9.14.2015

ang pagsumbong


Mora og kadtong bata, ang kalibotan
giilogan sa iyang duwaan. 
May nanikas sa iyang pagsalig,
habog ug tulin sama sa tabanog
nga nawagtang. Midagan kini taliwa 
sa kangitngit. Milingi sa buwan. 
Miliyok sa adlaw.

Nagkaguliyang sila kay bugnaw 
ang higdaanan. Buslot ang atop.
Buskag ang haligi ug abuhon 
ang bungbong nga mihabol sa panimuot 
sa iyang mga kauban. Nangatu'g unta sila,
puno sa panaad nga ugma
manglupad ang tabanog.

Padayon ang pagbakho ug paglad-ok
sa laway sa kastigo nga di masabtan.
Samtang ang kalimutaw gilumsan 
sa parat nga tubig nga nagpalibot
sa mga isla sa iyang panumdoman,
ang bata mitibi paglitok 
sa iyang gamay nga  bahad: 

"Bantay lang mo. Isumbong ta mo 
sa tanan nakong naagian." Milupad
ang iyang tingog lagbas sa mga bungol 
nga bituon, dili moundang.


-- JOHN C. BITON
H Chí Minh, Vietnam

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.