paminawa

Ang mga linya ni Maria Victoria
Nga gisapawan sa kahumot sa pinya
Colada nga niungot walay pasensya

Walay kasikas ang iyang dughan
Walay niagi sa iyang dalan
Uga ang iyang tutunlan
Uhaw sa mga patak sa ulan--

Iphon ko na lang kaha
Ang mga balas didto sa daplin
Sa dagat sa Santa Rosa

Ug sudlayon ang dahon sa Bermuda
Gamiton ang sundang ni Gabriela
Nga gilubong ni Maria Clara.

Kay sa matag daplin sa natulog
Nga baybayon, naghulat sila
Sa kanta sa sirena

Nga wala makadungog sa
Taghoy nga gianod
Palayo –
Sa bilyako nga sulog

Dala lang baya
kining tanan
sa among kahubog.

-- MARIA VICTORIA BELTRAN
Cebu City, Philippines