banhaw-banwag

Diay labyan ra
sa kahinanok bisan
ang kangitngit. Ay,
ang mga tuktogaok
kanunay man manghagit!


-- MICHAEL U. OBENIETA
Topeka, Kansas, USA

kanunay

Matag semana santa akong mabantayan
si nanay nga magpuasa,
magpiyong-hangad sa kisame
magyawyaw sa litaniya.

Apan ngano duna man gihapon
parehang nanay matag adlaw:
walay kaon, gasiga ang mata
hangad sa langit, gayawyaw.

Kanunay ba diay ning semanta santa?


-- JESSREL E. GILBUENA
Bantayan, Cebu, Philippines

mandatum

ang kahulogan ug
kamahinungdanon
sa kataposang
panihapon gapadayon
ug nag-anam kalawom
kamatukbilon mintras
ang maaghopon makagagahom mando nagpabiling pakidiyostawhanon
(magminahalay matag usang anakdisipulo) gigamhan sa balaanong
pagpaubos nga pagsilbe ug pagtubos ang akong mga dugoong tiil nga
nagtungas sa kalbaryong
balabag nga gipas-an
samtang nahisukamod
naglakat nagbaguod
sa balanosang golgota
sa gibangkawng mga sala
ang natunok libod-suroy
nahisalaag-sa-kahilayan
hugasan sa gilansang
ang mga kamotiil


-- MELQUIADITO M. ALLEGO
Palm Harbor, Florida, USA

pastilan kang diyosa ka!

Angay ka bang ludhan
ning yutan-on kong mga tuhod?
Angay ka bang daygon
ning tampalasang baba?

Ikaw anaa sa langit, di ko makab-ot;
Ako nia sa yuta, puno sa kagubot.


-- JON R. SAGUBAN
Iligan City, Philippines

dalit-hagit

(alang sa dalagitang katabang nga gitrato
lupig pa'y geisha sa iyang butakal nga amo)

Uwak sa buwak
mobatog. Dakpa kini:
kabog ni Circe.


-- MICHAEL U. OBENIETA
Topeka, Kansas, USA

ang pagpanit sa sibuyas

Pagpili og pipila ka buok;
pwede na ang duha o tulo ba kaha,
total duha raman ka putahe
ang imong lutoon
karon. Pilia nang namungingi pa
sa yuta, kay wap-a kana
nakontaminet sa ubang mga kamot.

Ihumol sa tubig makadiyot
hangtod ang yuta magpaulipon
sa tubig. Makita na ang unang
leyer sa panit: purpol-purpol,
puwa-puwa.

Hinay-hinayi kinig panit.
Paningkamota nga di masamad,
kon masamad man uroy, ayaw
kabalaka, di mana malikayan.

Ayaw undangi sa pagpanit
hangtod makita ang pinakadeliket
niyang dagway: purpol-purpol, puwa-puwa.


-- JONA B. BERING
Tuburan, Cebu, Philippines

dahon

Nagpabilin sa daplin sa sapa
ang huni sa iyang pagkatagak
bisan dugay na siyang gianod
paingon sa dagat.


-- VICENTE VIVENCIO BANDILLO
Koror, Palau

alang kang Tu Fu

ang mga tamsi
usa ka hapon niana
nanugpa
sa punoan sa kawayan
naglamog
sa mga dahon niini
ug dayo'g kahanaw
samtang ang hangin
sa hinay-hinay nga huyohoy
misamot og katugnaw
naghatod og kahingangha
dapit sa tingkoy


-- RIC S. BASTASA

Katipunan, Zamboanga del Norte, Philippines

mons pubis

Imaheng bungdo gikatapan og mga kulongong
Dekorasyon sa nagpaday-as agtang

Mabinationg pangpang nag-ambo sa nag-agos
Busay sa sunaop tinipigang lugot paraiso

Paghinol paghapuhap pagtungtong niini
Mamiyong manghugot mga ugat sa kahinam

Sa tiilan sa hagdanan sa langit
Sa ubos bahin niining shangrila

Anaa nagpahipi tinagoan gipasalip-itan
Ang gatuyhakaw gibayaw dugosnong

Timbre sa kinapungkayang lalimaya


-- MELQUIADITO M. ALLEGO
Palm Harbor, Florida, USA

daotang binuhatan

Ang basang nuog gihayhay ko sa pantaw;
gihuyop sa maigang huyuhoy,
nauga pagsalop sa adlaw.

Ang mga tinulo sa tubig nahanaw;
sama sa aso ambot kon asa nikagiw,
ni diyotayng umog wala gyoy maaninaw.

Apan nagpabilin ang mga lama sa hugaw
gikan sa nuog, dala sa mga tulo;
nagpasad sa salog, sarang matan-aw.


-- JON R. SAGUBAN
Iligan City, Philippines

bisan asa ang kinapusoran

walay dagat pastilan walay bukid
dinhi sa kansas

didto sa sugbo
walay mga wanang labihan kalunhaw

nga mokisaw
sa galawod ug gabungtod
nga huyohoy apas-

sumpay sa naputol
apan gibawon nga taghoy-
laylay ni mama didto
hangtod mahigmata dinhi
akong mga liwat

nga unta magdungan puhon pagsabwag
sa akong abo nga maglumpayat pagtultol
sa tanang gilawmon sa tanang gitas-on


-- MICHAEL U. OBENIETA
Topeka, Kansas, USA

yawe

Mga dalang
daghang libaong.
Naay sakaon,
naay lugsongon.

Usa ka pungpong

sa mga pangutana kon asa na
ang ilang mga purtahan.

-- JONA B. BERING
Tuburan, Cebu, Philippines

bartender,

tagayi
ang tanang mga baso.
bisa’g unsa
ang mitukmod--
ang kadaugan,
o pagkapakyas,
pagpakigsagol,
o pag-inusara,
way kalainan.
ang tanan buot
moyarok sa sulod
sa ilang mga baso.
kay ang tanan
dunay buot saulogon
o buot lumsan
bisa’g hangtod lang
sa paglungtad
ning gabhiona.
bartender, tagayi
ang tanang mga baso.
lakip ang imoha.


-- URIAS A. ALMAGRO
New Berlin, Wisconsin, USA

sa damgo lamang

sudlon ko ang pultahan paingon nimo
bisan intawon diha lamang sa damgo

apan sa pag-abot ikaw sama ra sa gapnod
nga sa dihang gisulayan ko paghinod

bisag alisngaw sa kainit
wala gyod koy mapignit


-- RIC S. BASTASA
Katipunan, Zamboanga del Norte, Philippines

ang nagsinug-ang nga takna 1

Nganong dili man siya hakpon sa kabalisa nga ang iya ra mang amahan ang naghupot sa bugtong katungdanan nga iyang masunod, ug malagmit ang tigulang aduna pay kalim-an ka tuig sa kalandrakas nga paghanduraw samtang siya nga bayente anyos pa lamang gipul-an na sa tawhanong mga pangindahay? Apan walay nakasabot kaniya, kay sukwahi sa pamaagi sa mga propeta mahimo siyang magpakabuhi nga haruhay ug walay pagpakabana, nga sumala sa kapalaran mahumpay ang pagbati nunot sa bisyo ug kahilom, sa pag-usab sa mapa sa wala pa hipalging mga kalibotan, sa pagbuntog sa kabukiran nga nag-uylap sama sa samarang mga bagtingan. Dili siya biyaan sa panan-awon sa tigulang katloan na ka tuig ang milabay nga mihumol sa iyang mga tiil sa abaga sa usa ka busay ug miwilik gikan sa dunghay niyang buhok sa kasaysayan sa ilang banay—nga dihadiha ang mata sa kabatoan mitimaan sa iyang dugo isip langyaw sa tinguha nga kon mahinagbo niya ang manulonda sa paglaom dili siya panalanginan, ni ang sumusunod niyang kaliwatan, sa kawang lamang nga pagbugtaw sa kamatuoran.


-- VICENTE VIVENCIO BANDILLO
Koror, Palau

sa bentana

Dali, day, ari ta sa bentana
Sa atong bentana
Manan-aw ta sa ulan
Manan-aw ta sa nag-ininday nga ulan
Sa kabuntagon nga naghubo
Nanglugod nga naligo sa ulan
Ayaw na lang panghilam-os
Ayaw na lang panudlay
Mas ganahan kong magtan-aw nimo
Nga may nanapot pang
Ilhanan sa milabayng kalipay
Mas ganahan ko nimong
Manimaho pang banig
Mas ganahan ko nimong
Manimaho pang ako
Mas ganahan kong magtan-aw
Sa katulogon mong mga mata
Kay ngano man diay?
Naa ba goy panudlay
Ang ulan? Dili ba god katulogon
Ang kabuntagon?
Tan-awa, day, ang kabuntagon
Nasarasay samtang
Gihagkan sa ulan
Ang kabuntagon sab
Nga giganahan labihang
Nakasi-kisi, labihang nakalimbag
Tan-awa ang kuko sa ulan
Labihang nakaukob sa kabuntagon
Nagdagan-dagan sila sa kamaisan
Sa kakugnan, sa kabungtoran
Dali, day, ato silang paminawon
Sa ilang mga hunghong
Ato silang paminawon
Sa ilang mga sugilanon
Sa walay pagkadaan nilang sugilanon
Sa sugilanon nga kanunay nilang
Giasoy sa panahon.
Dali, day, ato silang paminawon
Sa ilang mga saad
Samtang kita maglantaw
Dinhi sa bentana
Sa bentana nga
Giangkon tang
Kita ang tag-iya
Bisan pag dili na unya
Tam-is ang talan-awon
Sa ulan ug kabuntagon…


-- OMAR KHALID
Medellin, Cebu, Philippines

tanka: ang taknaan tapot sa punoan

1.
Bisan matagak
ang mga dahon, kuptan
sa mga takna
ang pagbalik sa laing
panahon. Mosalingsing.

2.
Dughan manglunhaw
sa kadulom. Wa’y dag-om
mopatigbabaw.
Ulipon pod ang ulan,
hinginlan ra sa hangin.


-- MICHAEL U. OBENIETA
Topeka, Kansas, USA

hikog

nakigbayle
ang palakerong hangin
sa nagbikangkang nga karsones
sa hayhayan

sa kilid
sa pagpunay og dutdot niini
nalum-it ang lalag nga t-shirt,
nagbitay


-- RAUL M. FIGUES
Oslob, Cebu, Philippines

ensayo anaphora

karong gabii magpraktis na upod kita. mopiyong
moutong mokulob mohayang motakilid. unya
ehirsisyo sa daman urom damgo bangungot.
kinahanglang lamurok ug dagaang ang inagwahan
binenditahang unlanhabol. ang istandar daplin
sa kama ipa-awop lang dili pagngon. ang anaphora
sa altar dili balewalaon hinuon ludhan ug duphan.
mangadye/magrosaryo magpasalamat Kaniya.
dili makapaniguro kon makapagmata pa ba o dili.
karong gabii magpraktis na upod kita. manungop
ensayohon ang gahagok kamatayon taliwala sulod
sapaw o di ba resulta sa nadayonang katulogon.
sa kuwaresma o bisan kanus-a atong lawak--
katulganan ug punerarya mawad-an nag kalainan.


-- MELQUIADITO M. ALLEGO
Palm Harbor, Florida, USA

salamin

Gihikap ko ang akong aping;
gihikap mo ang imong aping.

Gipiropiro ko ang akong mga mata;
gipiropiro mo ang imong mga mata.

Gipaak-paak ko ang akong mga ngabil;
gipaak-paak ko ang imong mga ngabil.

Nagimhan ko, kusion ko ang imong aping
apan pagkadali mo hinuong nakasagang.


-- JON R. SAGUBAN
Iligan City, Philippines

pares-pares duha

adlaw gabii lalaki babaye
ulan init habol hait
ilong dunggan habol unlan
buta bungol kimpang bakol

aspalto semento kinilaw adobo
baka baboy hubag huboy
patay buhi tindog gahi
pahaloka ko day pasiriti ko ding


-- VICENTE VIVENCIO BANDILLO
Koror, Palau

talan-awon

hangin
nga nanggitik sa kahoy

yuta
nga nanghagwa sa bitin

panganod
nga nagbalhinbalhin


-- RIC S. BASTASA
Katipunan, Zamboanga del Norte, Philippines