4.30.2014

tigpahinumdom


"I watched c-beams glitter in the dark near the Tannhäuser Gate."
–Roy Batty

Nagkinahanglan na ako og tigpahinumdom 
sa inadlaw kong gimbuhaton 

karon sa akong pangedaron 
dili ko na maatiman ang tanan

labi na kay ang akong panumdoman 
nagsigi na man lang og balik sa kagahapon 

nga ako na lang ang nasayod 
ug mahanaw ra usab sa akong pagbiya


-- VICENTE VIVENCIO BANDILLO
Dhaka, Bangladesh

lanog sa duha ka linyang panghupaw ni Ezra Pound samtang gilaay og paminaw sa dugdog ang mga natanggong sa baha sa eskina Sanciangko-Junquera


Sud-onga                 ang mga gamug-ot           sa aseras      :
Mga lusay      nga nalukot       sa batoon nga langit     .


-- MICHAEL U. OBENIETA 
Topeka, Kansas, USA

4.28.2014

mga panig-ingnan


Ang aso di makumkom.  
Ang mga tinagoan 
mahimo pang makagawas
maski’g tua na kumkoma
sa ilalom sa lubnganan.

***
Ang mangga di mamunga
og bayabas.  Apan kon
ang usa ka punoan 
punoan sa katam-is, 
bisa'g unsa ang iyang bunga
manag-iya usab og katam-is.

***
Mag-unsa man ang kumpay
kon wa'y kabayo?
Mag-unsa man ang balak
kon way magbabasa?

***
Bisa'g unsa kataas ang prosesyon
adto gihapon matapos sa simbahan.
Bisa'g unsa kalayo 
ang atong mga pagpanaw
mobalik kita gihapon 
sa atong gigikanan.
Ang tanan mga paglibotlibot lang
sa sirkulo sa panahon.


-- URIAS A. ALMAGRO
New Berlin, Wisconsin, USA  

giatitod nga bahaw


kagagmay nila
apan kadako sa paningkamot 
pagkutkot sa usa ka bandihado
nga tinakoban ni mama
sa among nabahirig 
nga lamesa

kaabtik nila
gakaguliyang og saka-kanaog 
bisan gitaktak nako 
gikagubtan gihapon nila 
ang nahulma nga sampot 
sa giuling nga kaldero

kapaspas nila 
galumbaanay sa ilang kaharab
pag-ikyas sa kamatayon 
kon sila akong irokon samtang 
nakat-on na ko karon paghaling
likay sa kagutom


-- LESLIE S. NUÑEZ
Compostela, Cebu, Philippines

4.26.2014

gutom nga Narcissus


gamayng pinikas nakong unod
gisawsaw nako sa suka 

nga giahosan ug gisilian
gikilaw ko ang akong kaugalingon

haskang halanga sa akong dila
gisumsoman nako akong palad

sa akong kauhaw gisalod ko 
ang akong singot ug gisamdan ko 

ang akong kasingkasing
ug sa hinayhinay giyarok nako

kining tagay sa aslom kong dugo


-- RIC S. BASTASA
Katipunan, Zamboanga del Norte, Philippines

duha ka lalaki nangamatay nga naglaway sa kalipay


Usa ka bayong-bayong nga gituohang kaliwat og langgam ang gidagsang wala nay kinabuhi ug nagsugod nag kadubok sa baybayon kagahapon sa hapon.

Ang wala pa mailhing bayong-bayong, matod sa mga nakasaksi, dunay dakong pako sa wa pa matinong matang sa langgam. Apan gawas niini, matod nila, wala kini'y sungo ug dili pinaypay ang mga tiil nga magmatuod nga siya usa gayod ka langgam.

Sa pangagpas sa kapolisan, "naaberiya" sa iyang paglupad ang bayong-bayong nga langgam ug didto hagsa sa law'd hinungdang nalumos kini. Nahinugon ang kababayen-ang gikahinabi ning mantalaan kay ang dagsa raba unta hitsuraan. 

“Sayang iyang kagwapo kay di na katilaw og tawo,” pasiaw sa matronang si Divo nga nanghupong ang mata og hinilak.

Ilubong karong adlawa ang gidagsang minatay, apan nagpabiling kahibulongan ang iyang pagkatawo-nga-langgam ug ang kamatuoran sa mapintas niyang gidangatan.

Sa laing bahin, gahi ug tuskig nang gilandig sa tambalanan ang usa ka haligi sa panimalay (ngalan gipugngan) human gihalara’g belly dancing sa babayeng gikakuyog sa motel.

Gideklarar sa mga doktor nga dead on arrival ang usa ka magtutudlo human atakeha sa kasingkasing pasado alas tres kaganihang kadlawn. Ang babaye (ngalan sab gipugngan) mitahan hinuon sa iyang kaugalingon ngadto sa kapolisan.

Sa pasiunang panukiduki, miangkon ang babaye nga wala sila'y relasyon sa namatay, ug igo lang siyang gibayran niini human sila magkahinabi su'd sa usa ka baratuhong imnanan.

“Iya kong gipasayaw ibabaw sa kama kay wa na kuno'y lami iyang asawa,” matod sa babayeng nagtabontabon sa iyang naw'ng.

Sa kalagot sa asawa, gipasakaan niyag kasong homicide ang babaye ug gihimong accessory sa kaugalingong kamatayon ang giatakeng lalaki. 


-- IOANNES P. ARONG
Lapu-Lapu City, Cebu, Philippines

4.24.2014

ginadili sa hinam-is


kwidaw
nianang karmelitos 
sa imong pag-agulo

gatakla gatagamtam
sa dugos nga mapanas
ang katam-is

walay atik lisod gyod
kon masamdan busa
paghinay-hinay

adunay labing mangtas 
kangulngol nga walay kugan
walay purohan nga maayo

kinahanglang putlan og
tiil kamot panimuot aron 
makapadayon nga tibuok


-- TEA SOLON
Cebu City, Philippines

domingo


Bitaw, mahimong molanog ang kahilom
diha sa kangitngit kon maaninaw ang katahom 
sa kahayag. Gahapon sa hapon, gipakita 
sa kalibotan ang iyang samad sa dughan
diha sa usa ka yagit nga bata gawas 
sa karaang simbahan diin kita gatapok, 
gaampo sa mga butang nga dili maato
sama sa tayaon nga mga lansang sa palad
nga buot natong ibton. Ug kanunay ang kaguol,
kay wa'y kutas ang kamatayon sa kinabuhi.
Sagad sa kabuntagon sa Domingo, samtang 
gahigop ko'g kape, gihapit pod ko sa mga maya 
ug gipaminaw nako ang ilang mga tihol ug kanta 
nga dili gyod nako masabtan. Ug kana mismo
usa ka milagro. Nga kita naa'y mga kinutoban.
Usahay, mabati nato ang kapakyas sa kinatumyan 
sa kadaogan. Usahay, gapasiplat ko sa Ginoo diha 
sa aso sa sigarilyo nga akong gisuyop samtang 
gahulat ko nga pun-on ang langit sa mga bituon. 


-- SIMON ANTON NINO DIEGO BAENA
Bais City, Negros Oriental, Philippines

4.22.2014

sumilaw


Siyam ka baylan nga nangabuta sa kahayag
Ang saysay sa gihuptan mo karong bansagon.
Kanus-a man mosilaw ang bituong magalamdag
Aron makakita mi sa karaan mong panan-awon?


-- ANIJUN MUDAN-UDAN 
Malaybalay, Bukidnon, Philippines

kining nagkamoritsing nga baybayon sa dumlog


Lahi sa mga baybayon sa Boracay ug Bantayan 

Nga moamag bisan sa mga gabiing di matugkad 
Ang kangitngit kay wa hikita ang tagolilong 
Nga buwan sa bisag asang suok 
Sa kawanangan, ang baybayon sa Dumlog 

Itomon, 
Batoon, ug nabulit sa daghang sagbot. 

Apan daghan gihapon ang madagsa dinhi 

Labi na sa mga adlawng Domingo 
Sama niaron. Kasagaran usa ka pamilyahan, magsawo 
Diha sa daplin sa bawon nilang bahaw, 
Pansit bihon ug sinugbang budburon nga kasagarang
Paresan og kinilawng lukot, guso, 
Sunglotan. 

Sa tapok sa mga tang-an, aw naa gyod pirmi 
Nang Kulapo ug Royal nga klarong maoy hinungdan 
Sa kapuwa na karon sa ilang hasang. Ug diha

Sa mabawng bahin sa dagat, naa 
Ang mga batang nanagduwa, nagkinataw-anay, 
Gani sa tanto nilang hamag, kalit adunay moiyagak.
Apan hinuon, mohilom ra man pud dayon. 

Makita nimong pwerte na gyong pagkapagtong 
Aning mga kanahan nga og motingsi, 
Ngipon na lang gyoy puti. 

Dinhi karon, wa kay laing madungog 

Kun dili ang way undang nga pagkapusgay sa mga bawod 
Diha sa baybayon 

Ug kining mga katawa ug bahihi nga nakighagwaay 
Sa naghaguros nga Amihan kansang paghasmag 

Ug pagpanghadla matag karon ug unya, tingali 
Maoy hinungdan 

Nganong adunay kabug-at diha 
Sa imong mga lakang.


-- JEREMIAH BONDOC
Sanciangko, Cebu City, Philippines

4.20.2014

kadtong buta duol sa simbahan sa Sto. Rosario


Giludhan nimo ang mga nanglabay. Ug tataw kaayo
ang kilumkilom nga imong giantipara bisan pa'g 
wala nako mailhi kon kinsa'y miguyod nimo dinhi 
sa gidugokan nga eskinita. Dinhi sab ko sagad 
maabtan sa orasyon gikan sa inadlawng tulomanon.
Ug sama nimo molanog sulod nako ang kampana
nga daw mobuak sa buwan ug kabituonan. Dayag,
ayaw kalimot, nga managlahi ta og gipaabot atol
sa imong pagpaminaw sa sinsilyo nga motagiktik 
sa imong gihuptang sudlanan. Dili pod baya ko layo
sa kanaway kuyog sa awaaw nga panaw sa mga kabog.


-- DENNIS S. SARMIENTO
Baltimore County, Maryland, USA 

bahin Kaniya


“Giuhaw ako.” Niingon ang gilalis 
nga Hari sa mga Hudeo, gipaabot
                 
nga Manluluwas. Kadali pagsulti:
andam ka modagan karon

padung Kaniya bitbit ang tubig
ug pagtuo. Pero dili kaha kahadlok

ang mohawid kanimo sa dihang 
duolon ka sa mga naninggit

nga Siya ipalansang? Dili kaha
motulo ang imong singot

sa kalisang sa unang sipat
sa mga sundalong Romano?

Ah, kasayon pagsulti kon unsay
gituohan! Ang tinuod--

masukod ang kalapdon
sa atong kaisog, ang gilawmon

sa atong pagtuo. Salamat na lang
kay ang tanan bahin Kaniya

walay sukod, walay utlanan.


-- DELORA SALES-SIMBAJON
Butuan City, Agusan del Norte, Philippines

4.18.2014

hubad sa balak ni Robert Frost


Ang Dalan Nga Wala Subaya (The Road Not Taken)

Duha ka dalang gasanga sa dalag kahoyng nagbarog,
Ug gikasubo kong dili masubay duruhang dalan
Ug mahimong usang maglalawig, dugay kong nagtindog
Ug milantaw paubos sa kinalayoang masabog
Hangtod diin kini napiko liyok sa kabugangan;

Unya midulhog sa lain, kaamgid sa pakig-angay,
Ug kayha naghambin og labing maayong pag-angkon,
Tungod kay kini sagboton gustong masul-ob kanunay;
Daw ang pag-agi didto usang ritwal sa kapulihay
Nakapughaw ug pagabok pupareho lang hinoon

Ug ang duruha nianang buntag susamang gahigda
Sa mga dahon way lakang sa tunob itom gilalik
Oh, gitipigan ko alang sa ubang adlaw ang una
Diay paghimatyag unsang dalan mosangko sa usa
Ako natahap kon ako kayha sa damag mobalik.

Ako maghinugilon niini uban ang pangagho
Mahadiin-diin ug maedad-edad karon gikan:
Duha ka dalang gabulag sa kakahoyan, ug Ako--
Kadtong dalan nga diyutay rang nisubay gipili ko
Ug kana mismo gahimog tanang lakad kalainan.


-- MELQUIADITO M. ALLEGO
Palm Harbor, Florida, USA

sa babayng nakit-an nako sa samin


Nasayod ka-- moabot ang pagbudhi inig gabii,

mokamang sa ilawom sa imong panit, mokutkot 
sa iyang kabag-on aron mahabilin ang nipis
ug humok nga unod 
sa lain nimong kaugalingon.

Inig luno sa mga balahibo sa kanhi 
ikaw, mahimugso imong kalag ug motuyok kini 
sa mga nagsubong dalan sa dakbayan, mangita 
sa tanan nimong sinalikway nga nahidlaw 
sa imong hikap sama sa pagkuyos niini
kon matandog sa adlaw.

Ug sa dihang wala siya'y makit-an, sukwahi 
sa imong pangagpas, dili siya maglingkod 
ug manampiling. Kay nianang taknaa, manggawas
ang mga pulong sa kapungot gikan sa iyang itom 
nga baba: mga pulong nga nagpaghot 
sa hamis nga kahilom. Dili siya manumbaling 
kon kinsa'y makabati. Kay nianang panahona, 
milupad na siya, nagmaya halayo sa imong 
kinumo nga kaugalingon.

Inig mata nimo sa buntag, usbon 
ang pagkabuak-- mohunob ang mga tinagsip 
sa imong panit ug magtipun-og sa layo 
nga paghuwat sa pagtapok sa kadulom. 

Andam ka na ba sa pagtubag? Karon 
nga nasayod na ka sa imong laing 
kaugalingon, sama sa imong nasayran 
sa sinugdanan pa, andam na ba pod ka 

pagtugyan ini sa kahayag?


-- MA. CARMIE FLOR ORTEGO 
Talalora, Samar, Philippines

4.16.2014

barbero


Buntag sayo pa gani
galaray na ang mga magpatupi
diha gawas sa payag ni Carlo
ang inilang barbero sa among baryo
tungod kay modawat lang man kinig sinsilyo
o, niya pa, kanang igo lang panigarilyo.

Karon may miabot nga gadalag shih tzu
kay dollar daw kaayo
magpa-groom sa pet shop didto sa sentro.
Mikuha si Carlo og lahing himan
ug alistong migunting sa labong nga balhibo
kay niya pa, “moalot man gani tag liyon,
iro pa ba hinuon.” Dihang iyang nakita

ang nanguyamang nga mga pulgas,
gibati siya’g kakatol nga di mahimuyo
diha sa iyang ulo nga hagbay ra
wala matupihi.


-- GRATIAN PAUL R. TIDOR
Dipolog City, Philippines

kinaham


Sa imong agik-ik 
nituasik ang katam-is sa pagkulitog nako 
og balhibo sa manok sa imong dalunggan
usa ka hapon nga gapauraray ka,
gaunlan sa akong paa.  

Agi’g panimalos, gikusi nimo akong kilid
ug kalit lang kang misulod sa lawak. 
Gisundan ko ikaw subay ug dam-ag 
sa danlog nga pamaagi lahos
sa imong paghangos.

Duyog sa gahuyop nga hagashas 
sa kadahonan, nakalimtan nato ang landay 
nga basakan, ug nasiak sab ko dihang
ang kahinam makabusdik gumikan
sa imong agik-ik.


-- JONDY M. ARPILLEDA
Kapalong, Davao del Norte, Philippines

4.14.2014

wandog-wandog


Gadagan gakurog subay sa bukog.
Gakurog galaway latay sa tukog.
Galaway gasayaw tugpa sa tungog.
Gasayaw gabitay—itlog sa hungog!


-- VICENTE VIVENCIO BANDILLO
Dhaka, Bangladesh

sabwag


Gitapok ang matag lusok.
Ang uban linumbay sa mga badlis 
nga anaa sa ilang palad.
Ang uban mitapot sa kubaw 
nga gipaturok sa ilang dugo ug singot.
Karon nga panahon 
sa katraynta ug katulong subay sa buwan,
kini ang pagsabwag sa mga lusok sa balas
ngadto sa lawom nga dagat.
Wala'y lain nga mahimo kon di
ang pakigduwa sa mga bawod 
aron ipakita ang kahalangdon.
Ang usa ka lusok, nahimong duha;
ang duha, nahimong gamay nga isla;
ang isla, nahimong nasod;
ang nasod, milihok ug nahimong kalibotan. 
Ta na, mga balas ug maghimo ta'g
kalibotan nga moagak 
sa mga bag-ong balas nga mapadpad 
sa kawakatan ug kabatoan.


-- JAKE MALON
Libertad, Baclayon, Bohol

4.12.2014

uban sa mga panganod


Sama ang pagsilang sa adlaw
matag buntag. Apan mabalhinon
ang atong paglantaw sa iyang kahayag.
Ang kabungtoran, ang mga kahoy,
ang kabalayan wa matarog
sa ninglabay’ng gabii.  Apan kita
nagbalhinbalhin sa atong nahimutangan.
Ang adlaw motadlas sa samang dalan
sa langit.  Ug kita dad-on ug mouban
sa lumalabay’ng mga panganod.


-- URIAS A. ALMAGRO
New Berlin, Wisconsin, USA   

nagmanya ang igat kong musa


Kadaghang higayon na nga ikaw gipaabot
diri sa kahilom. Usahay, samtang gadahom ko 
nga motungha ka, hastang nihita pod sa imong 
mga hunghong. Wala'y hangak. Wala'y gitik 
nga gadala'g litik nga pasumbingay. Ug dili 
mohubad sa akong unod nga tugbang sa ting-init
ug ting-ulan. Wala na imong pinakatay nga agi,
motila sa akong dunggan tadlas sa dughan: 

Ay, Naunsa naman tawon ka, Ton? Kon ganahan 
magyampungad imong dagway nga hawan pa 
sa papel, kadaghan ba uroy sa imong pasumangil!
Mangita'g trabaho. Magtagay uban sa kahigalaan.
Ug karon magkapuliki'g review para sa Law.
Law, law sa imong mata! Kanunay man lang ka'
tan-aw og porno sa imong laptop samtang ako 
gaabay ra nimo pirmi, nakahubo na'g pinaabot
ug nabugnaw ang wala igdungog nga bagutbot.  


-- TON DAPOSALA
Cagayan de Oro City, Philippines

4.10.2014

kanunay sa matag higayon


Kanunay sa matag higayon, 
Mangudlot ang akong hilak sa duha nato ka kamot
Ug ang hadla sa takna midalid sa mga tuig
Nga wa lang nato mahapyod sa panganod ang dagon
Sa kabuntagon, ang pahiyom sa kilumkilom ug ang pahit sa ting-init
Nga kalit lang ibanlas sa uwan kon ugaling nalihat 
Ang atong kahiamgo sa mga butang nga wa lang nato damha.
Ang matag linya sa atong palad mao'y di makalimtang
Mapa nga mitultol kanato sa mga hilit nga dapit
Kon pananglit sukdon sa kahiubos, pangluod, gugma
Ang imong pagka-ikaw: Babaye, Inahan, Higala, Amahan.
Hangtod ang imong ngalan manalingsing sa akong kasingkasing.
Hangtod ang imong anino mokatay sa akong dagway.
Hangtod ang imong mga tudlo mamukaw sa akong pagduhiraw.
Gisumpay diay sa pagbati ang naputol nga pisi sa kasing.
Gipalutaw diay sa hapuhap ang mitidlom nga barkong papel.
Giiwagan diay sa inyong mga pulong ang nangahanaw
Ug napapas nga mga badlis sa Buwan-buwan sa kabatan-on.
Salamat, Nay ug Tay, nadungog ko ang hunghong sa inyong kahilom.

Kanunay sa matag higayon,
Nalisang ako sa haguros sa unos nga nagtakoban lamang
Sa bayhon sa nagyungyong nga mga dahon ug unsa kaha'y dagway
Sa kamingaw kon ugaling moabot kanako ang katalaw?
Igo na ba ang mga takna diin inyo akong gitudloan
Sa pagpanughit og mga nasangit nga tabanog sa panganod?
Niining akong nakawhat nga kadaogan, kang kinsang pungpong
Sa mga buwak ang angayang isabwag ug diin ug ngano
Kon nagpasabot kini sa di malikayang panaw sa kaugalingon?
Kaniadto, atong gidangaw ang gitas-on sa bangaw.
Kaniadto, atong gitikang ang mga nagbabag nga kal-ang ug utlanan.
Kaniadto, atong gigukod ang nag-aginod nga alimpu’s ug aninipot.
Kay lagi, gisukod pa man sa liboan kong mga pangutana
Ang bulok, hulagway, hiwid ug hitad sa gamay kong kalibotan.
Igo na kaha ang inyong agak nga maoy mihatag kanako'g
Kusog aron padayong mangapkap ug mangaplag
Sa tanang nasaag ug gipanggukod kong mga damgo?
Kanunay sa matag higayon, oo, kanunay sa matag higayon,
Nanghunghong ang inyong kahilom nga sulod kanako
Namungpong, nanggihay ug mibanay. Salamat, Nay ug Tay!


-- NOEL P. TUAZON
Dauis, Bohol, Philippines

lubi


Ting-init na. Sugwak ang kaputi sa balas nga nadapyaan
sa kahayag sa adlaw. Bantok ang mga lubi, walay kisaw
ang ilang mga lukay. Tan-awa unsa kaugtok ang tanan.

Tan-awa ang kahilom. Karon, ang akong lawas bunbon 
alang sa mga lubi. Yano ang pagpundo sa ilang anino
sa tibuok kong panit. Sila naglaksi sa kainit, nagwagtang

sa panahon. Wa ko nanginahanglan og landong,
buot ra kong mohigda, mohangad sa langit, motan-aw
sa tumang kahayag, ug mawala. Ay, kalinaw! Wala kini 

laing pangayoon kon dili ang akong pagduyog.Wala kini 
nanginahanlan bisan pa'g kabughaw sa dagat, pundo 
sa mga kinhason, ug bisa'g usa pa ka pulong. Lunhaw kaayo 

ang mga lukay sa lubi. Mapahitas-on ang ilang mga inat. 
Sakit ang ilang matag lingo-lingo sama ra’g balibad 
sa hangin nga buot mahawok kaniya. Madungog nako 

ang ilang gininhawa, pino ug talinis ang mga balas 
palibot nako. Mao ra' nabugnawan na pod, nabilanggo 
sa landong. Sayod ko-- unya, sa pag-abot sa berano, 

mao ra'y matilawan nako ang kamig nga kapait, 
sama sa mabatyagan sa dihang mahunahunaan nako
kadtong isla nga dili na maabot sa akong panan-aw…


-- JESSREL E. GILBUENA
Bantayan, Cebu, Philippines

4.08.2014

mubong sugilanon sa taas nga kahidlaw


kapeng hagbay nabugnaw
ug gihulmigas nga plato
sa kamoteng gibarbekyo 

samtang sa pagkatagpilaw 
sa imong dughan gahaylo
ang bilangkad sa libro


-- RIC S. BASTASA
Katipunan, Zamboanga del Norte, Philippines

sa abuhon nga panganod


Kon ikaw diha puno na,
Angay mobuhagay, ambot ba 
Kon makahigayon ka pa
Pagsuway sa pagpugong?

Bisan gaawas ang kahinam
Sa tanaman ug tanang mala 
Nga tahas sa mag-uuma,
Ug sa mga batang kiatan--

Naa ka ba'y buot ibilin alang 
Sa mga nanginabuhi sa dalan 
Sa mga nahadlok mabahaan,
Sa mga gitakig ang dughan?


-- ADONIS R. ENRICUSO
Dumingag, Zamboanga del Sur, Philippines

4.06.2014

furor scribendi: dudho nga laway sa diwalwal nga laraw


Gisundan sa akong kahilom ang linya
sa mga hulmigas duol sa akong tiil. Kalit lang naamang 
ang bata nga gapanikad 
sa atop
             sa akong panumdoman. Nadagit uban 
sa iyang tabanog ang tingog sa iyang pagping-it. Karon, 
gadaguok ang wanang sa akong paghuwat. Kanus-a

padparon duyog sa akong panghupaw
ang tuldok? Tan-awa ang usa ka tibugol nga asukar. Kini 
igo nang mopalup-og sa labing linghod nga kargador 
sa Carbon. Nganong nisalibo iyang singot 
lahos dinhi 
                     sa gihukdongan nga lamesa diin gabalik-
balik ang lagubo sa dag-om, nilaksi ug nikumot 
sa akong panghuy-ab?
                                      Layo kaayo. Wala ko 
kahawid sa labyog nga dila sa manulunda. Pastilan, 
wala pa intawon matagbaw akong pagtutok, naniid
sa iyang anino. Basin kining aso sa kape. Sagdi lang

kay unyang gabii na pod balikon ko ang pagpanaw 
hangtod makabay-an ang kapakyas. Bahala na'g
magupok akong antyohos, padayon kong magpanilap
pag-asdang subay sa kalawom 
                                                       sa awaaw. Andam
gihapon ko sa akong kidhat. Wa'y kutas ang pag-aswat
sa gakamang nakong panimalos.


-- MICHAEL U. OBENIETA 
Topeka, Kansas, USA

panimalos sa musa


Pirmi lang ko nimong ipadaplin,
binlan ra sa imong mga mumho
nga oras. Sige lang kang busy:
pagpangita og kwarta,
pag-atiman sa imong kapikas,
laag-suroy kauban
ang imong mga higala.

Pwes karong gabhiona,
alirongan ti ka. Singgitan
sa mga pulong nga gilaayan
sa pagpaabot. Uyugon 
ang imong mga kamot
hangtod mokuha ka
Og ballpen, papel o laptop.

Dili ko mohawa. Akong mando:
sulat hangtod mohayag  

ang akong kangitngit.


-- DELORA SALES-SIMBAJON
Butuan City, Agusan del Norte, Philippines

4.04.2014

hubad sa Iningles ni Richard Zenith sa Portugis ni Ricardo Reis

anino sa bulak

Buot kong angkonon ang bulak nga mao ikaw, dili kadtong imohang gihatag.
Nganong idumili mo man kanako ang wala ko pangayoa gikan kanimo?
Aduna ka pay panahon pagbalibad
Kon nahatag mo na kini.
Bulak, pagpakabulak alang kanako! Kon, sa kahakog, kutloon ka
Sa kamot sa engkanto nga walay palad, maglatagaw ka hangtod sa kahangtoran
Isip usa ka balighong anino,
Nagpangita sa wala nimo ikahatag.

-- VICENTE VIVENCIO BANDILLO
Dhaka, Bangladesh

kalimot


Karon pa ko, wala diay ikapadala ang sulat sa akong kalipay.
Hiabtan sa kausaban sa panahon,
Dalag na ang papel; ang mga titik, sa akong tan-aw,
Wala na magsapnay niadtong damgo nga
Milatas sa eternidad. Ang mga linya
Korni na kaayong hunahunaon nga pugos gitago
Ning abog, upos sa sigarilyo, tisyu. Kampat na
Kaayo ang kahulogan. Tingali, dalag ang kolor
Sa kausaban. Angso ang baho sa patayng kagahapon.
Itom unta, lubos nga itom ang kolor niining sulat
Ug isdang dubok unta ang baho sa akong lawak.
Ug labaw sa tanan ang handomanan sa imong baho 
Nga buhok wala unta mamilit sa kurtina sa akong utok.
Apan kay mibalik ka man uban ning dalag nga handomanan
Agwantaha ang baho ug kolor sa akong kausaban.


-- OMAR KHALID
Metro Manila, Philippines

4.02.2014

ting-init


nahubas na
ang lim-aw
taliwa
sa basakan
diin inig ting-ulan
labong ang kalipay
sa mga kinaham
ang tangkong

karon nga nia na
ang ting-init
wa niini maapil
og kahubas
ang nagtubod
nga kalipay
sa mga batan-ong
nagkalapok
sa pagpanglimas
og halwan


-- GRATIAN PAUL R. TIDOR
Dipolog City, Philippines

bungaw ang "kalinaw"


Nalimtan na ang iligal nga palit sa Paris.
Nalimtan na ang genocide batok sa lumad.
Nalimtan na ang legal nila nga pagpanulis.
Nalimtan na ang lawom nga mga samad.


-- ANIJUN MUDAN-UDAN 
Malaybalay, Bukidnon, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.