sa surrealism room sa guggenheim collection

Sa surrealism room,
Ang mga hulagway giukay
Sa mga kutsilyo ug mga bulok.
Mga sukwahing
Hulagway sa mga babayeng
Balhiboon ug pak-an,
Mga siyudad nga nangatun-as
Sa kabatoan.

Nasaag ka sa mga wala
Magkatugmang bulok,
Ug nahipugwat ka sa paghinumdom
Niadtong dugay mo nang nakalimtan.
Gihigot ka sa kamingaw
Sa mga butang nga wala pa nimo igkita
Wala pa matagamtaman,
Ug bisan kanus-a
Dili mo gyod igkita o matilawan.

Ug sa tumang kasigurohan nakaamgo ka
Nga ang syudad nga naglutaw sa panganod
Mao ang tinuod mong gigikanan
Ug sa walay pagduhaduha
Kining walay porma ug balikog
Nga mga puthaw nga nagpasad sa balas
Mga buak, putol nga mga bahin
Sa tanghaga nga ang tubag
Mao ra usab ikaw.


-- ESTER TAPIA
Dortmund, Germany