7.31.2014

baybayon


Nagpinal ang gitaga nga iho-- 
Napadpad sa balas,
Gikuhit sa balod samtang iyang ginhawa
Gihikyad sa hangin.

Gidugukan sa mga tawo
Ug mga sabaang langgam
Nga daw korona sa usa ka haya.
Ug nidulom ang palibot pagtambong

Sa mga langaw. Ang usa, 
Nabusog, ug dihang gisagpa
Nahimong lama sa palad sa
Usa ka igmat nga bata.

Ang bugsay ug pukot gitidlom,
Gipabug-atan og kalabera
Sa mga kagusbatan hangtod ilalom
Ning karaang mga unos-- mga manulunda 

Nga gama sa bildo,
Sidlak sa adlawng nilapos sa bintana:
Kaguliyang sa gisi nga layag,
Mga tripolanteng nalumos,

Mga barotong napikas
Sa pagsugwak sa tubig, sa pagbuslot
Ning mga butang nga padayon napadpad
Dinhi ning tampalasang baybayon.


-- MARIA VICTORIA BELTRAN
Cebu City, Philippines

sibaw


Ilalom sa punoan sa talisay, pagkahilom 
sa buang nga galantaw sa pag-ubog 
sa adlaw diha sa lawod. 

Ug kalit siyang mibuhakhak,    

nag-ambak-ambak dihang gipungpong 
sa kangitngit ang mga salin
nga sibaw sa langit.


-- JONDY M. ARPILLEDA
Tagum, Davao del Norte, Philippines

7.29.2014

alang sa tanang kadugo nga gipahinungdan ni Mahmoud Darwish


Hangtod tingali balik sa akong pagkaabo, ang Palestina 
dili nako mataak. Gapabawod sa akong kalimutaw
ang aso sa mga pasumbingay, gapalawod sa pula 

nga sugwak sa pagkahimugso hangtod sa mga tyabaw
ug kagot nga makapangag. Kutob ra ko sa hilom nga 
pagpamilok, gatabon sa mga panid nga gapalutaw

sa mga tuldok. Igo na kini nga mokupot, modugtong
sa mga tingog laktod sa luha. Dalin-as. Dili malubong…


-- MICHAEL U. OBENIETA 
Topeka, Kansas, USA

ang patag ngutngot sa kalipay


      1

Nagpadungog ang hapon bahin
sa bansilag ni Freud: “Bisag unsa pa 
kadto, didto ko magpakabúhi.”

Ang pagpakabúhi dili sama sa pagpakatawo. 
Sama sa sugò ang pagpakatawo, sunod
sa pulong nga cogito kun “pagka-amgo.” 
Dili kini 
ang tumong ni Freud. Ang kamatuoran 
sa tawo wala sa iyang pagka-amgo.

Adunay tinaguan ang tawo.
Adunay nalimtan sa iyang pagka-amgo 
nga siya dili kunohay hayop.

Nalimot siya nga sa iyang pagpakatawo, 
siya nahimong binuhì sa iyang cogito ug sa mga sugò 
kun bungat gikan sa ubang tawo.
Ilawom sa mga pulong sa uban 
siya nahimong sama sa sunoy.

      2

Kon ang tawo naghandom 
sa iyang kamatuoran, sa kinabúhing 
kaniya lang, kinahanglan siyang mobalik
ngadto sa iyang tinagoang sinugdan. 

Bisag siya naglimod sa iyang pagkatawo, 
sulod kaniya adunay bahin sa sinugdan 
nga wala mahanaw, diin siya
malipayong nag-inusara.

      3

“Dinhi sa patag sa damgo, dinhi 
ang imong tinuod nga panimalay,” 
misabat si Lacan kang Freud.
Ang bunga mga pangutana: Usà pa 
ang tawo mamanday sa damgo, unsaon man niya 
pagtultol sa patag?
Unsa, dili kinsa, ang kaagak?

Sa iyang kinalawman nga kalipay, 
walay makauban. 

Dali masaag ang tawo sa iyang pagpangita.
Ang patag lisod tultulon dili lang 
tungod kay kadto natumong  sa tinagong 
panumdom. Lisod mopangadto 
tungod usab kay ang tawo labihang 
nalamian sa pagpuyo sa laing panimalay.

      4

Sa laktod nga panulti, lamì mangabang
sa moralismong buslot. Lamì 
magpahayahay sa relihiyong haros, 
bisag dinhi napaulipon ang tawo 
sa mga sugò sa uban. Pastilan, 

makalibog! Sa kadugayong nagpailawom 
sa uban ang usa ka tawo, 
nalamian siya sa iyang pagpabuhì, 
nalamian sa pagsupak sa iyang pagkabúhi.

Apan ang kalamì dili kalipay nga sapak 
sa tawo. Unsay nahabilin sa iyang pulos 
samtang siya nagpabiling binuhì? 
Kanunay niyang gihandom ang iyang pagkabúhi.
Nagtuo siyang hagbay ra kining milabay. 

Kadasig ang gakulang— kadasig 
nga biyaan ang laing panimalay, 
ang mga bungat sa uban.

      5

Likod sa kadasig ang laing pulong: 
gugma sa usa ka tawo
alang sa iyang inusarang kinabúhi.
Gugmang dasig ang gikinahanglan
aron buhiàn sa usa ka tawo 
ang mga pulong nga dili kaniya gikan. 

Diha lang sa pagbiyà sa mga gisugò 
sa uban, diha lang siya adunay paglaom 
nga magpakabúhi.

      6

Unsa ang paabuton sa nakaluwas 
sa patag? Didto adunay Butang, 
ngutngot sa kalipay. Wala tinuod masayod 
si Freud ug si Lacan pod nga adunay 
Ginoong tinubdan sa kinabúhi. 

Apan natugkad nila ang kasayoran
nga kining Butang sulod sa tawo
ang nagpabúhi sa tanan niyang kalipay.

      7

Sa kalipay-kasakit nga Butang 
nagliyuliyo ang pagkabúhi sa tawo.
Dinhi naglibutlibot ang iyang pamigà 
ug kusog, dinhi sa bahanding 
dili madangat bisag pamaagi sa 
pagpautog kun pagpakayat.

Sa panahon nga walay masangpit
ang usa ka tawo, dinhi sa Butang 
nagsilab ang iyang pagsugot 
nga mabúhi. Dihang moabot na 
ang takna sa kamatayon, sa Butang
usab nagpuyò ang pagsugot sa tawo 
nga mopanaw.

      8

Dali rang molabay ang adlaw.
Mubò ang higayong sa pagtubag 
sa kahilom nga gisibya 
gikan sa gitagoang Butang:

Unsa man gayod ang imong tinguha, 
ang kangutngot sa tanang kalipay 
nga kanimo lang? Bisag unsa pa kadto, 
didto ka sapak modagan. Didto ka 
manimalay, didto magpakabúhi.


-- JOHN B. LABELLA
Urbana, Illinois, USA

7.27.2014

hubad sa balak ni Robert Bly


Pagpangawat Og Asukal Gikan Sa Kastilyo

Kita mga pobreng estudyante nga nagpabilin human sa klase aron pagtuon og kalipay. 
Kita sama niadtong mga langgam sa kabukiran sa India.
Ako usa ka byuda kansang anak mao ra ang bugtong niyang kalipay.

Ang usa ra ka butang nga akong gihuptan sa sama-sa-hulmigas kong ulo 
Mao ang plano sa magtutukod sa kastilyo sa asukal.
Bisan lang ang pagkawat og usa ka lugas sa asukal usa na ka kalipay!

Sama sa usa ka langgam, kita milupad gikan sa kangitngit ngadto sa balay tigumanan, 
Nga gihayagan sa mga pagkanta, unya milupad paggawas pag-usab.
Ang paghisira kanato sa gawas sa mainit nga balay tigumanan usa usab ka kalipay.

Ako usa ka tiglangaylangay, usa ka ligoy, usa ka hungog. Apan nahigugma 
Pagbasa bahin niadtong mga nakakita og usa ka siplat
Sa Nawong, ug namatay unya human sa bayente ka tuig sa kalipay.

Di ko igsapayan ang imong pag-ingon nga ako mamatay sa di na madugay. 
Bisan diha lang sa tingog sa pulong di madugay, akong hidunggan
Ang pulong ikaw nga maoy mosugod sa kada sentensya sa kalipay.

“Ikaw usa ka kawatan!” miingon ang huwes. “Ambi, tan-awon ta
Ang imong mga kamot!” Gipakita ko ang gikubalan kong mga kamot sa husgado. 
Ang akong silot usa ka libo ka tuig sa kalipay.


Gihubad ni
-- URIAS A. ALMAGRO
New Berlin, Wisconsin, USA

kay dili man maambat ang imong kagamay


1.
bisan imo pang lud-an ang kahitas-an
dili matandog ang bulan ug kabitoonan

2.
sa pagsulay mo 
og pangulihad
sa langit

tan-awa 
nalud-an mo hinuon
ang imong nawong


-- RIC S. BASTASA
Katipunan, Zamboanga del Norte, Philippines

7.25.2014

sa banko


gahinamhinam ang tinun-an
nga iya nang makuptan
ang gipaabot nga allowance

gamuro ang negosyante
nga mubo og pasensya
sa taas nga linya

gahinuktok ang maestra
nga nagkobra sa sweldo
nga ibalayad og utang

gaduka ang teller
og inihap sa kwarta
nga dili iyaha


-- GRATIAN PAUL R. TIDOR
Dipolog City, Philippines

sa imong pagbalik


(tubag sa "OFW" ni Jona Bering)

Ang bugnaw nga daplin
sa katre nitugyan og bahin
sa imong bukobuko.

Karon, ang gihapuhap
sa sayong kabuntagon
lubos alisngaw na lang
sa gihandom nako 
nga pagpukaw bisan og 
salin sa imong gakos.


-- MA. CARMIE FLOR ORTEGO 
Talalora, Samar, Philippines

7.23.2014

kasumaran


Dili sama kaniadto nga sakit pamalandungon 
kon salin-salin na lang sa panihapon ang maabtan--
Ikog sa sinugbang isda. Sabaw sa nilat-an.
Dukoton nga kan-on. Usa ka litro nga basiyo.

Ug karon gisud-ong ni Nilo ang lamisa nga nagkaguot 
sa nagkadaiyang pagkaon--kining mga kinaham 
sa iyang mama, sa iyang papa, sa iyang tulo ka manghod:
bugnaw, lisod tunlon, sama sa wa damha nilang palad.

-- ADONIS R. ENRICUSO
Dumingag, Zamboanga del Sur, Philippines

garay


Nahinumdom ko 
sa kataposan nga hunat 
sa imong gininhawa 
ilalom sa santol

diin naghulat ka 
sa ulan sa gabii 
nga walay bulan 

diin gibugkos
sa kangitngit 
ang lanog sa tihol 
sa hangin 
ug ang kahayag 
sa kandila 
gikan sa payag
samtang niagi ang uwak
nga mibuak sa kahilom
sa mga bituon


-- XANDELYN RACEL REYES
Iligan City, Philippines

7.21.2014

hubad sa balak ni Charles Simic


Gitugotan ka ba pagsulti 
Alang ning mga kahoy nga walay mga dahon? 
Makapatin-aw ka ba 
Unsay pagabuhaton sa hangin 
Sa kamisin sa lalake ug pangkatulog nga kupo sa babaye 
Nga nahabilin sa hayhayan? 
Unsa'y imong nahibaw-an bahin sa dulom nga mga panganod? 
Mga lim-aw puno sa nangatagak nga mga dahon? 
Karaang matang sa mga sakyanan nga gitay-an sa talyer? 
Kinsay naghatag kanimo'g pagtugot 
Pagtan-aw sa mga lata sa serbesa nga nangligid sa kanalkanal? 
Ang puting balabag sa daplin sa dalan? 
Ang tabyogan sa tugkaran sa biyuda? 
Pangutan-a imong kaugalingon, kon ang mga pulong igo na, 
O labaw nga arang-arang nimo
Nga ikapakapa ang mga pako gikan sa kahoy ngadto sa kasikbit
Ug ipaundayon ang pagdis-og sama sa usa ka uwak? 

             
-- MELQUIADITO M. ALLEGO 
Alachua, Florida, USA 

pakigbatok sa mga balod


Daw higanteng salamin sa kapunawpunawan 
ang misatong nga kalantap sa dagat,
kun bolang kristal sa mga panganod
kon sa langit aninawon.

Apan kon nasilo man ni sa wala niya
pagpatalinghog, labaw pa siyang napungot 
kay sa pagkatinuod ang paghunong sa ingon
tabla ra og paglumos sa baybayon.
Busa wala na lamang niya baliha 
ang kahimangod sa naglausag nga bahura1
bisan og pila na ka gapnod
ang mga pulong giluwa sa mga balod:
“Walay kapuslanan nang mga suwata;
Magdaot lang na sa imong mata;
Gikan sa buntag hangtod maghapon og gambalay 
anang mga linyang dili ikatahan sa panimalay.”

Busa agig pag-angka sa kahimalingka
ug pag-uyom sa nagkabalinsuhi
nga mga dughan dihadiha siya nanalinghog na lang.
Ang laptop gipatay dayon gitik-op
apan naunsa nga kini daw duna ma'y buril2
nga dala aron ang salida3 hanoy pa nga
mopadayugdog pinaagi sa pagkab-ot
og usa sa iyang mga libro nga naglaundok.


______________________________________________
mabaw nga bahin sa dagat
himan sa pag-splice og mooring line.
kinaiyanhong paglihok sa mga sakyanan sa dagat


-- DONZKIE B. ATON
Bagtik, San Remigio, Cebu

7.19.2014

kagabhion


Ang kagabhion usa ka lapad nga dalan
sa kamingaw. Ug sa akong nag-inusarang
pagsubay, nakita nako ang nitaliwan
nga pahiyom sa akong mga ginikanan. 
Nadunggan ang saag nga awit sa kanhing
hinigugma. Nihuot sa along tutonlan
ang mga kanta. Unsaon pa man

pagtultol sa iyang utlanan? Unsaon kaha
pag-abot sa kinatumyang kabuntagon?  


-- DELORA SALES-SIMBAJON
Butuan City, Agusan del Norte, Philippines

arong


Nawili ko sa balak
nga gitangag-tangag apan
wala gyod mahikyad.
Agtang nangunot na la'g hinuktok.
Nangyamiid ko sa mga nangatagak 
nga dahon sa Germilina ug tambis
apan nagping-it gihapon
akong mga pulong.

Namunit ko'g agik-ik kang
bay Adonis
Nanganghang nagsubay kang
Ioannes.
Di moubos ang kalisang sa katakos 
ni 'Nang Merlie.

Karong gabhiona gipabarog nako
ang usa ka violet nga kandila sa Simala
aron matapion ang bira 
sa kagahapon-- usa ka tuig na,
ug hilabihang kawili ra ang bugtong
nasugid, nasinati.

Puniton ko'ng akong bolpeng tagsingko
Ug gulis-gulison ang mga pulong
nga natanggong sa damgo.


-- NEA LABRA
Adlaon, Cebu City, Philippines

7.17.2014

sukad sa pusod


Labaw pa sa nahabwa 
nga gatas ang paglutaw sa buwan. Ay, dan-ag 
sa kahidlaw! Nanglad-ok ang tuko, nagdaguok 
ang dughan. Unsaon pagtugkad sa katagbaw? 
Asa man ang utlanan sa akong laway gikan 
gibawod, gililo sa imong agulo? Hagok ra'y 
molugway sa uha. Kakutas sa gabalik-
balik nga pag-inusara! Laing adlaw. Padayon
nga gikupogan sa dili maihap nga tuktogaok 
ang atngal sa sidlakan.


-- MICHAEL U. OBENIETA 
Topeka, Kansas, USA

kabugnaw

(alang kang J.G.)

Unsa diay ang kuwang nako?

Nibarag ang akong pangutana
nga kalit naamang dihang 
nagtapad tang duha sa sopa
ug wala ko nimo panumbalinga
samtang gipalabi mo'g hapuhap 
ang binuhing iro nga gapauraray
sa hamis nimong paa.   


-- JONDY M. ARPILLEDA
Tagum, Davao del Norte, Philippines

7.15.2014

mga butang nga angayan tang hibaw-an mahitungod sa mga kompyuter


1.  Ang usa ka kompyuter way pagtagad sa iyang isigka-kompyuter.
                              
2.  Ang kompyuter way kasingkasing; mosaysay og daghang mga pulong 
nga way nagpaluyong pagbati.
     
3.  Ang kompyuter way kaugalingong panghunahuna. 

4.  Ang kompyuter way kalag.

5.  Ug ang nahibiling mga butang mahitungod sa mga kompyuter,
tingali’g imo nang ningbaw-an.


-- URIAS A. ALMAGRO
New Berlin, Wisconsin, USA

unta bation mo unya


bisan og ang mga bintana
imong gisirad-an

bisan og gagakos gihapon ka
sa imong unlan 

madungog gihapon ang awit 
sa kalanggaman

didto sa gawas ibabaw
sa kakahoyan

basin baya ikaw lang gyod 
ang ilang gihalaran


-- RIC S. BASTASA
Katipunan, Zamboanga del Norte, Philippines

7.13.2014

kumpay


Kay kon ang bukid dili makaadto kang Mahomet
si Mahomet man ang moadto sa bukid,
mao kini ang eksena:
kay ang pinangga kong kabaw dili ko man tugotan nga moadto sa sibsibanan
kay nahadlok lagi ako nga atol niining balaan nga adlaw
basin masayop siya bisan tuod upat ang iyang tiil, 
ania ako karon
nangumpay ginamit ang bag-ong binaid nga sanggot
nga sa akong mga kamot nahimong buwan nga mao pay pagsubang
nga misiwil daw sungay 
sa garbosong bukid.


-- VICENTE VIVENCIO BANDILLO
Dhaka, Bangladesh

kon si Belo usa ka magbabalak


Kini nga "balak" iyang retokehon
ang letrang "l" iyang lugiton
dayon letrang "k" maoy ihaplak
human i-sterilize og alak

Unya inig gawas gikan sa klinika
sa iyang gi-makeover nga obra
modayeg ang mga hi-brow nga kritiko:
Kataliwtiw og ilong sa bakakero


-- NOEL VILLAFLOR
Mandaue City, Cebu, Philippines

7.11.2014

pagbasa


kining pagbasa nimo kanako
buta sa mga kurba nga sinilsilan sa ka'yo
imong mga tudlo gasubay sa gabaga

ngabil
hawak
bat-ang
ug
dayon og dagan ang imong mga halok
hangtod sa pag-awas sa akong lawas
walay hunong padayon og subay
liog
abaga
pusod
ug
dinhi sa hinabolan nga lawak labihan
katin-aw ug dili kinahanglan ang mata
kining pagbasa nimo kanako

-- TEA SOLON
Cebu City, Philippines

ang nagbasa


nadagma sa da'n
dihang gisugo ngadto
sa tindahan

samdan nga mibarog 
padayon pagtakiang 
sa iyang pagpauli 

gikan sa balak


-- MA. CARMIE FLOR ORTEGO 
Talalora, Samar, Philippines

7.09.2014

edsa


Dinhi ang pagsugod 
ug pagtapos sa adlaw

uban sa pasunding-- mga samad 
nga gikamayo. Wala na'y lain pa.


-- SIMON ANTON NINO DIEGO BAENA
Bais City, Negros Oriental, Philippines

sinina


Gikan sa hayhayan.
gimudmod ko nimo diha 
sa imong nawong, gisimhot 
ang akong alimyon: Downy, 
sabon, ug gamayng aso
gikan sa paglapog ganina.
Bisan sa pagduhaduha
gisul-ob gihapon ko nimo
sama sa mga adlawng milabay na.
Giuban ko sa imong sa pagkalarag--
Ako'y tigsalo sa abog ug igang
nga giwaldas niining dakbayan.
Unya, inig uli tadlas sa tingsawop
ibutang na pod ko nimo 
sa labhanan ug kabalo ko:
bisan pa'g byaan, matultolon ra
gihapon ko sa imong kamot 
diha sa hayhayan.


-- MAI SANTILLAN
Calaanan, Cagayan de Oro City

7.07.2014

sa may baybayon sa phuket, 10 ka tuig gikan sa nahitabong tsunami


Hunghong sa mga balod: kalimti
ang akong kaisog.

Ang akong paghasmag
sa inyong mga gipuy-an-- usa lang
kadto ka adlaw sa atong dili maihap
nga panag-uban. Tan-awa

ang baybayon nagpabiling
putli sa pagpaabot
sa imong pagbalik. Ako
andam sa paghalok

bisan kutob lang sa imong mga tunob,
bisan hangtod lang sa imong mga lapa-lapa.


-- DELORA SALES-SIMBAJON
Butuan City, Agusan del Norte, Philippines

kuyog sa kahayag


Mouban ko nimo, Bulan! 
Adto ta maglutaw-lutaw 
sa mga dapit nga tugob 
sa katingalahan.

Gaksa ko palihog 
padulong sa kinalayoan 
nga maabot nga panaw
sa alimpatakan.

Adto ta sa lasang magdula 
og  luksong-baka ug dakop-dakop.
Ay'g saba--salig lang!-- 
dili lagi ta masakpan!

Ang makakita sa atong laraw
mao ra ang mga alibangbang 
duyog sa atong mabulokon
nga paglutaw-lutaw.

Bisan dili nako makauli
ug mawala, wala'y mangita 
taliwala sa dili mabutyag nato
nga tinagoan. 


-- SUMMER DAFFODIL M. PAGUIA
Nazareth, Cagayan de Oro City, Philippines

7.05.2014

simpatiya sa balak nga "kitiw" ni Vicente Bandillo


di mapasaylong krimen
pagkutlo sa mga rosas sa hardin

ay bohemyong kasingkasing
sud-onga pod ang gahilak
samtang gapanyolito og i-pod

ayaw baya tawon kalimti
bisan taliwala sa pag-selfie


-- MELQUIADITO M. ALLEGO
Live Oak, Florida, USA   

kon nagkaabot pa lang unta mo


Naguol ko nga nahimuot
samtang nagtan-aw ko kanimong
naghibi diha kay gimingaw ka
sa imong lolo nga panagsa ra nimo 
makita. Sus, kon nakaabot pa lang ka
sa usa pa nimo ka lolo
mas banha pa siguro imong
hagulhol ato, kay pareho man mo kaayo:
komedyante, hilig mokanta ug mosayaw,
kuryoso sa tanang butang, hilig
moutingkay sa mga gamit sa balay.
Kon nagkaabot pa lang mo,
sigurado ko'ng dili lang siya
lolo nimo, og ikaw apo niya,
kon dili mahimo gyod mo'ng suod kaayo
nga managhigala, mapapas gyod
ang dakong diperensya sa inyong edad--
ikaw matigulang sama niya, 
ug siya mabata sama nimo.


-- DANTE O. CUALES JR.
Cebu City, Philippines

7.03.2014

bulalakaw


Mitadlas
ang usa ka bulalakaw.
Daklit.
Ug hingpit nga nahanaw.
Apan nagbilin
sa iyang mga tamla sa kasiga
sa dulom
nga papel sa kalangitan.
Ingon usab
ang daklit tang paglabay
ning kalibotan.
Unsa man ang mga tamla
nga atong gibilin?

        
-- URIAS A. ALMAGRO
New Berlin, Wisconsin, USA

gikan sa tagay


ang mga tinapigang bakho
misamparay duyog sa pagpauli
gikan sa tagay

dayon ang kahilom
mipuli diha sa mga nahaw-ang 
nga lingkoranan 

nanamin ang bulan 
sa nalanay nga ice
gikan sa baso

nilabay ang hangin
daw nanaghoy diha
sa haw-ang nga mga botelya


-- GRATIAN PAUL R. TIDOR
Dipolog City, Philippines

7.01.2014

footnote: unsa'y buot nilang ipasabot


bayot¹
ang²
ginoo³







___________________________________________

¹ Ilang ingnon pirmi nga kinahanglang ilansang sa krus, silotan 
tungod makasasala sa iyang pagsuway pagsupak sa iyang pisikal 
nga pagkatawo.

² Sagad sugod nga pulong niadtong mga tawo nga nakahinumdom 
ug nag-ingon: Ang Ginoo nagpalansang sa krus aron maluwas 
ang sala sa kalibotan.

³ Magbubuhat sa tanan-- sa adunay kinabuhi ug wala, makita ug 
dili makita, ug kun kang kinsa buot isunod sa mga tawo ang silot 
nga kamatayon sa usa ka bayot.

-- JESSREL E. GILBUENA
Bantayan, Cebu, Philippines

alang sa uwan ug sa piniritong isda


Sa kinaulahing talisik nga minglagapak sa banaw
kilid sa nataran ni Noy Balas,
akong gipagod og prito ang tinabal
nga giasinan ni Mama.

Dihang gihaon aron isud-an
pares sa giinit nga bahaw, nasiplatan nako 
ang lapok nga ningpilit sa bagtak 
sa iring-binuhi sa silingan ug ang mga sagbot 
nga inanayng' giharos sa hangin
padulong sa bakilid, gianod.

Gitilok nako'g kitkit ang ulo
sa nikaging nga pinirito. 
Nahanaw ang dag-om.
Nasinaw ang kaha.

Gisilhig og apil sa tiguwang
ang mga nahabiling bukog ug mumho
nga akong gipangsabwag sa baha
inubanan sa kalit nga pagyamyam:
"Puyra gaba!"


-- LESLIE S. NUÑEZ
Compostela, Cebu, Philippines   

Daghang salamat sa mga maniniyot nga gapaambit sa ilang mga hulagway sa Google ug Flickr.