ang berdeng bayolinista ni marc chagall

Milupad ibabaw sa mga atop
Ang berdeng bayolinista ni Marc Chagall.
Lunhawng nawong
Lunhawng kamot nga nagtukar ug mipukaw
Sa kolor kahil nga bayolin.
Lila ang iyang taas nga jacket,
Ug ang iyang karsones nga abohon
Tinapak-tapak nga kwadradong gagmay.
Taas ug baga ang iyang bungot nga milutaw
Sa langit ug dagko ang iyang ngipon
Nga mibusngi sa pagpahiyom.

Ang langgam sa kahoy nga nahubsan og dahon
Mikalit pagmata ug miduyog sa huni,
Ug ang kabayo nga nakadungog milutaw og hinay
Sa hangin nagguroy sa nagyongyong nga karomata.
May iro nga gustong moduyog sa laylay
Ug miuwang kini diha sa tumoy sa atop.
Apan may gamay nga bayolinista usab
Nga sa kahingangha misugod unta pagtukar
Apan, kaluoy, yabag ang iyang tuno
Kay ang iyang bayolin
Byolin-byolin lang ug bungol kini
Ug tuod, kinopya lang sa matuod nga bayolin.

Ang asawa nga nakadungog sa huni
Mibayaw dayon ngadto sa mga panganod,
Sa walay pagduhaduha ngadto
Sa kalimot, sa kawalay tumong
Ug ang ang iyang bana, tan-awa,
Nagkinto diha sa yuta
Pinataas ang bukton
Aron unta pagpugong,
Ug misangpit Day! Day!
Apan wala kini makadungog
Ug misutoy pag-ikyas ngadto sa langit.

Samtang ang batan-ong masulob-on
Nagsandig sa sementong bungbong
Nagtutok sa yuta
Ug wala gani makamatikod sa daklit
Nga pag-tuyok sa kalibotan diha sa huni
Sa berdeng bayolinista ni Marc Chagall.


-- ESTER TAPIA
Dortmund, Germany