ang misteryosong johore baruh

Ang Singapore og Malaysia pwerting duola ra. Kanang Mandaue og Mactan nga distansiya susama gyod ana. Ang Singapore adunay taytayan nga alang sa paglabang ngadto sa Malaysia naa mahimutang sa Woodlands unya adto ni tugpa sa Kota Raya sa Johore Baruh sa Malaysia. Apan daghan kaayong mga taga-Singapore nga nitambag nga dili ko pangadtoon sa Johore Bahru tungod kay haskang peligroha. Cowboy city ang ilang ingon aning dapita, gamay nga sipyat patay ka. Bang, bang kuno bisan asang suoka. Daghan kaayong mangunguot, tulisan, kawatan, isnatser, adik, borikat ug uban pa. Apan usa ka adlaw ako gyong giadto ang JB. Ayo! Sa immigration pwerti namong hinangop sa mga nagbantay didto sa checkpoint sa Kota Raya. Kay pwerti nilang abi-abi kanako pagkakita nila sa Pilipinas nga passport. Nag-istorya man gani mi sa dilang espanyol sa usa ka babaye nga taga-immigration kay iya man kong giingnan nga kumusta? Nya ako man siyang gitubag nga muy bien senyora bonita. Te soy marinero? Nunca! Nunca senyora! Yo soy pistolero! Pwerti namong pangatawa. Nya adunay bantan-ong pulis nga niduol kanamo bali natulo silang nag-alirong kanako: taga-custom, taga-immigration nya usa ang pulis. Nitaas lagi kaayo ang linya sa luyo nako. Naikog gani kos mga tawo nga tua didto sa akong luyo kay nilanat gyod ug taas-taas ang among pagkukabildo. Ilabi na gyod kabahin sa Bohol kay interesado kaayo silang moadto didto. Mao nga nangutana ko nganong ganahan kaayo silang moadto didto? Ingon ang babaye nga tungod sa Panglao kay nakadungog na kuno siya kabahin sa mga tawo nga manghilo aning Panglao. Ingon ang taga-custom nga ang iyang gustong adtoon ang Chololate Hills kay tungod sa hubad niini sa bahasa Malaysia. Nya nipahiyom siya nga morag iring nga nakasungkab. Pero ang kinakuratan ang gisulti sa batan-ong pulis nanglimbawot lagi sa akong balhibo. Kay ingon siya nga iyang gustong makita gyod ang karaang Johore tungod kay matod pa niya ang hubad sa Johore Baruh mao ang New Bohol. (Bahru = New, Johore = Bohol). Unsa ang kahulogan sa pulong Bohol? Ako silang gipangutana. Ug nitaas pagsamot ang taas na nga linya.

-- LEO BOB FLORES

Bukit Batok, Singapore