pag-ugdaw sa kalibotan

Gidala nako sa akong lawak
Kining kasingkasing nga nabuak

Unya nangita ko sa makapilit
ug makabalik niini sa hingpit

Apan bisan giunsa nako
Pag-angay gamit ang semento

Nga ingon pa ni Kupido
Maoy gamiton kay epektibo

Wala gayod maulian
Kining sulod sa akong dughan.

Nagkuha ko og dagom
Nga gipabawnan og paglaom

Gitagsa-tagsa nako og tahi
Ang gamay og dako nga gisi

Kang Venus nangayo ko og tabang
Nga kining akong kahimtang

Dili madugay matambalan-
Ilisan na lang kining dughan

Ug sa sunod nga higayon
Saad nako sa akong kaugalingon

Ako na gyod ning hiposon
Puston ug pagkahuman

Sa dili pa maugdaw
Ang kalibotan

Ako nang ilubong.

-- MARIA VICTORIA BELTRAN
Cebu City, Philippines