ang gisaw-ang utlanan

1

Ang kasapaan sulod
sa imong lawas
nangitag dagat nga katiponan.
Mabatyagan ko ang ilang bul-og
sa tumoy sa tudlo
nga gitapion mo
sa akong dughan.

2

Sa atong pagginaksanay
mituhop sa awaaw
ug balaan nga kamingawan
sa atong lawas
ang linangkob nga huni
sa hagunghong sa kalibotan
ug kahilom sa langit.

-- VICENTE VIVENCIO BANDILLO

Dubai, United Arab Emirates