7.11.2017

sorbetero


Malinawon ra baya unta kong nagbinugtong
og inom, sama sa naandan, apan kalit
nga misurok ang akong dugo sa kasina
dihang akong naalinggatan, lusot
sa bildong bungbong sa imnanan,
ang yawan-ong tingsi sa tigulang sorbetero
nga nagsud-ong sa tsik (nga malagmit
naghulat og dyip kay nahiugbok man lang
sa daplin sa kalsada) nga nagpupahiyom
inubanan sa pagsulirap sa mata samtang
ganadong gatilap-tilap sa ube flavor
nga scoop sa gaugdong ice cream cone
nga gipalit gikan kaniya—nga mao pa lay
paghuman og pangihi sa likod sa poste.


-- VICENTE VIVENCIO BANDILLO                                                                                             Dhaka, Bangladesh

kon magbinisaya ko


kon magbinisaya ko
mahimo kong lain nga tao
molawm akong tingog
mogahi akong dila

mokusog akong kaon

mopaspas akong dagan
motyabaw akong dughan

ug manampiling ko
maghinuktok
maghunahuna
maghinumdom
sa akong pagkabata


-- RUSS LIGTAS                                                                                                                                  Metro Manila, Philippines

7.09.2017

kon buot nimong unayon pagkutlo imong kinabuhi karon dayon


huwami ug hawiri
ang kauhaw sa alimatok
ang kagutom sa langaw diha sa basurahan
ang katin-aw sa lama anang nalapsan nga sayal
ang kagay sa baso dihang mikanta-sayaw ang palahubog
ang kusmo sa iro batok sa kawatan

unya kining tanan
ayaw kalimti pag-uli 
ug kon malimot ka og pasalamat sa imong pagbiya
ayaw lang kabalaka ug ayaw lang baya padala sa kaikog
dili pa man ulahi ang tanan

balik-balik lang


-- MICHAEL U. OBENIETA                                                                                                           Topeka, Kansas, USA

sayaw sa nisalop nga adlaw


(alang sa choreographer nga si Russ Ligtas)

Matag adlaw

Moduaw ang kahayag
Sa mga isla sa Pilipinas.
Ang mga lalaki molantaw kaniya.
Ang  mga babaye motutok kaniya.

Sa nag-alingasang hangin
Molihok ang mga kamot sa adlaw,
Mosayaw ang iyang mga tiil
Nga gama sa papel nga gatiniil.

Adlaw, padayon sa imong sayaw!
Kay kon moabot ang kangitngit,
Gamiton nila ang imong kasingkasing
Paggama sa kwentas ug singsing.

Adlaw, ayaw'g dagan pahilayo!
Ayaw'g biyai ning kalibotan
Nga gitumban sa mga tawong nagkabayo.
Nasimhot na nako ang baho sa dugo.

Subay sa gagmay  nga mga dalan
Ang hambogerong kabayo gapahiyom
Sa paglabay sa mga balayng gama sa karton.
Ang ilang mga mata aduna’y tabon.

Ug sa pagsinggit sa nasaag nga langgam
Gikan sa kahoyng nahimutangan
Motago ang adlaw luyo sa baga
Ug itom nga mga panganod, nahulga.

Motyabaw ang mga babaye
Managan ang mga lalaki
Samtang molantaw lang ang hangin.
Molantaw lang gyod ang hangin!

Adlaw, padayon sa imong sayaw!
Kay kon moabot ang kangitngit
Mapalgan mi nimo sa punerarya.
Kining nagdilaab namong mga mata

Magpiyong na.


-- MARIA VICTORIA BELTRAN
                                                                                                       Cebu City, Philippines

7.07.2017

panag-uban


Naniid nato ang kilumkilom
nga gilukoban sa kahilom
dihang gisubay nato ang dalan
nga nakahil sa higayon.

Sa imong kumingking,
natultolan mo ang mga dapit
nga hapit nangapay-ag
sa katalagman nga kaagi.

Sa imong tudlo, gimapa nimo
ang agianan sa akong dughan
nga hapit na mapapha
sa akong panumdoman.

Sa imong kamot nga galikos nako,
gibagting mo kining dughan
palayo sa naandang kaguliyang
hangtod makabungol ang huni

sa gisaw-an tang gininhawa.

(alang kang Jae Mari Magdadaro)

-- TON DAPOSALA                                                                                                                         Cagayan de Oro City, Philippines

panag-abot


Kahil ang kilumkilom
nga gilukoban sa kahilom
dihang gitugyan ta sa higayon
ang atong kaugalingon.

Ang imong kamot, nitultol
sa mga eskina sa kagahapon,
nihinol sa mga uwat,
nga wala mapapas sa sebo de macho.

Ang imong mga tudlo, mikaskas
sa kwerdas sa kahilom
sa akong dughan nga kaniadto naamang,
nabungol sa mga kasikas.

Ug ang imong kumingking,
sa akong bukobuko, mitudling
mipalawom, sa akong gininhawa
nga mikutlo sa kahilom,

taliwala natong duha.

(alang kang Ton Daposala)


-- JAE MARI D. MAGDADARO                                                                                                  San Remigio, Cebu, Philippines

7.05.2017

anarkiya batok harmoniya


Mitan-aw siya sa siyudad isip palad. Ang mga abenida ug eskina mga linya sa singkamot nga gihimadlan sa mga mangunguot. Tadlas nianang mga kable mao ang kabug-at sa wa ikabungat. Ngabil ang mga aseras nga nagpangayog halok. “Gaksa ang kauga sa siyudad,” hunghong sa abog. “Gaksa ang mga kanal, mga layang anino, mga kagahapon, mga ugma.”

Iyang gitan-aw ang mga linya sa iyang palad. Gituboan kini’g mga kongretong plasa, kongkretong kahoy, kongkretong kasingkasing, kongkretong gugma. Nianang hapon, misalop sab ang kongkretong Adlaw sa kongkretong kasadpan. Ug pag-abot sa kagabhion, kongkreto sab ang damgo ug urom. Sa dihang gitak-om niya iyang palad, nalanay kining bituon.


-- OMAR KHALID                                                                                                                          Metro Manila, Philippines

paglabay sa panahon


Naa’y dyutayng pagkapalong
dihang nasayran nako imong ngalan 
gikan nahulagway ko 
ikaw: ang imong sinultihan, panagway, 
labi na kanang imong ngabil
sa pagngisi, sa pagkatawa.

Naa'y dyutayng pagkapalong
dihang nahikalimtan ko na kon
kanus-a ang unang higayon nga
wala na ka gihandom lakip sa di
maihap nga higayon sa kahilom
lahos sa pagkalimot.

Dinhi sa lawak sa handurawan--
nangita kon unsa’y wala pa
hisayri-- kahibulongan kon giunsa
pagpaawop sa dilaab nga kaniadto
gikalisangan. Minglabay ka, ug ako
nagadumdom…


-- ADONIS R. ENRICUSO                                                                                                          Dumingag, Zamboanga del Sur, Philippines

7.03.2017

acupuncture


Tusok tuplok og mga dagom sa tabunong panit
Moganoy sa sulog sa kusog sa kahimsog ni Zhen
Mipakgang sa pagdalikyat ni Qi hulog sa langit
Ako kurog ning kortinanglawak namasinbasin

Upat ka libong
Katuigan timbangan
Sa hinungdanong
Baskog sa kalawasan
Tumong ang kaayohan

Kagil-as kabikog kaigang katigmi kabug-at
Sa manipis bawog hunit aserong mga dagom
Ako malaomon sa gamayng milagro naghulat


-- MELQUIADITO M. ALLEGO                                                                                                         Lake City, Florida, U.S.A.

pag-inusara


Di madutla'g paak ang panit sa pag-inusara
Kay aninong naghukdong nanikma sa akong kilid
Nakadungog ko'g hingos-hingos pasiunang pangabli
Sa minatay sa nahimugso nga kamingaw.

Kamaayong atsahon ang gilubgan nga kahilom
Aron motuasik mosinggit ang tungang gabii
Kay way nagtikawtikaw nga mga tiil sa paghandom
Motunob-tunob ta sa labyog ning orasan sa bungbong.
Ang gisugat hinuon ning akong pag-ubog sa gabii
Mga blangkong mata sa mga bituong laya na
Nga may kalimutaw nanaggsukdip nagtutok kanako.

Miminatay pagsamot ang halawom nga kamingaw.


-- ERNESTO D. LARIOSA                                                                                                                    San Fernando, Cebu, Philippines

7.01.2017

pagpadayag nga walay pagdapig


gisulat ko lang ang hagbay ania na dinhi

wala na nako usba pa
ang naandan kong nakita ug nahikap

walay tabon-tabon
walay lipod-lipod

aron makita kon unsay tinuod
nga ania sa sulod

gitangtang na ang mga kurtina
giablihan ang mga bentana ug pultahan

bisan gani sa kabuntagon
ang mga suga wala gipalong

gilig-on ko lang gyod ang akong hagdanan


-- RIC S. BASTASA                                                                                                                    Katipunan, Zamboanga del Norte, Philippines

usahay kon ako mag-inusara, gihandom ko


ang akong tingog, kon makigsulti ko sa tubig sa tabay,
aghop ang lanog gikan sa kaladmon ug kadulom
ang akong tingog kon mohunghong ko sa punoan sa mangga
aron iasoy ang akong gidamgo sa miaging gabii,
ang akong tingog, nga molitok sa akong kaugalingong pinulongan
kon makighagwa ko sa akong usa ka tuig nga apo,
ang akong tingog kon maminaw ko sa estorya sa laing Pinay
nga lumargahay sa airport ngadto sa Middle East,
dako ang iyang backpack sa paglaom ug kahingawa;
ang akong tingog kon moawit ko ngadto sa mga panganod
ug makalimot og mga linya,
ang akong tingog ngadto sa akong inahan nga bag-ong nabalo,
ug sa akong amahan sa iyang lubanganan,
ang akong tingog inig-himamat
nako nga wa damha sa babayeng
puti'g buhok sa samin, ug mahingangha ko sa iyang pasiklap,
makigbayloay ug sekretong pahiyom–
siya mao ang tag-iya niining balay nga akong gipuy-an karon,
ang akong tingog kanang makigdulog ko nimo nga hubog ka,
mokatawa, o mobakho ka nga walay hinungdan,
kadtong tingog nga niadto mipauwan ug putot sa mga bulak,
daghang putot sa mga bulak,
nga miligdas na karon sa ngitngit nga yuta sa kahilom.


-- ESTER TAPIA                                                                                                                      Kathmandu, Nepal

Daghang salamat sa mga maniniyot nga gapaambit sa ilang mga hulagway sa Google ug Flickr.