ang asawa sa madyikero

Gitarget siyag kutsilyo
Sa gatuyok nga roleta.
Sa kahon gipriso;
Gigabas kaduha.

Gipalatay sa alambri –
Panyo gitaptap sa mata.
Gipahadla sa tigre,
Gipalabang og baga.

Ug limod sa kasayuran
Sa nanan-aw nga publiko
Nga siya usa ka inahan
Labihan ka ngilngig moluto.

Maayo nga motangtang
Og mantsa sa nilabhan.
Ug dali rang malisang
Kung ang anak hilantan.


-- ADONIS G. DURADO
Bangkok, Thailand