4.06.2014

panimalos sa musa


Pirmi lang ko nimong ipadaplin,
binlan ra sa imong mga mumho
nga oras. Sige lang kang busy:
pagpangita og kwarta,
pag-atiman sa imong kapikas,
laag-suroy kauban
ang imong mga higala.

Pwes karong gabhiona,
alirongan ti ka. Singgitan
sa mga pulong nga gilaayan
sa pagpaabot. Uyugon 
ang imong mga kamot
hangtod mokuha ka
Og ballpen, papel o laptop.

Dili ko mohawa. Akong mando:
sulat hangtod mohayag  

ang akong kangitngit.


-- DELORA SALES-SIMBAJON
Butuan City, Agusan del Norte, Philippines

1 comment:

rsb said...

Ton Daposala
1 hr ·
nagmanya si misis musa

Makapilang higayon ako gapaabot

nimo diri sa kahilom. Kon motungha man ka,

bitin lang imong mga hunghong

sa dulom. Wala nang mga linya

nga makahangak sa baga.

Wala na imong pasumbingay

nga makagitik sa akong tingkoy.

Wala na imong mga hubad

sa akong unod atol sa ting-init

ug ting-ulan. Wala na imong pinakatay

sa imong bolpen nga gatila

sa akong dunggan ug dughan.

Naunsa naman tawon ka, Ton?

kon maginatbangay man lang

imong nawong blangko pa sa papel.

Kadaghan ba sa imong pasumangil uy:

nangitag trabaho, nagtagay uban sa higala,

ug karon na-busy’g rebyu para sa Law?

law, law ka lang! Nga sige lag tan-aw

og porno sa imong laptop.

Unya ako naa ra pirmi

sa imong abay, naghubo

ug namugnaw sa sige’g paabot

diri sa kahilom.


Daghang salamat sa mga maniniyot nga gapaambit sa ilang mga hulagway sa Google ug Flickr.