11.23.2016

mga wiriswiris hulip sa hiwi nga marka sa krus ni marcos


Udtong tutok. Usa ka bulhog nga kidhat
alang sa yutang sidlakan ang gidalit
nga lit-ag gikan sa mga gatuwad,
galubong sa ilang mga ulo diha sa ilang kinawtan
nga kalibangan. Ay, alimungaw! Kalit nakong nahinumdoman

si Noy Nanding, ang among silingang mangingihaw
sa Lorega ug ang iyang kapikas nga manikurista. Inig kagabii,  
labaw pa sa bulalakaw ang haguros sa ilang pinutos
nga tubol, gibalibag gikan sa bintana
sa ilang barungbarong lahos sa tangkongan diin
matag hapon gatabanog ko uban sa akong mga kaduwa.
Intawon, dili lang lapok ang among natumban! Sige lang, bisan
gatiniil, layo gihapo’g layat ang among agik-ik, labaw pa’g
lanog sa hubakon namong radyo nga kanunay
pasutoy sa gaindak nga kanta:
“May bagong silang
May bago nang buhay,
Bagong bansa, bagong galaw
Sa Bagong Lipunan…”


Karon, ang abo sa akong buhok tugbang sa aso gikan sa
gapangpang nga basurahan sa giilo
nga mga kalendaryo. Unsaon pag-ihap 
sa mga abog lakip sa mga pulbora? Unsaon 
pagtidlom sa dugo ug luha nga gapalutaw 
niining kapupod-an? Diin ang kadalanan kanunay 
mamuwak ug mangandila alang sa mga naligsan, padayon nga

gakagot ang mga pangutana. Maayo pa
ang mga hubog nga hinganta, dali rang tubagon
og mga paghot. Dali rang tultolon ang kangitngit,
ug sayon rang dumdomon ang linog nga mopulpog pod
sa dag-om ilawom sa atong bagulbagol samtang padayon
ang atong pagkasaag ug pagtibulaag
latas sa awaaw. Kon dili ta kabalo moila—
kinsa’y sarang yukboan ug kinsa’y angay
ihian— ayaw na lang kahibulong nganong igo rang ithan
sa mga kwaknit ang atong bandila. Atol sa iyang paglubad
lakip sa adlaw ug tulo ka bituon, ayaw
pagduka. Hangad, tutoki ang tingtakdol.


-- MICHAEL U. OBENIETA                                                                                                                    Topeka, Kansas, USA

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.