6.30.2015

dihang gibilin ko tumoy sa pukot


tungod sa pangpang sa talima—
diin sagad mokawas si lapulapu
kon mamisita kang bulakna kaniadto,
diin may punoan sa buli
nga daw tinustos sa agta
nga batabata sa bantogan nga baylan—

aron pag-abog sa mga kiriwan
nga modugok samtang gisubay
sa akong amahan ang napulo ka luta
nga mitadlas latas sa luwas sa sta. rosa

nagpanglingi ko kay midagan akong anino
dunay gihunghong ang hangin
ug nangawaling ang palwa sa kalubihan
nag-alipasa ang mga bawod
nga naghapakhapak sa akong dughan
ug ang kantil nga akong gibarogan
nahimong lubos itom nga pultahan
nga abli alang sa tanang
nakatimaho sa akong kalisang
misuway ko pagtaghoy
apan gisumaysumay ko sa huyohoy
mipiyong ko ug gitugyan
ang akong kapalaran sa kalawran, apan

sa akong pagyahat sa kapunawan
nanalingsing ang kahayag sa kabituonan
nga napasapasa sa kabaybayonan sa mactan
ug ang mga bukya nga naglulinghayaw
misiga ang sihag nilang lawas
midan-ag sa akong matag lakang
ning kagumkom nga balas 

misilaob ang sawog sa dagat


-- IOANNES ARONG
Lapu-Lapu, Cebu, Philippines

sikolohiya sa masakiton nga giurom


sa suok sa iyang lawak
naglutaw ang amarilyo nga karsones
(piko ang usa ka tiil)

sa eskina sa iyang kusina
nasiplatan ang abuhong iro
(nagtungko)

ang karsones ug ang iro
gidaman kabahin sa tiguwang
(gialimungawan)


-- LESLIE S. NUÑEZ
Compostela, Cebu, Philippines    

6.28.2015

udtong-tutok sa sam-ang sa carreta


Natay-og, nangatagak 
ang mga biyuos. Samtang gautnga

ang mga ulod, gihandos sa haguros 
ang usa ka alibangbang ug

kalit nabukhad ang itom nga sayal 
sa dalagitang naninda'g 

mga kandila, karmelitos, sigarilyo, 
mga buwak pinungpong.

Gapabungol-bungol siya: gisitsitan    
sa gahukas nga sepulturero.


-- MICHAEL U. OBENIETA 
Topeka, Kansas, USA

niining naghinapos nga takna


(kang Nanay Ulding)

Nasayod kami nga mao na kini.
Gikuptan sa among maguwang
ang imong mga kamot, dulot sama 
sa among mga pusod nga ninggamot 
sa imong sabakan. Nikunhod na
ang imong ginhawa ug inanay
gibugto sa kahilom. 

Taliwala kanimo ug kanamo,
karon, mao ang mga gatosan 
nga hangin ug nangakay-ag 
nga gutling nga ningsalibay kanimo 
didto sa kinatumyang bituon, 
samtang gibanlas sa mga balod 
ang imong laylay ngadto 
sa karaan tang payag amakan 
diin gihimugso mo kami,
gilabnit sa mga gaway sa ihalas
nga ningbalikos 
sa among kabatan-on.  

Ilawom kanamo, dinhi, karon, 
nagum-os ang kawanangan. 
Nabungkag ang mga bangaw. 
Nanglipang ang mga itom nga kahoy. 
Nanugdon ang mga uwak nganha
sa mga ugma. 

Sa pagkakaron, sa dili pa ikaw
bukotan niining habol, among
iduhig kanimo ang mga hawok,
ug luha, tim-os sama sa taligsik. 
Amo ikaw nga gakson, hugot
sama sa kahingpit. 


-- CORAZON M. ALMERINO
Los Angeles, California, USA

6.26.2015

matod sa mga pilosopo


1. Dungaw

Mikudlit sa langit
Ang daaw sa buwakaw
Sa lam-aw natunaw
May baking nagdungaw

2. Tanghaga

Bintana ang mata
Pultahan ang dunggan
Kon balay ang diwa
Moduaw ang tanghaga 


-- NOEL P. TUAZON
Dauis, Bohol, Philippines

nganong dili na mosuwat si blake og balak


Ang tanang balak bakak
Apan dili tanang bakak balak.
Usa ka adlaw sa iyang paglatagaw,
Nakakita siya og rosas.
Sa tanto niya'g tutok ini, wala ni mipahiyom.
Ang rosas wala'y baba.
Ang baba mugna ra sa magbabalak.

Ang tanang balak bakak,
Apan dili tanang bakak balak.
Sa laing adlaw sa iyang paglatagaw,
Nakakita siya kang Haring Adlaw.
Sa tanto niya'g tutok ini, wala ni mingisi.
Ang Haring Adlaw wala'y baba.
Ang baba mugna ra sa magbabalak.

Ang tanang balak bakak,
Apan dili tanang bakak balak.
Usa ka gabii sa iyang paglatagaw,
Nakakita siya'g mga bituon.
Sa tanto niya'g tutok nila, wala sila mangidhat.
Ang mga bituon wala'y tabon-tabon.
Ang tabon-tabon mugna ra sa magbabalak.

Ang tanang balak bakak,
Apan dili tanang bakak balak.
Usa ka gabii nakigtupad siya sa iyang uyab
Sa bangko sa Plaza Independencia.
Sa tanto niya'g tutok sa mga mata sa iyang langga,
Wala siya kakita og mga bituon.
Ang mga mata, mga mata ra.

Ang tanang balak bakak,
Apan dili tanang bakak balak.
Usa ka gabii mihatag siya'g rosas sa iyang uyab
Samtang nanuroy sila sa Terraces sa Ayala.
Sa tanto niya'g tutok sa mga mata sa iyang langga,
Walay mibukad nga rosas sa mga mata sa dalaga.
Ang mga mata, mga mata ra.


-- KEVIN A. LAGUNDA
Liloan, Cebu, Philippines

6.24.2015

mabaw nga kalipay sa duha namo ka katabang sa balay


mubo ra apan lisod 
labwan ang ilang langit

bisan ang ilang paraiso
diha ra sa kamalig

likod sa gikamada
nga binakid humay

natagbaw si linda
sa bayabas ni samuel


-- RIC S. BASTASA
Katipunan, Zamboanga del Norte, Philippines

panorama


Napapha ang palibot sa dagan sa panahon,
ug kutob ra intawon ko sa pagpundo sa kilidkilid.
Wala'y namuwak nga balak samtang
ang tanan lupig pa'y naabo 
sa imong pagbiya. Wala'y bughaw
kun kalunhaw sa alinghuna. Nangalaya
ang mga gihay sa pasumbingay. Nangapadpad
kuyog sa paglabay sa mga sakyanan. Igo rang 
gisapawan sa gaapurang sangpit sa mga dispatser 
duyog sa gabutobuto nga steryo. 

Unsaon pag-aninaw sa tagingting
nga mga sinsilyo sa akong dughan? 

Labaw pa sa mga abat ang labyog
sa mga lumabay tadlas sa dakbayan. Diri
ug didto. Padulong ngari, punta ngadto… 
Hain man intawon ka diha sa mga gapundok 
sa eskina? Hain man imong nawong diha
sa nalakra nga lamat sa gilabyan nga 
mga bintana? Kaabog! Kaaso sa tambutso
samtang padayon ang kapaspas sa orasan!
Ug nia ra gihapon ko, taman ra sa pagpundo 
taliwala sa tulin nga dagan sa panahon…


-- TON DAPOSALA
Cagayan de Oro City, Philippines 

6.22.2015

nganong angay’ng ila-ilahon ang mga balak sa tsina


Aduna'y mga gasa
nga dili angay'ng maangkon
kon wala pa matagamtam--

unsaon pagpaminaw
sa pulso sa kabungtoran;
unsaon paglantaw
sa bidlisiw nga gakisaw
sa kalawran;
unsaon pagsud-ong
sa panon sa mga langgam
sa labing asul nga kalangitan;

ug uban pa nga hilom
ang katahom ug huwatonon
ang pagkat-on. 


-- GRATIAN PAUL R. TIDOR
Dipolog City, Philippines

haiku: talan-awon subay sa route 66


Saksi ang huwaw--
disyertong kasilag sa
uwan gabanaw. 


-- DENNIS S. SARMIENTO
Baltimore County, Maryland, USA 

6.20.2015

marinero nga paingon mosakay

kang Pius

Ang kasingkasing
usa ka lawod diin
ang kinadul-an nga isla
nagpahipi luyo sa tabon-
tabon sa imong mga mata.

Nakadungog na ka
sa nagdaguok nga gininhawa
sa kalisang sa mga gabiing
mokalit la'g hulpa ang espasyo
nga nag-agak sa inyong kasko.

Gikabagat mo na ang lain-
laing dagway sa kamingaw
dihang molanat og pila ka semana
nga wala gyo'y langgam motugpa
diha sa inyong damba.

Apan ang mga butang
nga labaw kahuot sa dughan
mao kadtong mga butang
nga gipatabanan og kalipay
sama pananglit kaganiha sa sala--

gipakli mo ang nangalarag
nga mga dahon sa kalendaryo
samtang naminaw ka sa agik-ik
sa imong masuso nga 
kuwang pa'g ngipon.


-- IOANNES P. ARONG
Lapu-Lapu, Cebu, Philippines

mimesis


Nanguhit na ang salumsom, ug ang usa
ka tiguwang gipaningot nga nanilhig 
dayon og daob sa mga dahong laya. 

Bisan ang uban ini giharos ug giwani
sa huyohoy, nangahas gihapon siya 
paghandos ini balik sa pinundok.

Biyuos pa hinuon ang dilaab, dili takos 
nga makapaso niya. Ug sayod siya nga kini
kutob ra sa pag-ugdaw sa mga dahon.

Nahilingi sa kasadpan, nakita niya
ang laing pagkaawop sukad gapadayag 
ang kasuwaw sa balik-balik nga kinaiya.

Abo na ang mga dahon. Ug siya pod 
mahimo na unyang tipik sa kagabhion…


-- JESSREL E. GILBUENA
Bantayan, Cebu, Philippines

6.18.2015

naandan nga buyag sa usa ka buntag nga balaan


Barogi nang inyong gisulti! Nanghagit
sa mga lagong ang naamang nga basurahan, nagnganga. 
Bisan sa suok, taas og patid ang hutoy

sa usa ka inahan. Gapanilap ang huyohoy 
gikan sa yamog nga saag, gapasiaw sa kalit nga pagtugaw 
sa iyang masuso diha sulod sa kariton.

Galaway ang gakamang nga kaadlawon.
Nanghilam-os kini sa patay nga sapa duol diha sa Taboan.
Ug bisan makabungol ang mga busina,

lutaw gihapon ang tabyog sa kampana
gikan sa simbahan sa San Nicolas, wa'y kutas sa kimpang
nga bagting: Pesteng yawa, pesteng yawa…


-- MICHAEL U. OBENIETA 
Topeka, Kansas, USA

matod mo


“Kataposang 
sayaw 
ang ting-init
nga gidangaw 
ang pako 
sa nangliking 
darohan.” 

Hilom kong 
nagtutok nimo 
nga inanayng 
miturok,
nangudlot, 
ug mibanay.
Nagpaabot
sa unang lusok 
sa talihagbong 
nga dag-om.


-- NOEL P. TUAZON
Dauis, Bohol, Philippines

6.16.2015

pragmatismo


wa bayay kanaway 
nga molantugi sa dagat
kabahin sa makatagbaw
ug hilom ining bahandi
nga mga bulinaw 


-- RIC S. BASTASA
Katipunan, Zamboanga del Norte, Philippines

sa banilad town center


Sa daplin sa dalan, wa'y mumho nga gipasaylo.
Wa'y tipak sa kagubkob nga ginabot ang nakaikyas
Sa gakinamot nga mga trabahante.

Ug diha sulod sa Yellow Cab, galatad sa lamisa 
ang tulo ka hiwa nga pizza nga gilabay-labayan lang
sukad gitalikdan sa usa ka pamilya.


-- ADONIS R. ENRICUSO
Dumingag, Zamboanga del Sur, Philippines

6.14.2015

sulimbad sa balibad; o, dili malalis si Marcus Valerius Martialis


Wa ko kaangay nimo, Dr. No.
Ngano kaha, wa ko kahibawo.
Apan kini tin-aw pa sa klaro:
Wa ko kaangay nimo, Dr. No.


-- VICENTE VIVENCIO BANDILLO
Dhaka, Bangladesh

mga karaang bintana


Matag karon ug unya inig liko nako
sa mga naandang agianan, mohangad
ug makit-an ko ikaw-- gayampungad
diha sa mga karaang akmoanan, 

gikwadro sa bintana diin ang dan-ag 
sumpay sa imong buhok nga gakapay 
duyog sa kurtina nga daw gaagda nako.
Unsa kaha'y hinungdan anang kalaay

nga gasalimbong sa imong katahom? 
Alirongan dayon ko sa mga banha 
nga hunghong sa mga ulitawo kaniadto. 
Sa mga saad gipangkuro nila alang nimo

samtang ilang mga dila gadasok og panon
sa alibangbang. Apan bisan ang gikwerdas
sa ilang mga sista masapawan ra gihapon 
sa kasamtangang hugyaw ug kasikas

sa mga sakyanang gawaldas sa dalan.
Ug ako kalit lang napugwat gikan 
naalimungawan, nilakaw og padayon. 
Matag karon ug unya, kon akong sundon 

ang naandang mga likoon sa kadalanan, 
anaa gihapon ka sa ikaduhang andana
labaw sa uban pang patsada ning dakbayan.
O, handurawan sa nakalimtang harana!


-- TON DAPOSALA
Cagayan de Oro City, Philippines 

6.12.2015

brownout


Naputol ang pagsiyaok
sa nag-videoke nga hubog,
gisumpayan sa uwang
sa nangulag nga mga iro,
gitugbangan sa bagutbot
sa estudyanteng
napalonga’g WiFi
bungol sa kanaas
sa balilihan,
sa awit sa mga timos,
buta sa kalit
nga pagpangbutho
sa nagkadaghan
nga mga bituon.


-- GRATIAN PAUL R. TIDOR
Dipolog City, Philippines

pagbinugtong


(sama ni Arnold ug Tagore)

Gahilik kining dagat, 
ug ang gapangagho
niining mga balod 
wa’y kaundangan ang pagkab-ot
sa baybayong bun-og na sa dili
niini mabalsang' paghalog. 
Biyaan ko kining tanan,
ug mopahitaas
ngadto sa mga bukid, ngadto 
sa kahitas-an kon diin
ang busay’ng huni lamang
sa mga kawayanan
ang mopatalinghog
sa akong lagyong kasubo.


-- KARLO ANTONIO GALAY-DAVID
Kidapawan/Davao City, Philippines

6.10.2015

tankapaspas sa mubo nga kalipay sa hantatalo


ayaw paglangan
tulin ang mga gutlo
sa matag kamang
tabok sa yuta’g hangin
sa di pa ka molupad


-- DENNIS S. SARMIENTO
Baltimore County, Maryland, USA 

oda alang sa bulbol sa ilong


gibahig diha sa kangitngit
salag panagang sa daotan
(basa panagsa ang kalibotan)
tanghaga daw samin gikupoan
o nanagsangang ugat nasangit
nganong nitubo ang gitago sa buho?
gibugahan kanunay sa kinabuhi
(kalimutaw sa hari nga bantay-pari)
anghel tibugol, tibuok lagom nga kalit
mituyhakaw nagpahiping lagong sa ngilit.

-- ERIK E. TUBAN
Cordova, Cebu, Philippines

6.08.2015

hubad sa inenglis nga balak ni Donel B. Pacis


Ngadto Sa Mga Magbabalak Nga Nahimong Mga Propagandista

Awiton ta si Goebbels
Ug Caligula bisag walay
Namati  Sama sa gisulti ni Cheever
Ang kapanahonan sakit sa kaulag Kalimti

Kalimti si Tagore ug iyang mga kanta
Bahin sa mga maya ang mga asul asul
Nga mga damgo (sama ni Lorca ug iyang
sayo ug giusikang kabatan-on) Neruda napunga
         sa dimaayom-ayom nga kasubo
         sa mga saop ug piyado

Makat-onan da nimo'g dali ang pagkamadukoton
Sa mga politiko polis-iro
Ug mga bugaw O mamahimo kang
Malantawon madamgohong adunay mga mansiyon

Putli waymansang mga tanaman ug balisbisan
Maha-ispidno ang tanlag ug mga langit ni Li Po:
Ang mga bangkero ug mabangis nagpasulabi na
Ang balak dili makaugmad og bisan unsang hitabo
           Ang panahon sa metapora
           Mitaliwan na

Giugdaw iyang kaugalingon daw gamayng daob
Sa waykapuslanang tugkaran


-- MELQUIADITO M. ALLEGO
Cameron, Louisiana, USA

uhaw


(gikan sa “When a Man Hasn’t Been Kissed" ni Jeffrey McDaniel)

Dugay-dugay na ko wala makahalok.
Unyang gabii, akong pangitaon asa man
ang tinagubtob nga timailhan sa bayle,

o sa pista diri sa isla. Mosulod ko sa diskoral
ug sulngon ang puthawng poste sa mga suga
nga nagbarog sa tunga. Taliwala sa mga abog,

ako kining gakson, akong sutaon, kon kang kinsa
ang mopatigbabaw-- ang iyaha o ang akong kabugnaw.
Sa pag-undang sa sonata ug kiplat sa mga suga

magbarog ko luyo sa usa ka manindahay og ilimnon,
maghuwat sa basiyo sa beer ug idalikyat kini'g punit
dayon ipahid ang baba ini sa akong ngabil, liog, ug dughan.

Kay dugay-dugay nako wala makahalok,
akong duolon ang bugoy-bugoy o di ba kaha
ang hubog sa pistahan. Manungog ko,

magpasiuna'g kagubot hangtod siya sapoton.
Iyaha kong duolon, ug birahon sa akong liogan
kay sa kadugay nga wala ko makahalok

bisan sa susama na lang nga higayon
makadumdom ko kon unsa ang pagtandog.


-- JESSREL E. GILBUENA
Bantayan, Cebu, Philippines

6.06.2015

patentiro


Nagpantentiro ta
sa daplin sa lapyahan
ilawon sa buwan.
Ikaw ang pahot ug ako
ang imong kapalaran.
Basa ang lapalapa
sa nanghapyod nga balod,
tun-og, ug yamog.

Nagpatentiro ta
ug gitamak sa dagat
ang hubo natong bahakhak.
Lumoy ang saguysoy 
sa huyuhoy.
Buwa nga miulbo
ang layong kabugason.

Nagpatentiro ta
sa hulimok ug danlog
nga bunbon.
Nagpilit ang atong panit.
Nanglili ang libat nga buwan.
Ah, nag-umog ang langit!


-- NOEL P. TUAZON
Dauis, Bohol, Philippines

pagkapangag


kang higala Rechie Lodonia, P.S.K.

Mapangag ra sa gihapon
Bisan kon bulawan pa kita'g ngipon.
Bulahan kadtong gihinayhinayan
Og kitkit sa katuigan--
Kadtong igo lang lumotan,

Mahingo ug mapugwat
Sa paglamba sa pultahan.
Apan duna sa'y uban
Nga pugsonon gyod
Ang pagligwat sa gibarogan--
Siko nga wala tuyoa
Gumikan sa paregla
O bangil sa disgrasya
Dihadiha mobarag bisan
Ang kinamagwangang bag-ang.

Sa paghapyod sa dila
Sa nalarag nga haligi 
Misidlit ang dugo
Ug ang bugnawng' huyohoy
Mihandos lahos sa lagos
Ning nagbangotang dughan.

Bay, dili malimot ang kahaw-ang.


-- IOANNES P. ARONG
Lapu-Lapu City, Cebu, Philippines

6.04.2015

haikurog: hagit sa tingtugnaw


Wani ang uwan. 
Nahumod ko, naumod
sa imong bugan. 

Sa imong ilok
nangalisngaw: ting-init 
sa akong hagok.


-- MICHAEL U. OBENIETA 
Topeka, Kansas, USA

kutay sa han-ay


ang kinamaayohan nga moburda
mao ang labing hilomon

pagkaanindot sa iyang mga buwak
nga gimugna sa iyang tanod
diha sa puting panapton

ang kinanindotan nga buwak 
sa panapton mao ang gabuswak
nga gaduhaduha pa 
sa kamatinud-anon sa adlaw

ang kinanindotan nga panapton 
mao ang nabordahan og buwak 
nga wala pa kaayo mobuswak 
ug nahawiran sa kamot nga kanunay
matuslokan sa dagom

ang labing maayo nga kahilom 
mao ang hapit na maburda diha 
sa puting panapton nga wala pa 
giluwa sa tilaok sa tanod 
nga gihuktan pa sa dagom


-- RIC S. BASTASA
Katipunan, Zamboanga del Norte, Philippines

6.02.2015

ang kataposang linya sa akong pagpanaw


“A part of me knows what you’re thinking.” -- Eye in the Sky, Alan Parson’s Project

Sa wala pa masulat ang kataposang linya
sa akong pagpanaw, nagtukaw ko

ug nakita si Tirador, nagsista sa tunga sa dalan
diin giharanahan niya ang laki nga naligsan og pison.
Niduol ko ug dunay mansanitas nga namunga
sa nangapasad nga tinai. Sa akong katingala,
nakapangutana ko: "Unsay matang sa tanghaga
ang makaplagan niining panghitabo?"
“Paghilom!” Nisita si Tirador. “Kita ka
nga Gadakop-dakop ko sa Kahayag ug Anino!
Balibaron unta nako apan gisuksok niya ang sinsilyo
sa akong tibak ug iya dayon kong giabog. Nilayat ko

sa kilidkilid, ug gisugatan kog bigotilyong brusko
nga gibisteha'g mga patik ug dalikdik. Sa iyang ulo,
gibasahan nako ang mensahe: Ako si F. Cielo Agonorio.
Sunod lang sa ako aron di ka malisang sa Yamo!
Nitalikod si F. Cielo diin gipakita niya ang mapa
sa kaguliyang nga gipatik sa iyang bukobuko,
diin naay ekis nga gilakra sa iyang tangkugo.
Gipasunod ko sa bigotilyong bungi. Nikamang
hangtod nakaabot kami sa nataran sa sam-ang.
Nisibat si F. Cielo dihang nagpakita ang gasando

nga berdugo, gapungko-pungko sa lapidang bulawon.
“Ako,” nagpaila siya sa iyang kaugalingon,
“Ako si Doktor Kintolimbo, ang Bakunawa Kingpin,
ang kabit sa chiks ni Baldomero! Ug sigon
sa tulo ka dagway sa baraha nga giyagyag
sa pagpasundayag—Satan Rules!” Iya kong gibunalan
og pala ug nahulog ko sa lubnganan. Siya miawhag:
“Bulahan ang adik-adik tungod kay adunay kamatayon
o pagbasol nga naghuwat sa tumoy sa sangpotanan.”
Ilawom sa yuta naabli ang ganghaan sa espidno.

Nipadayon ko hangtod nakaabot ko sa opisina,
unya nakaplagan ko si Kevin Lagunda, ang kaluha
sa laing inahan. Niduol ko sa iyang lamisa
ug ako siya gipangutana. “Unsay ikasulti nimo
sa imong kinabuhi karon?” Mitubag si Kevin:
“Unsa may katungod nimo, ha, sa pagsukit-sukit—
ay piskot, ikaw man diay na, Otencio Mautganon!”
Gikuot niya ang sinsilyong gisuksok sa akong lubot
ug nihunghong siya, “Ang kinabuhi mismo amang.
Paingon sa Way Padulngan.” Nitingsi si Kevin.

Gitultolan dayon ko niya sa pultahan. Taliwala sa silaw,
napalgan nako ang kaugalingon, gahigda sa kwarto.
Gisuwat nako ang kataposang linya sa pagpanaw.
Gikan sa tanang nanghitabo, karon pa ko kaamgo  
nga aduna gyo'y Gino-o nga labihan kamaluluy-on.

(alang kang Erik 'Medyo Baboy' Tuban, Gratian 'Lennon'Tidor, Cheeno Bordz, ug Kevin 'Lovin' Lagunda)

-- TON DAPOSALA
Cagayan de Oro City, Philippines 

pag-ampo


Naanad ko nga mag-Iningles
bisan sa akong paghuna-huna.
Busa, gikan sa akong panghupaw,
nipiyong ko ug pinaagi sa akong tuo
nga kamot gitrapohan nako
ang akong nawong ug nihunghong 
sa akong kaugalingon, "Lord Jesus Christ, 
please help us…" Gibalik-balik nako
paglitok apan ang mga pulong 
wala'y kalag ug dili tipik  
sa akong kaunoran. Nanghupaw ko 
pag-usab, ug nanghangyo sa hilom, 
"Ginoo ko, tabangi intawon kami..."

Nakaginhawa ko og lalom.


-- DANTE O. CUALES JR.
Cebu City, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.