon… dakong baligho na ang tanan: kon ang banig mahimo mang kutson, ang lamesa bildo na ug ang bato kudlitan na sa imong pangalan apan ang akong mga maymay, sama sa akong balak– magpahipi na lang unya sa anino sa mga salibunhong nanagpakabana nga manuyhakaw ibabaw sa akong kalibotan. 


-- DONZKIE B. ATON 
San Remigio, Cebu, Philippines

12.06.2014

sumad sa lampinig


Ang ikot hagbay rang napudpod 
nahilis natunaw—
apan lantip gihapon
ang uylap sa kahimangod.


-- VICENTE VIVENCIO BANDILLO
Dhaka, Bangladesh

iring gilaygit


O Disyembre! Gaksa ko sa katugnaw. 
O hulmigas! O utitod! Supsopa 
ang bilbil nga naglimin sa akong 
katambok. Gipakaon na gani ka, 
sukosuko pa gyod ka! 
Kanus-a nahimong pangaliyupo ang pag-ampo? 
Kon wa nimo gituyo, nganong ang pagkasagmuyo 
ang kanunayng sangpotanan sa pangamuyo? 
Samtang naghuwat sa kaluwasan, 
gidrowingan sa batang yagit og utin-utin
ang abogong bintana sa chedeng. 
Gipanag-iya kini sa obispong opaw, 
nigawas aron manguros sa lim-aw. 
Kon makabuta ang syagit sa yawa, 
mas makabungog tingali ang luha sa anghel. 
Di ba kadudahan ang gilay-on sa langit? 
Tungod kay mas nihit pas iring gilaygit. 
Ang tindero og mani sa saydwok 
di pa hingpit ang iyahang pagtuo 
sa Kahingpitan. Apan di malalis ang iyahang kahinam
sa tanang butang nga lalisonon. 
Naa toy usa ka hapon nga makalisang 
ang kaanyag sa panganod. Makalaay 
ug balikbalik ang pagpaabot kon kanus-a 
mogawas ang bitin sa bag. Kon kanus-a 
matagak ang bukag gikan sa lungag. Usahay, 
sayop pa gyod nga sukod ang ihatag. 
Mao na tingali ni ang multa 
sa tanang tinapok nga kalapasan. 
Kon mamakak ko sa tinuod, 
pwede ba kaha ko mapasaylo? 
Kon buot hunahunaon, mas tulokibon
ang konsepto sa kamatayon 
kon imo itandi sa pagpakabuhi. 
Apan sa tinuoray lang, ako nasuta 
nga kini ra gyod ang problema sa kalibotan: 
daghan na kaayo ang punoan apan 
gamay ra ang pader nga pwede kaihian. 
Ingon ang hubog nga taga Gun-ob 
nga nabun-og kay nakigbugno sa iro. 
Naguba sa hubag nga taga-Babag.


-- ERIK E. TUBAN 
Cordova, Cebu, Philippines

12.04.2014

pagnguyngoy


Diin nga pungtod magtuturok hin kandila?
Diin maghahalad hin bukad? Hin pangadi?
Diin nga tuna an hahadkan han akon luha?
Diin nga salog gin-anod an kasingkasing han akon Nanay?
Diin nga bubon ginlumos an iya tingog?
Diin nga tibod ginlubong an iya kalag?
Kutob san-o an imo paghingalimot ha akon, O Ginoo?
Ha Kadayonan?
Uulikabon ko an kada bato ha Leyte ug Samar.


-- JANIS CLAIRE SALVACION
Tacloban City, Leyte, Philippines

labyog sa mapangahason nga lanog


Giingnan nako ang gihabogon sa bukid,
ang gilapdon sa dagat sa unahan nga misangkad
sa tibuok kalibotan, ug ang pangpang 
nga gihaplaan sa hangin:

"Wa ko mahadlok!
Dako akong buhi!"


-- RIC S. BASTASA
Katipunan, Zamboanga del Norte, Philippines

12.02.2014

kilometer zero

kang Mitch

Dili tinuod
Nga ang tanan nagsugod
Niadtong gabii nga nayagyag ko
Gikan sa bilahan sa akong inahan.
Kon karon dayon malugti
Kining kaugatan, handoma
Kadtong gabhiona
Kanus-a gihuwat tika
Didto sa hawanan
Nga maoy sukaranan
Sa tanang nalatid nga gilay-on
Sa tanang suok ning dapita.
Walay takdol nga buwan. Walay bituon.
Walay daob. Walay gitara. Walay harana.
Abog ang binulhot sa mga sakyanan.
Pagod ang barbekyo sa Larsian.
Dili bugnaw ang Tanduay Ice.
Samtang ang na-Christmas tree
Nga Crown Regency sa Fuente
Nidayan-dayan sa rooftop
Diin ta nabuntagan.


-- IOANNES ARONG
Lapu-Lapu, Cebu, Philippines

kining kasingkasing


paspas ang pagpunit nimo

basin buot nimong ampingan
ug sumpay-sumpayon
pag-usab

nahadlok ko
masamad unya ka
inig hakop ug pupho nimo
sa abog apan 
sa kalit lang
sa usa ka pamilok
nga salin sa kidhat 

nabuhian 

ang kanhi igo rang natipak
sa pagkahunlak ug karon 
hingpit ug dili na matabang
ang pagkagupok


-- NICHEE S. OROCIO
Danao City, Cebu, Philippines

11.30.2014

mga langyaw

... after this our exile …

Gikan
kita
sa lainlaing mga dapit
nga nanganhi 
dinhi 
pag-apil ning pangilin.
Daghan kaayo kita
apan dako ang lamisa
ug dunay luna
alang sa tanan
pagtilaw
pag-ambit
sa tanang mga gidulot.
Uban ning tagay
ug pagbayaw
aron pagsugod
sa atong pagsaulog
magdungan kita 
pagbungat
ning malukpanong pangaliyupo:
Ginoo
sama kanimo
kami daghan apan usa ra.
Panalangini kami.

(alang sa tanang mga langyaw)

-- URIAS A. ALMAGRO
New Berlin, Wisconsin, USA

usa ka dosenang tweet ni mister sa wap-a reglaha si misis


tapoka imong lubi kay moabot ang kudkuran #kaligonadaan

* * *
ipakanaog ang timba sa tabay sa dip-a ko uhawon #evilgrin

* * *
ang baki nga maligo magabii, mahumod sa iwag sa buwan #mutyasasagingtindok

* * *
ang makaob nga kulon pagahayangon sa akong luwag #pwerabuyag

* * *
di kalas og habol ang piot nga katre #tandaykanunay

* * *
ang kabaw sa tunaan di mahadlok magkabulingit #naturalborndiver

* * *
bisag unsaog luto ang buwad, buwad lang gihapon :) #kinaham #kalami

* * *
RETWEETED: traduttore, tradittor #iloveyoutodotodowaybreakwaykambyo

* * *
yoga-yoga pod tag ginagmay @mamabear #maldito

* * *
ang bugnaw mong tinughong init-initon inig kadlawon #maghimayaka

* * *
ang itlog mabugok kon di lumloman #ayayay

* * *
RETWEETED: ain't over till the fat lady sings #iringgilaygit


--  ADONIS G. DURADO
Muscat, Sultanate of Oman

11.28.2014

tuldok


Kini ang sinugdanan sa linya. Ang mosubay ini lakip ang bala gikan sa usa-ka-mata nga pagpiyong bantang sa tumong, motihol gikan sa pulso lahos sa tudlo nga sumpay sa gatilyo. Pastilan, pagkabulahan sa bungol! 

Kini ang tugpahanan sa lamok hangtod mokatap sa dugo ang pagkalanag. Kon naunhan pa sa dagpi, unta dili usa ka sagpa ang ibawos ugma damlag alang sa mananagna.  Ay, kawang lang ang gibasa sa iyang pak-an nga kidhat dihang mitugdon sa palad! Pataka lang pod og lupad ang hangin nga nabulit sa dag-om. Butikaw, butikaw… tyabaw! 

Kini ang tumoy sa pabilo. Ug ang kandila mahimong hulmaon pag-usab gikan sa iyang pagkalanay. Duna po'y kidlap nga makadlit sa puthaw nga panit sa lingganay inig labyog, igo na nga motay-og ug mohilis sa nabagtok nga atuli. Paminawa, talinis gihapon ang hagit sa mga langgam bisan kanunay gipahinungdan sa tirador, gisakdapan og mga tipak sa bato. Basin ingon ini pod-- dili hitupngan ang kahait, puno sa kaluoy-- ang tinutokan sa Ginoo. 


-- MICHAEL U. OBENIETA 
Topeka, Kansas, USA

proben*


"… short for “proventriculus"… that part of the digestive system among birds and chickens between the crop and the gizzard…" (gikan sa artikulo nga giulohan og "Proben– the popular street food in Cagayan de Oro")
Gikuot ug gilabnot 
gikan sa kinahiladman sa manok, 
giputol sa sumpay nga batikulon dayon
giwaswasan, giharinahan, giprito, gituhog.

Kini ug uban pa galaray--sa wala pa 
gilusad ang pagpahapsay sa dalan--
gahuwat sa mga busawan 
nga gamulo sa kagutom.

Ayaw og kaulaw bisan wa'y panghunaw.
Kinawboy ni nga stayl. Wala'y platohay.
Apan wala la'y utangay!

Hulbot og maskin singko aron sugdan 
ang pagtuslob sa sawsawan hangtod
maghuot ang tiyan sa gasagol nga
kahalang, katam-is, kaaslom
nga isuwa sa puso samtang mangandam 
ang palad sa pagsalo sa gatulo nga sarsa.

Ang makatagbaw naa ra sa Pabayo gatapok.
Makita ra, sa dili pa mahanaw, sa suok.  


-- MAI SANTILLAN
Calaanan, Cagayan de Oro City

11.26.2014

annaprashana sa alkansiya


gikan sa mabudhiong isla sa mga damgo 
gikugihan ko pagtuhil aron modahili  
ang tanghaga sa hinanali mong pagbiya 
gipaningot ang nipis nga kutsilyo 
nga gihulga sa nagkurog kong kamot 
kapila ako mawad-i sa balanse
sa akong paglatay nga gakinto 
sa inanayng milugak ug miyunyon 
nga utlanan sa kahayag ug kangitngit 
samtang dulot sa danghag kong kalimutaw 
wala sa kaugalingon nga gikudlit 
sa balikog nga pahiyom sa tagoangkan 
ang kontrasenyas sa kalipay


-- VICENTE VIVENCIO BANDILLO
Dhaka, Bangladesh

niadtong nilabayng gabii


Ang hanging amihan
buot untang mohapyod
lahos sa akong kabukogan

apan igo ra ning gidagit  
sa aligato nga gikagod  
sa imong kablit. 


-- JONDY M. ARPILLEDA
Tagum, Davao del Norte, Philippines

11.24.2014

thanksgiving: gugmawit alang sa akong kapikas


Ikaw mao lama'y alang kanako hangtod sa kahangtoran
Ang handumanan sa panaghiusa sa atong kapalaran
Giawit sa mga lingganay sa simbahan sa kabatan-on
Ikaw ug ako pabiling makanunayong masinabtanon
Bisan pa sa hinagawhaw sa nagkahinayng mga taligsik
Ug pagpangalugti sa paraisong kabaskog ug kalagsik
Oh, igo na ba lamang kita sa mahandumong pagpanghapnig
Ug pagpangindahay human sa kuwarenta ka mga tuig
Nga pagtagayay sa dugosnon ug dugamisnong pag-amuma
Pinakamithing kadulog kapikas higala hinigugma?
Minahal daghang salamat sa waykinutoban mong pag-unong
Kitang duha padayon sa panaw waypagkutat waypaghunong


-- MELQUIADITO M. ALLEGO
Des Allemands, Louisiana, USA

Daghang salamat sa mga maniniyot nga gapaambit sa ilang mga hulagway sa Google ug Flickr.