lima ka gatos nga latos sa pag-antos

 

I

Lima ka gatos nga latos sa mga pag-antos 

maoy balos sa kalag nga nakaila og diyos 

sukad gigapos ug gilugos atubangan sa krus 

ug sa kabos nga mga santos nga di motestigos. 

II 

Gisaulog sa mga hungog ang dungog sa kalibog 

ug ang panghinambog sa mga hakog ug mga luog 

nga hubog sa kaibog ug way ugam sa pagpangilog-- 

isog og baho-- mipapa sa panit, unod, ug bukog. 

III 

Lima ka gatos nga likos sa bitin nga limbongaros. 

Lima ka gatos nga danyos sa lainlaing mga hul-os. 

Gisaulog sa mga isog kadtong mga kilat ug dalugdog. 

Padayong gabarog ug gihalad ang kinabuhi ug kusog! 

 -- ANIJUN MUDAN-UDAN 

Malaybalay, Bukidnon, Philippines

inig kadugta sa uhong

ang inalisngaw sa lipak 

mipaturok sa mga uhong 

nagpandong sa namahulay 

nga mga hulmigas gikan 

sa hataas nga panon subay 

sa mga gagmayng lungag ubos 

sa nadugtang punoan sa saging 

kon mopadayon ang uwan 

molutay ang mga gambalay 

ug dad-on sa lawom nga 

kahinanok uban sa lumot 

nga giyam-iran sa bidlisiw 

-- JOVANIE B. GARAY 

San Isidro, Davao Oriental, Philippines

mga taluto

Mga mananap nga abohon lang, 

Mokamang molusad sa ang-ang 

Sa nagtikyop nga kangitngit 

Aron paghalok sa yuta sa langit. 

Usa ba ka ritwal pamatyagon 

Kon usa ba ka pangaliya? 

Unsa'y anaa sa yuta 

Nga wala sa langit? 

Usa ba kini pagtimbaya 

Sa nahalangit ngadto sa nahayuta? 

Kita nga ania na sa itaas, 

Makahunahuna pa ba sa gigikanang silong? 

Ug nahibulong kita sa pasunding sa mga ikogang 

Mananap nga nanagkamang sa mga abog 

Samtang ang mga lingganay sa orasyon 

Mialingawngaw tadlas sa tigmi 

Nga dughan sa lamparilyang kahaponon: 

Ang mga mananap, ang mga mananap 

Sa kisame nag-iyahay paglatay.

Usa ba kini ka pagduko sa habog nga garbo 

Kon dili kini ka matang sa pag-ampo? 

Kayha usa lang kini ka pahinumdom 

Nga sa kagikang abog kita pauli... 

 -- MELQUIADITO M. ALLEGO 

Walker, Louisiana, USA

usa ka dominggo samtang nanilhig sa tugkaran ang akong apohan

aso sa daob sa kanhi lunhaw 

gabugdo ang mga panganod 

mikisaw ang mga awit sa radyo 

gatughit sa duyan ilawom 

sa landong sa manggahan 

milabong ang alisngaw sa utan 

gisanapan ang kahaponon 

ug gilapwaan ang kahilom 

-- JOJIE E. OGAOB 

Barili, Cebu, Philippines