2.28.2015

hangyo


Kon ako
usa man lang ka dahon
nga nagpadulong
sa pagkalarag,
sagnga
unya ako
sa akong pagkatagak.


-- URIAS A. ALMAGRO
New Berlin, Wisconsin, USA     

dihang gaalburuto ang kahaponon


Duyog sa pagdahunog
Sa galut-od nga panganod,

Nanayaw ang mga punoan,
Naghudyaka ang mga sanga,
Naningkag ang kadahonan,
Nanggimok ang mga sagbot--

Nangandam pagsugat
Sa pagbunok.


-- GRATIAN PAUL R. TIDOR
Dipolog City, Philippines

2.26.2015

argumentum capsicum


Midukot ang kamatuorang pisot 
Sa ginhawaan sa siling kulikot.


-- VICENTE VIVENCIO BANDILLO
Dhaka, Bangladesh

ngalan sa hangin: sa pag-abot sa bagyong seniang


Nasayod kita sa matag ngalan sa hangin
diin man kini gikan ug asa paingon, ug
gilitok nato sa dila ang angga sa bagyo

nga mora ba'g usa siya ka suod nga higalang
wa gani damhang mokalit la'g duaw, butho.
Nasayod kita sa matag ngalan sa hangin

nga sukdon unya ang kamingaw sa gikusgon
sa huros, bundak sa lipak ug kahigwaos.
Gilitok nato sa dila ang angga sa bagyo

ug molingiw kita sa langit kon makit-an
kining mikapyot sa naghaguros nga dag-om.
Nasayod kita sa matag angga sa hangin:

lilo, buhawi, alimpulos, unos: tanan
namilit sa atong kahadlok ug pangagho.
Gilitok nato sa dila ang angga sa bagyo

samtang galurat ang atong mata sa Adlaw
sa dili pa kini sanapan sa panghupaw.
Nasayod kita sa matag angga sa hangin.
Gilitok nato sa dila ang angga sa bagyo.


-- NOEL P. TUAZON
Dauis, Bohol, Philippines

2.24.2015

lantaw sa jabeligway island gikan sa dipolog ngadto sa dumaguete


(alang nilang Dr. Ben & Becky Jabel)

nahitalunong kita sa kahibulongang postura sa nagpungko 
nga pulo daw alom sa alimpulo sa kalawran samtang 
gatikungkong sa bunk beds sa supercat nga giuyog-uyog 
sa mga balod nagpaminaw sa yinagubyob sa kulukabildo 
sa makina ug dagat samtang nagsingabot ang dumuduong 
nga kilumkilom kalit mibunok naghabohabo sa pantalan 
sa paglusad ta sa andamyo sa boulevard adunay grasya
nga misugat kanato adunay banda sa kalangitan


-- MELQUIADITO M. ALLEGO
Dunnellon, Florida, USA

kaligutgot


Gabii, gadildil ibabaw sa atop ang matag lusok 
sa uwan. Nibanaw ang kaparat sulod sa lawak. 

Karon, samtang gihagtik nako ang asin diha
sa sabaw, natugaw ang kahinanok sa tubig.


-- DENNIS S. SARMIENTO
Baltimore County, Maryland, USA 

2.22.2015

kon unsa'y anaa sa pangalan: tubag ni inday sa panguyabulatik ni dodong


paminaw

labaw pa sa dugos ang gilatid niana
labi na kon linghod pa ang pangidaron 
ug putli pa ang pinitik sa dughan
nga lami ipasigarbo

samtang gipangaliyupo nga magmatngon 
aron dili matatsahan ug mapapas 
kining inampingan nga bansagon

paminaw

kay kon magpinutong lisod ang pagsubay
sa mga linya nga angay pun-on  sa akong pirma 
sama sa sss pag-ibig philheath ug uban pa 

paminaw

sa lanog nga gibilin sa katigulangan
ug ilang kaagi nga nagduso nag-abli 
nagtultol sa akong padulngan 
ug nag-ila sa akong kinatibuk-an


-- TEA SOLON
Cebu City, Philippines

sa lutaw nga lawak


Galut-od ang mga libro,
galitok og mga pulong nga wala pa mahinanok.
Ang mga sugilanon sa gatipun-og nga mga hinubo
makalumos. Dayag ang mga tingog nga nagkalayo,
ug nagkahanap ang dagway sa hagbay ra
wala pa makita. Ang uwang sa usa ka iro
lupig pa'y nabitik sa tumoy sa iyang ikog. Ug uban 
sa gainusarang tiki sa bungbong, kining hunahuna
nalukot sa gabawod nga kahilom ug kahayag--  
gapalawom sa pagpaabot.


-- ADONIS R. ENRICUSO
Dumingag, Zamboanga del Sur, Philippines

2.20.2015

sa mga mata ni nora: hangin, tubig, kalayo, yuta


Duna’y pangpang ang katugnaw. Diha ang layatan. 
Duna’y tamboanan nga gatadlas sa mga bawod. 
Duna’y bitayanan sa kandila. Diha ang latayan. 
Duna’y wanang sa langob ang mga panganod.


-- MICHAEL U. OBENIETA 
Topeka, Kansas, USA

sa uwan, sa adlaw


Maayo pa ang tinanom
nga gumamela ni Buboy 
hangtod karon padayon
gihapong namukhad sa tugkaran
bisan pagahulhogon
sa uwan.

Di sama sa imong gitisok
nga blue hydrangea, nangalarag
ang mga gihay ubos sa landong 
sa akong tamboanan bisan 
bitaw igo rang gihalokan    
sa adlaw. 


-- JONDY M. ARPILLEDA
Tandag City, Surigao del Sur, Philippines

2.18.2015

anig-ig


Ang anig-ig
nagpadayon 
sa iyang pagdagayday.
Sa tingpamulak, sa ting-init,
sa tingpangatagak. Sa tingtugnaw,
usahay mahimong yelo,
apan sa ilalom
ang iyang tubig 
magpabilin.
Sa akong kasingkasing,
ang anig-ig
nagpadayon 
sa iyang pagdagayday.


-- URIAS A. ALMAGRO
New Berlin, Wisconsin, USA

kabahin sa imong pangutana kon unsa-- ang dagat o ang bukid?-- ang labing duol sa akong kasingkasing


Aron matubag nako ang imong pangutana
angayan tingali nga suginlan ko ikaw 
atong mga katuigan kanus-a ang akong amahan 
momata og alas tres sa kadlaw'n, maglakaw
og kapin usa ka oras padu'ng sa suba diin
iyang gigaid ang iyang sakayan, sama 
sa iyang paggaid sa among turong hiniktan. 

Angayan tingali kang makahibaw'
nga samtang manghugas ko sa mga plato,  
ang dagat manambo sa kanal-kanal 
sa duha ka bungtod ug kon katkaton nako  
ang punoan sa tugas sa atubangan 
sa among balay, makit-an nako ang ulo sa simbahan. 

Angayan tingali kang makahibaw' 
nakat-onan nako ang pagpanigpo og danggit
sama nga ang matag punay nakong makit-an--
nakuha sa laang-- akong buhian. 

Aron matubag nako ang imong pangutana
kinahanglang makahibaw' ka: ang kangulngol 
sa tunok sa danggit daw pinitik sa kasingkasing 
sa punay kansang mga pako nakatilaw 
sa naandan nga kapunawpunawan.


-- JONA B. BERING 
Tuburan, Cebu, Philippines

2.16.2015

pagpaabot


Nangurog ang akong kamot nga giiwagan
Sa pikas nga Buwan samtang gihapyod-hapyod
Ang nangagkot nga buhok ni Nanay.
Giatangan namo ang imong pamayhon
Nga magdali pagsaka sa hagdan.
Gihandom nga madungog ang dahunog
Sa de kahon mong motorsiklo
Sama sa otso kabalyos nga Robin.
Kay gusto na namong mahanggap
Ang kahumot sa dugo
Sa tulingan nga giputos sa selopen.

Apan, wala… wala ka pa.

Gisulog-sulog na hinuon kami
Sa nagbilar nga mga gangis kay sa langit
Wala magpatim-aw ang North Star
Ug nagpaabot sa lapyahan
Ang Seven Star.
Hangtod gipadpad ang kahinam
Dihang ang among mga dalunggan
Gikulitog sa mensahe nga gitangag
Sa bugnawng hangin.

Ayaw kamo'g kabalaka--
Nahutdan lang ko'g gasolina.


-- ELEAZAR T. ACAMPADO
San Jose del Monte City, Bulacan, Philippines

pormula


Sa Iyang kamot nalalang
Ang nag-inusarang pormula
Sa pagbutho sa kalibotan
Lakip sa kawanangan
Sulod sa unom ka adlaw.
Gikan sa mga puyang dahon
Nga migitib sa inahang-liso
Padulong sa mga bituong
Nagkatibulaag diha sa kahabog
Sa kagabhion, kining tanan 
Mituo, misunod sama 
Sa usa ka saad, usa ka mando.
Sa ikapitong adlaw,
Ang naglalang nagpahulay 
Samtang naglantaw 
Sa iyang mga ginama apan
Basin gipamaolan kay hangtod 
Karon wala pa man nakabakod.


-- ANGELITO G. NAMBATAC JR. 
Iligan City, Philippines

2.14.2015

dugta


nadunggan nako 
ang imong pagpanilhig sa nataran 
ning sayong kabuntagon
samtang sakit pa ang akong ulo 
sa kahubog kagabii

sakit pa gihapon ang kasingkasing
tungod sa dili kapugngan
nga paghinumdom

sa pagkakaron pasagdi
nga pamation nako ang awit sa silhig
nga gatapok sa mga laya nga dahon

kini unta unya na lang nimo
sunogon


-- RIC S. BASTASA
Katipunan, Zamboanga del Norte, Philippines

pasiyo atol sa tingtugnaw


i. Bugtong Kahoy

Sama sa mga tudlo nga kuspad,
Sama sa mga palad nga gibukhad,
Gipaabot mo ang mga mumho-- 

mga lusok sa panganod.

 ii. Binugtong nga Baklay

Gibalik mo ang naandan nga agianan,
Ug sa makadaghan gasubay diha sa daplin
Ang mga pundok sa sagbot nga nangalaya na

ug ang mga padulong pa sa pagkalaya.

 iii. Bugtong Padulngan

Sama sa bugtong kahoy imong kinabuhi,
Sama sa palad ang imong padulngan,
Gapaabot ang langit kanus-a 

matapos ang pagbaklay.


-- DENNIS S. SARMIENTO
Baltimore County, Maryland, USA 

2.12.2015

seachange


Walay puas ang mga balod 
pagtumod og mga pulong 
sa hilit nga baybayon diin 
nanikop kita og mga balak.


-- VICENTE VIVENCIO BANDILLO
Dhaka, Bangladesh

pasumangil sa balakero sa iyang kapikas atol sa adlaw sa gugma


Pebrero 14 na pod.
Ug sama sa nangagi,
wa gihapon ko'y ikahatag nimo
nga mga pungpong. Ay, mga bulak!
Malawos man na!

Sagdi na lang, pangga,
og wa'y bulak. Nia man pod 
kining bag-ong pinupo 
nga mga pulong-- manalinsing 
lapas sa Pebrero. 


 -- GRATIAN PAUL R. TIDOR
Dipolog City, Philippines

2.10.2015

las islas filipinas


ang kalibotan haw-ang
wa nay tumoy sa lawod
nga angayang utingkayon
wa nay bantayog nga sud-ongon
wa nay rebulto nga yubiton
wa nay nahabiling kanaypan
didto sa unahan nga takos
kaplagon

apan nagpabilin
ang iyang lawas
ang bung-aw sa iyang banghilig
ang mapintas nga mga bulan
ang mahuyang nga lasang
naghulat sa ulan


-- ERIK E. TUBAN
Cordova, Cebu, Philippines

panilap


Sa bata pa, buotan kaayo siya 
sa pahimangno nga dili mokaon 
nianang batikon kay lagi kuno 
makagahi inig tuli. Apan karon 
nga hingkod na hiamgoha niya  
pwerte man diay niining lamia. 


-- DONZKIE B. ATON 
Bagtik, San Remigio, Cebu

2.08.2015

uwat


Inighumag lubong
Anang mga mingtalikod
Wala tay mahipos gikan
Sa kuwarenta'y kuwatrong namiya
Gawas nga sila numero na lang
Sa tanang hilisgotan
Kanang maong panghitabo
Morag samad gikan sa bildo nga taliayo.
Lami kawton ang kugan
Hangtod uwat na lang
Ang ilhanan sa panumdoman.


-- OMAR KHALID 
Metro Manila, Philippines

kaaslom


Palihog, sabta sab ko 
kon piyongan ko man 
ang pagtusop 

ining lemonsito.

Gitagamtaman ko pa
ang kangilo sa duga
sa imong pagbiya.


-- JIN D. GARCIANO 
Camotes, Cebu, Philippines

2.06.2015

karaang katri


1 SI SABEL UG AKO
Sa gagmay pa ming mga bata, si Sabel, akong maguwang,
maoy akong kadulog sa dakong katri. Ang among lawak
sigpit gyud kaayo, halos napuno sa dako ug karaang katri
nga kabilin pa sa among Apoy. Si Sabel dapit sa tuo muhigda,
ako dapit sa wala, duol sa bintana nga nag-atubang sa bukid
sa Amandewing nga nagkanaw-kanaw sa kalayo.
Naningkamot ming ang among mga panit, among abaga,
bukton, bitiis, ug tiil di magsaghiray sa among pagdulog.
Bisan matod pa, sumpay mi'g tinai, ang among dugo
pagkaihalas gyud sa usag usa. Bisan tugnaw kaayo
ang kaadlawon usahay, inampingag maayo ang mga lihok
kay di gusto makasabod o makatugaw. Mag-iyahay mi'g
tiku'ko sa among bahin sa higdaanan, si Sabel sa tuo,
punay la'g ihap sa tiki nga mag-ginukdanay sa bungbong,
ug ako sa wala kanunay manglaktod sa hunahuna
sa mga tinagong lasang sa Amandewing.
Bisan tuod wa pa kahinganli sa linghod nga buot
ang kawad-on ug kamingaw adtong mga panahona,
daan na ming sinati niini, matag-gabii nga magtapad mi
sa karaang katri, magtalikoray, ginakos ang among kahilom, 
padayon sa among tagsa ka damgo, way katagbawang gidahom.

2 IKAW UG AKO
Si Sabel nagmongha sa siya nadalaga na.
Unya gikahibalag ko ikaw. Ang dakong katri
atong kabilin gikan sa daan nakong panimalay.
Kay hinimo man sa hamtong nga kahoy,
ang katring karaan wa gyud hidutli'g bukbok,
milahutay sa tanang pagsulay.
Sa ato karong lawak ang akong lugar anaa gihapon
sa may bintana nga nag-ungaw sa amihanan,
ug ikaw duol sa portahan nga dapit sa habagat.
Apan ang atong mga lawas mag-abot man sa hawanan
taliwa sa dakong katri. mga aping abaga bukton paa ug bitiis
duot sa usag usa, walay ni hangin nga makaulang
sa atong panagtapo, ang atong mga buhok maglambiranay, 
pagasumpayon sa kagab-ihon mintras nahinanok tang duha.
Sa atong paghimata sa kabuntagon nagkabalighot sa usag usa
ang atong pagbati, way pulong makabadbad sa lala
sa atong paghiusa, nakaingon tang ang pungango
nga nag-gunit sa mga gihay sa kinabuhi anaa taliwa
ning katring karaan, ang upat nga partido sa kalibotan--
sidlakan kasadpan amihanan habagatan--anhi magtigom
ug mag-gikan, anhi pagawagtangon sa atong pagkahiusa.
Apan morag sunlog, usahay mobagis sa alimpatakan
ang kilat sa usa ka pangutana, handumanan kaha
gikan sa katring karaan, kabahin sa among pagtubo--
--pila ka anghel nay naihap ni Sabel sa iyang pagmongha?

3 AKO
Sa akong pag-inusara ning dako ug karaang katri--
wala na si Sabel kay lagi nagmongha, ug ikaw
gisikmit sad kaha sa usa ka pagbul-og sa habagat.
Gianinaw ko pag-usab ang Amandewing
gikan sa akong bintana. Nawani na gyud kaha ko
sa lasang nga kanhi sayon rang baktason sa hunahuna
samtang naghigda sa katreng karaan tupad ni Sabel?
Kun ugaling mahinumdom ka man sa mga nangagi,
mga panghitabong ningdangat nga wa palandonga,
mga inampingang nangawagtang sa usa ka pamilok,
ang mga nanglambo sa maamomahong panahon,
kadtong mga nangalaya sa dagmal sa init ug hangin,
ipadangat ko kini--
Ayaw na lag sukda ang mga gipang-agian na--
ang imong dangaw ug dupa dili makasugakod sa gilay-on,
giladmon o kahitas-on sa tanang matang sa dalanon,
sama sad nga ang kawad-on ug kamingaw nga kauban
sukad pa sa paghigmata ning kalibotan, mga tigmo
nga wala gyuy kasulbaran. Wala ug tuo,
pagkalapad karon sa hawanan sa katring karaan,
pagkagaan sa usa ka lawas nga iyang gisapnay,
apan unsaon man pagtimbang sa bug-at
sa mga dinala sa dughan ug mga handomanan
sa madamgohong utokan?
Angkonon na lang ang tanan,
ug sama sa naandan, matulog lang gihapon
sa katring karaan, sa kahinanok, suwayag pamiling
ang lasang sa Amandewing, mamati sa mga dahon,
hungihong sa kalanggaman, awit sa mga gangis
nga mao rag walay kinutoban, walay panag-iyahon
nianing tanan, walay tinguhaon, walay isalikway,
huwas sa paglaom, luwas sa pangandoy, bug-os.


-- MERLIE W. ALUNAN
Tacloban City, Leyte, Philippines

pagpangita sa kaugalingon


Tugoti ko nga mag-inusara;
molingkod sa balilihan
ug hikapon ang hamlig
sa  kataposang uwan sa Pebrero.

Tugoti ko nga moginhawa;
mosimhot sa kaamyon
sa mga buwak ug maminaw
sa mga huni sa kalanggaman.

Tugoti ko nga mag-inusara;
layo sa imong kalibotan
diin gadahunog ang alingugngog
sa akong dughan.


-- JONDY M. ARPILLEDA
Tandag City, Surigao del Sur, Philippines

2.04.2015

paghandom


sa mga saad
nga nalarag
uban sa usa ka dahon
nga natagak
ug gianod
sa sapa sa kalimot
       
sa mga damgo
nga nagunaw
sa sulod
sa usa ka lusok sa luha
nga midaligdig
sa aping sa kagahapon


-- URIAS A. ALMAGRO
New Berlin, Wisconsin, USA

self-portrait


Aduna ko'y tulo ka tasa.
Ganahan pa ko mopalit og daghan. 
Aduna ko'y upat ka kaldirin. Ang duha ra 
ang akong kasagarang gamiton. Pito ka buok 
ang akong trapo. Ang duha ilisanan na. 
Ang bulingon nagtapun-ok. Daw usa ka pamilyahan
Ang kahilom. 


-- JONA BRANZUELA BERING 
Tuburan, Cebu, Philippines

2.02.2015

pakapin sa panyo nga gidalit nako sa asawa sa akong kumpareng marinero


Bagtok ang mga bawod, ug basin lapaw pa sa pangpang
Ang tuyhakaw sa iyang kalisang. Bitaw, bisan og tinuod
Nga gahuwat ang kugita sa mga gakos sa tanang
Pantalan, pasagdi na lang. Hangin ra'y nasayod  

Kon asa na karon ang iyang lawas. 
Kon wala ka'y sarang nga gilawmon,
Kon dali ra ka lumsan sa kakutas,

Ayaw na lang siya paabota pa.
Daghan og hunasan ang mata.
  
Bisan asa ang sidlakan. 


-- MICHAEL U. OBENIETA 
Topeka, Kansas, USA

sa baranggay tukalinapao


gapasad ang gipakpakan
nga anagon sa darohan

sayo kaayong gisanggi
kap-atan ug upat ka kinabuhi

abo sa uling natun-ogan
niining halayong kamaisan


-- RODELIO BARELLANO
Caloocan City, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.