ang damgo, sa kapulihay

ang damgo sa atong kabatan-on
nga atong gitupsan
aron himoong balak

imbis atong ipataban sa atong mga balak
sa panahon nga mobiya na
ang atong kabatan-on

aron unta magpabilin sa atong panumdoman
ang hawot nga mga pulong
sa nanglabayng mga balak

ato gihapong tupsan matag karon ug unya
hangtod nga ang damgo
mawad-an sa katam-is

hangtod nga ang nahibilin sa damgo
mao na lang ang tab-ang
ug sagapsap nga bagaso

sa balikwaot nga mga pulong


-- VICENTE VIVENCIO BANDILLO
Dubai, United Arab Emirates